Edi Rama, nga Bild te Bild!
nga Agim Popoci
Njeriu i cili për 8 vjet qeverisje e përçau kombin e vet në Ne dhe Ata, sot akuzon Bashkimin Europian se po përçan Ballkanin me cinizëm politik. Po, ky është Kryeministri Edi Rama dhe cinizmi më i madh i tij, jo politik por kriminal, është se akuzën e bënë në të përditshmen gjermane “Bild”!
Në pritje të çeljes së negociatave me BE, Edi Rama thotë se ndihet sikur po jeton në dramën e Samuel Beckett “Në pritje të Godosë”, e shqiptarët për koincidencë gjithashtu po jetojnë dramën e Beckettit por duke pritur “Bild” të publikoj përgjimet e premtuara nga bëmat tjera të Ramës në zgjedhjet e vitit 2017!
Kur do çelen negociatat me BE, shqiptarët nuk e dinë, por përgjimet e premtuara për tu publikuar nga e përditshmja gjermane, më nuk u hyjnë në punë!
Kur “Bild” publikoi përgjimet që konfirmonin batërdinë e qeverisë së Edi Ramës me zgjedhjet, shqiptarët u bindën se Edi Rama edhe mund ti blejë të gjitha mediat shqiptare por janë mediat perëndimore që më të vlefshme e kanë drejtësinë se sa qeverisjen kriminale të Ramës, për hir të paqes dhe sigurisë në rajon.
Padia e paralajmëruar nga Edi Rama kundër “Bild” për përgjimet e publikuara që konfirmonin vjedhjen e votave nga çdo instancë qeverisëse e socialistëve, bëri të gajasen shumica e shqiptarëve, të bindur se në këtë botë ka dhe gazetarë e botues që nuk shiten e blihen!
Fatkeqësisht rezultoi e gabuar! Askush nuk pa të paditur, askush nuk pa kërkim falje për votat e vjedhura ama panë hajdutin e votave duke emëruar sejmenin e tij Damian Gjiknuri në krye të Reformës Zgjedhore. Pse pranoi këtë hajdut votash Partia Demokratike kjo është çështje e saj, por pranimi i Gjiknurit në krye të kësaj reforme ishte pranim i krimit zgjedhor të paralajmëruar.
Kështu dhe ndodhi, zgjedhjet e 25 Prillit u manipuluan por tashmë shqiptarëve nuk u duhej një “Bild” për të konfirmuar magnitudën e mashtrimit elektoral sepse tërmeti ishte sheshit. Me lekë, kriminelë dhe pushtet!
Dhe, ndonëse shqiptarëve tashmë nuk u duhej e përditshmja gjermane “Bild”, Skënderbeu i Spiropalit e solli duke ju thënë se atë e gjeti në mesin tonë! Jo, nuk kishte përgjime nga 25 Prilli por kishte një Edi Ramë ndryshe. Edhe pse “Bild” na kishte thënë me dëshmi se është hajdut votash, sot na solli një Ramë që fton Brukselin zyrtar të përballet me të vërtetën!
Dhe jo vetëm kaq! Këtij Brukseli që nuk mbanë premtimet, “Bild” na sjellë edhe 3 pyetjet kritike të hajdutit të votave, Edi Rama:
Pyetja e Parë: A ishte arsyeja e vërtetë e dështimit të negociatave, për shkak të kohëzgjatjes së reformave tona (pasi Komisioni i BE zbuloi se përparimi i mjaftueshëm ishte bërë tashmë)?
Pyetja e dytë: Sa prej anëtarëve aktualë të BE plotësuan të njëjtat kushte për të filluar negociatat, kur u bashkuan kundër Shqipërisë dhe Maqedonisë së Veriut sot?
Pyetja e tretë: A kanë të drejtë morale disa politikanë evropianë që të shkaktojnë mosmarrëveshje përçarëse në vendet e Ballkanit Perëndimor?
Edhe pse “Bild” i kishte përgjigjet në xhep për të tri pyetjet që vetëm Edi Rama nuk i bënë dot, qoftë edhe BE-së, sepse është hajdut votash, heshti!
“Bild” heshti edhe pse i ka sjellë dëshmi opinionit publik për këtë njeri si hajdut votash, dhe nuk bëri as përpjekjen më të vogël për të mbrojtur dinjitetin e gazetës së vetë!
Dhe, “Bild”, ndonëse heshti nuk e pranoi mashtrimin që ka bërë, në mënyrë që ti jep të drejtë “hajdutit” të bëjë moral!
E përditshmja gjermane mund ta ketë zgjedhë edhe rrugën e heshtjes me idenë se çudia zgjatë tre ditë; Kryeministri i Shqipërisë thotë se duke pasur parasysh këtë absurd të vërtetë, nuk i mbetet gjë tjetër, veçse të ecë përpara, sepse Evropa është feja e tijë, dhe asgjë nuk do të ndryshojë në lidhje me të, pasi kjo është rruga e tij e fatit; Ndërsa shqiptarët që vuajnë nga regjimi i tij, duke e parë Edi Ramën nga një “Bild” që e vlerëson hajdut votash tek “Bild” tjetër ku u jep leksione demokracie edhe liderëve të shteteve anëtare të BE, nuk kanë pse humbin shpresat.
Po, gjithçka fitohet me zgjedhje të lira dhe të ndershme, por kur ato nuk janë në dorë të një hajduti votash si Edi Rama. Ja kaq e thjeshtë është, pavarësisht si do ngelet gota, gjysmë bosh ose gjysmë plotë!
