Edi Rama nuk i solli Qendrat Tregtare…
nga Agim Popoci
15 vjet krim dhe politikë! Kështu mund të përshkruhet me pak fjalë dhe e tëra, veprimtaria e Lëvizjes Socialiste për Integrim. Lindi nga përçarje e partisë më kriminale në historinë shqiptare, PPSH përkatësisht PSSH, dhe nuk solli asgjë të re në skenën politike: as socializëm, as integrim dhe aq më pak demokraci.
Në 15 vjetorin e LSI-së nuk dëgjuam një kërkimfalje për njeriun që solli në politikë kjo Lëvizje dhe shkatërroi gjithë Shqipërinë.
A do të ishte Tirana dhe Shqipëria ndryshe pa Edi Ramën e Ilir Metës?!
Patjetër që po, si Tirana ashtu dhe Shqipëria, sepse ishte lideri i LSI-së, ai që popullit shqiptar i dha peshqesh një njeri në mes të rebelizmit dhe Fatos Nanos, kryebashkiakun që “premtonte”. Dhe jo vetëm kaq! Kur LSI ishte si veshkë në mes të dhjamit të Qeverisë Berisha, sërish e mori të pafatin Edi Rama, dhe e bëri kryeministër.
Sot LSI ulëret, është bërë me popullin, shpikë Qendra Tregtare dhe oligarkë, u bënë thirrje shqiptarëve që ti bojkotojnë ato, por jo edhe Kollashinin dhe Podgoricën ku krerët e kësaj partie kriminale furnizohen.
Po cilat janë këto Qendra Tregtare ku kryetarja e LSI-së, Monika Kryemadhi thotë se shqiptarët nuk duhet të blejnë, dhe sugjeron blerjen në dyqanet e lagjeve. Duhet pranuar që sugjerimi është për tu përshëndetur ndonëse Mona nuk e ka konceptin e lagjes e aq më pak dyqanit, ndërsa për Qendrat Tregtare të oligarkëve, s’kemi pse i kompleksojmë njerëzit kaq shumë.
Janë tri Qendra dhe dy oligarkët pronarë, që frekuentohen nga shqiptarët me shumicë: QTU, TEG të Samir Manen dhe Coin e Bashkim Ulajt. Që të dy, si dhe tri qendrat e tyre, Edi Rama nuk i solli, ai gjeti në mesin tonë. A u bënë më të pasur gjatë këtyre 2 viteve të qeverisjes së Edi Ramës pa LSI-në, kjo është një çështje tjetër, por për Qendrat Tregtare duhet thënë dy fjalë, meqë Mona nuk i tha!
Samir Mane hapi dhe shiti Qendra Tregtare kur LSI ishte në pushtet. Kur u hap QTU, duhet thënë se LSI nuk ishte në pushtet, por kur u shit QTU tek një kompani serbe, ishte pjesë e qeverisë, dhe u shit në kundërshtim me të gjitha ligjet shqiptare. Kur Autoriteti i Konkurrencës shkeli ligjin me të dy këmbët dhe Mishkoviç e pranoi se kishte blerë rrjetin e supermarketeve Euromax, LSI ishte në pushtet ashtu si edhe kur e bleu sërish një vit më vonë, që ishte krim shumë më i madh se sa hapja në fillim e këtij rrjeti dhe kësaj Qendre Tregtare. Pronari që e shiti dhe e bleu në atë kohë ishte Samir Mane, po ky oligarku aktual i Edi Ramës; Por, blerësi dhe shitësi serb ishte Mirosllav Mishkoviç, bashkëpunëtori më i ngushtë i Sllobodan Millosheviçit, dhe pronari i Qendrës Tregtare në Podgoricë, ku Mona edhe mund të blejë rrugës për në Kollashinin aq shumë të dashur.
Atë që humbi në tetorin e vitit 2005 kur u hap QTU dhe nuk ishte në qeveri, LSI e kompensoi në vitin 2011 kur u hap TEG-u. Ishte në pushtet, por LSI nuk u dëgjua për oligarkun që po ndërtonte një Qendër Tregtare dhe po devijonte unazën për tu lidhur me Autostradën Tiranë-Elbasan. U përfol mënyra dhe paratë e dyshimta të ndërtimit por nuk hetoi njeri, ashtu si dhe shitjen dhe blerjen sërish brenda një viti të QTU, biznesmenit serb për 26 milionë euro; Aq më pak ti bëhet thirrje shqiptarëve që të mos blejnë në këtë Qendër Tregtare dhe Euromaxin në duart e serbit sepse edhe në atë kohë shqiptarët kishin dyqane në lagjet e tyre.
Sot, në 15 vjetorin e LSI, Kryeministri Edi Rama mund të akuzohet për shumë gjëra por jo për Qendrat Tregtare; Edi Rama nuk i solli Qendrat Tregtare ai i gjeti në mesin tonë, pak rëndësi ka me oligarkë të Ridvanit apo Likes.
Po, sot, në 15 vjetorin e LSI-së, Samir Mane dhe Bashkim Ulaj janë shumë më të pasur se sa kur ishte Likja në pushtet, por kjo nuk zgjidhet duke i bërë thirrje njerëzve që të mos futen në Qendrat e tyre Tregtare ose të shkelin në asfaltin që kanë shtruar me tenderat abuziv. Jo! Njerëzit do të konsumojnë mallin më të lirë ose më të shtrenjtë në tregun shqiptar dhe jo vetëm, në bazë të standardit të jetesës që kanë; si dhe do të lëvizin nëpër rrugët që kanë nevojë dhe mundësi!
LSI, nëse është e vendosur ti ndëshkoj vërtetë këta oligarkë, ndëshkimi më i madh do të ishte, kontrolli dhe verifikimi i pasurisë së tyre ndër vite, me ose pa LSI-në, me ose pa Edi Ramën, dhe pse jo, me ose pa PD-në.
Qelibar nuk do të dalin as Qendrat Tregtare dhe as Samir Mane me Bashkim Ulajn, kjo është e sigurt. Por Mona duhet të ketë kujdes kur bënë deklarata të tilla publike, sepse një ditë shqiptarët do të fillojnë të kërkojnë edhe llogari, dhe nuk dihet se ku do të dalin faturat e betonit dhe armaturës që janë përdor për ndërtimin e këtyre Qendrave Tregtare. Një gjë është e sigurtë, vetëm në Surrel, JO!
