Edi Rama njeh Gjiknurin jo Shën Damianin!
nga Agim Popoci
Tryeza për Reformën Zgjedhore ndonëse u përmbyll me konkluzione shpresëdhënëse la shije të keqe ndër popullin jorilindas për shkak të prezencës së rilindasit të Edi Ramës, Damian Gjiknuri.
Irritimi qytetar për prezencën e kriminelit elektoral, Damian Gjiknuri është më se i arsyeshëm dhe paraqet një goditje të fortë për produktin e Reformës Zgjedhore që e presin shqiptarët, por pritshmëria që në këtë tryezë të vijë një shenjtor dhe është i përzgjedhuri i Edi Ramës, është më shumë se lajthitje!
Damian Gjiknuri jo se do të ishte më i mirë sikur të mos përfaqësonte Edi Ramën, ai nuk do të ishte më i mirë edhe sikur mos të bëheshin publike fare përgjimet për krim zgjedhore nga gazeta gjermane Bild, sepse thjeshtë ai është komunist, dhe nuk e mendon ndryshe një fitore elektorale përveç se me manipulime zgjedhore.
Sot prania e Damian Gjiknurit në Këshillin Politik, ku pritet të autorizohet Platforma e Punës së procesit të Reformës Zgjedhore, mund të shkaktoj dhimbje koke tek ai elektorat i pakët shqiptarë që shpreson te zgjedhjet e lira dhe të ndershme por nuk mund fajësohet kryetari i PD, Lulzim Basha, për këtë gjë sepse nuk është ai që përzgjedhë kundërshtarin. Po, Lulzim Basha mund të fajësohet për prezencën e Oerd Bylykbashit në këtë Këshill, sepse kemi të bëjmë me një protagonist të konsumuar që ndërlidhet me Kodet e fundit Zgjedhore që degraduan procesin zgjedhor. Jo se Bylykbashi është fajtor për këtë dështim dhe merr ndonjë vendim me prezencën e tij, por ai ishte fytyra dhe pasqyra e negociatave zgjedhore nga Partia Demokratike, dhe detyrimisht sot është edhe lakmusi kryesor i perceptimit të çdo demokrati për zgjedhje të lira dhe të ndershme. Mjafton kaq, që në Këshill Politik sot të kishim një Oerd tjetër, që ngjallë shpresë!
Ndërkohë, të gjithë ata që presin nga Edi Rama se do të sjellë një Shën Damian në Këshillin Politik të Reformës Zgjedhore, siç ishte shenjti mbrojtës kundër dhimbjeve të kokës, kanë probleme me veten e tyre.
Po, Shën Pjetër Damiani studio drejtësinë, ishte reformator dhe moralist i kishës së kohës së tij, por nuk ishte komunist si Gjiknuri dhe nuk kishte në krye të kishës një njeri si Edi Rama.
Shën Damiani studio artet e lira dhe drejtësi në Ravena, Faenca dhe Parma, dhe fitoi famë si mësues i retorikës. Po, Damian Gjiknuri studioi drejtësi, bashkëpunoi me ca njerëz të rëndësishëm nga oborri demokrat, ishte dhe ministër ku bëri qindra shkelje dhe qindra qoka kriminale, por famën e fitoi si shkaktar i tërmetit elektoral me ca çuna problematik që u kujdesën për vjedhjen e votës dhe kontrollin e zonës elektorale, ashtu siç e kërkoi komandanti i tij, Edi Rama.
Sot Damian Gjiknuri edhe mund të jetë penduar për krimin elektoral në shërbim të Edi Ramës meqë ai u bë publik nga gazeta gjermane Bild, por kjo nuk mjafton. Ai nuk mund ti shitet më askujt si shenjtor, ashtu si coca-cola që nuk mund të shitet në shishe të dhallës edhe pse është coca-colë!
Sot Damian Gjiknuri e ka vendin në burg, por deri sa drejtësinë ta ketë në dorë ky Kryeministër, qytetarët dhe elektorati jorilindas nuk duhet ta konsumojnë energjinë duke lexuar horoskopin e Edi Ramës por të vendosin që ta ushtrojnë të drejtën e votës. Sot, më shumë se kurrë!
Mospjesëmarrja në votim është votë komuniste në kutitë që do të mbushë Damian Gjiknuri deri në ditën e zbatimit të cilit do Kod Elektoral qoftë!
Ditën kur Kodi Elektoral të jetë zbatuar, dhimbja e kokës së votuesit shqiptar do të pushoj edhe pa Shën Damianin; Dhe, nuk ka tërmet që do ta shpëtoj Damian Gjiknurin, burgun e ka të garantuar!
