Edi Rama nuk ka faj!
nga Agim Popoci
Më 20 Gusht trashëgimtari i Red Bull pasurinë e të cilit Forbes e vlerëson 20.2 miliardë dollarë, do të përgjigjet para drejtësisë për krimin që kishte bërë mëngjesin e 3 Shtatorit të vitit 2012 në Bangkok. Jo se Tailanda bëri Reformën në Drejtësi, jo se ka një kryeministër si Edi Rama dhe ministër të Brendshëm, si Ish-Gjeneral Sandër Lleshaj, por populli tailandez bëri një betejë të ashpër me drejtësinë dhe politikën, si dhe vetë kompaninë Red Bull, për të kthyer rastin në pikën zero dhe për të zbardhë të vërtetën e përplasjes për vdekje të policit me Ferrari nga Vorayuth “Bossi” Yoovidhya, dhe largimin e tij nga vendi i krimit.
A ishte e lehtë?! Natyrisht se jo sepse Bossi ndonëse u akuzua për 5 vepra penale duke përfshirë shpejtësinë, drejtimin që shkaktoi vdekjen, goditjen e policit në motor dhe largimin me vrap, çështja ngeci për vite me radhë, miliarderi shtynte seancat për tu larguar në vitin 2017 nga Tailanda. E familja e policit të vrarë në përplasje, Major Wichien Klanprasert, u la në harresë për vite me radhë.
Pika që derdhi ujin e krimit ndodhi më 23 korrik kur koloneli Sampan Luangsajjakul i Policisë Mbretërore Tailandeze konfirmoi që Zyra e Prokurorit të Përgjithshëm, OAG, kishte vendosur të hidhte të gjitha akuzat kundër Vorayuth! Arsyeja ishte perlë kriminale, vetëm e vetëm për të shpëtuar Bossin e Red Bullit i cili meqë i ka 20 miliardë dollarë i jep vetes të drejtën edhe të vras, edhe ta lë viktimën të përmbytur në gjak dhe në fund të shpallet edhe i pafajshëm; Pse?! Sepse policia e kishte konfirmuar se Bossi ishte 30 vjeç në kohën e aksidentit, dhe jo 27 siç thuhej në procesverbal.
Vendimi për të hedhur poshtë akuzat zgjoi opinionin publik i cili ka kohë që ulëriste se sistemi i drejtësisë po favorizonte të pasurit dhe krimin, por askush nuk kërkonte EURALIUS, OPDAT e aq më pak një Kryeministër si Edi Rama.
U kërkua bojkoti produkteve Red Bull, u shtua presioni publik mbi policinë, Dhomën e Ulët të Parlamentit dhe Kryeministrin Prayut Chan-ocha, i cili e detyrua të dorëzohet dhe të zotohet se do të sigurojë drejtësi për shoqërinë tailandeze pasi me vrasjen edhe të dëshmitarit kryesor për hetimin e Bossit u konfirmua kultura e perceptuar e mosndëshkueshmërisë së elitës në Tailandë.
Protestat popullore dhe presioni i lartë opinionit publik bënë që nga Shtatori i vitit 2017 jo vetëm të sqarohet se si u bë që Bossi fillimisht të akuzohet nga policia se po udhëtonte me Ferrari, me një shpejtësi prej 177 kilometra në orë (110 milje në orë), kur kufiri ishte 80 km / orë (50 milje/ orë) dhe eksperti i policisë të ndryshoi vlerësimin e tij në vitin 2016 nga 177 km në 79 km / orë; Pra, vetëm pak nën kufirin e lejuar, por të vërtetohet përmes autopsisë se Vorayuth “Bossi” Yoovidhya, para përplasjes kishte konsumuar edhe drogë.
Komiteti i Pavarur i Hetimit që themeloi Kryeministri Prayut për të hetuar lirinë e Bossit, më shumë kishte për qëllim për të ulur zemërimin qytetar se sa që ishte shqetësuar për të vënë në vend drejtësinë, gjithsesi kjo e fundit filloi të lëviz. Gjykata kishte kërkuar nga policia që ta revokonte urdhër arrestin për Bossin por të mërkurën Kryetari i Komitetit të Pavarur të Hetimit, Vicha Mahakun, tha se urdhër arresti është i vlefshëm dhe deri në 20 gusht policia do të intervistojë dëshmitarët dhe të përpilojë një raport për të ndërmarrë hapin e fundit, rikthimin e çështjes në gjykatë.
Ç’lidhje ka Tajlanda dhe Bossi i Red Bullit më Shqipërinë dhe Edi Ramën?!
Vërtetë në Shqipëri nuk ka një njeri me një pasuri kaq të frikshme si Mbretëria Red Bull, por “bossët shqiptar” janë kopja e Vorayuth Yoovidhya. Kanë lekun dhe Kryeministrin, për policinë nuk çajnë kokën, aq më pak për gjyqësorin kur për të sot kujdeset vettingu! Vjedhin floririn në thesar dhe arrestohet një katundar i zonës; Edhe u kapet marijuana dhe kokaina me qindra tonë, por arrestohen shoferët ose rojet; Vendosin traun në autostradën e ndërtuar me paratë e popullit dhe e pagëzojnë koncesion. Këtu dhe hasin në ca kundërshtime nga fshatarët që jetojnë pranë traut por të gjithë të tjerët heshtin; Vetëm PaFrikë.al nuk mjafton të sensibilizoi një armatë të tërë të indoktrinuar nga media në shërbim të Fugës dhe një populli që pret çfarë do tu thotë Edi Rama në Facebook!
Normal, Edi Rama i bindur se nuk ka faj, nuk ndalon në Rrugën e Kombit! Kur vjen në Unazën e Re dhe u futet nëpër shtëpi thonë ç’është ky kriminel, nuk na lë të jetojmë. Pra Edi Rama nuk është kriminel kur e përbuzë dhe shtyp gjysmën e shqiptarëve me Rrugën e Kombit ama është i tillë kur prishë rehatinë e atyre që në Facebook bënin qejf ndërsa kuksianët shtypeshin me këmbët e policisë së Ish-Gjeneral Sandër Lleshajt.
Kur u rraf një deputet i Shqipërisë në Parlament, shqiptarët u ndanë në dysh me komandë. Kryetari i Parlamentit, Ilir Meta, nuk kishte turp se si po i rrihet një njeri aty ku ishte zot shtëpie, gjithçka u mbyllë me Ligjin e Dekriminalizimit por Edi Rama as nuk u skuq kur deputetët e tij me të cilët krijoi qeverinë, i rezultuan kriminel.
Pas këtij kalimi të lehtë francez, pa reagim publik, Edi Rama u përballë edhe me një dokument sekret të OSBE-së ku rezultonte se kishte 200 milionë dollarë. Më shumë u investua në tërheqjen e dokumentit nga OSBE se sa në trajtimin e opinionit publik, i cili pa u shqetësuar vazhdoi jetën në botën e Zuckerbergut; Atij i qofshim falë!
Tenderat kriminal radhiteshin çdo ditë, gomonet pushuan të transportojnë drogë dhe u rindezën avionët, por në këtë tokë shqiptare vetëm populli mbeti i fikur. Në burg përfunduan qytetarët edhe me 3 vjet heqje lirie për 8.300 lekë drita të papaguara, por jo edhe ministri i Brendshëm, Saimir Tahiri i akuzuar për organizimin e grupit të strukturuar kriminal. Mileti heshti!
U shpik dhe Reforma në Drejtësi! Shumë gjyqtar të përfolur rezultuan hajdut por atyre nuk u mor pasuria e krijuar nga paratë e popullit. Reforma e Edi Ramës u mjaftua me largimin e tyre nga sistemi i drejtësisë dhe siç duket edhe populli mjaftohet me kaq. Ndoshta pse nuk u kanë kërkuar më shumë!
Sot LSI kritikon ndarjen e Shqipërisë në rajone nga Edi Rama dhe të gjithë shikojnë me habi. Por ishte pikërisht kjo LSI e cila me Edi Ramën bëri ndarjen më kriminale territoriale, që mund ta bënte vetëm një mendje e sëmurë; Madje as një asntishqiptar nuk do kishte këto ide makabre. Dhe, atëherë opozita kishte ngritur zërin por LSI heshti ndërsa mileti po vëzhgonte se kush ka më shumë “like” në Facebook, Luli, Likja apo Edi!
Dhe të vijmë te realiteti i krijuar në vendkalimet kufitare në Kakavijë dhe Kapshticë! Radha prej 20 kilometrave ose 5.000 makinave në Kakavijë nuk është vetëm krim dhe mospërfillje nga Kryeministri Edi Rama për 4 ditë! Pasi ju dha ca ushqime dhe ujë, Rama duke respektuar faktin se “kush ka Facebook, botën ka” filloj ta bindë miletin i cili ishte në hall të madh, se fajin e ka pala greke!
A i arriti qëllimit?!
Deri më sot, po! Është po ky milet i cili kur shikonte kolona të gjata deri në 25 kilometra të turistëve kosovarë që ishin nisur drejtë bregdetit shqiptar, i bindej arsyetimit të Edi Ramës dhe sejmenëve të tij në uniformë se procedura e regjistrimit të hyrje-daljeve, për shkak të sistemit TIMS, krijon dhe vonesa ndonëse të limituara. Askush nuk ngriti zërin, as nga bregdeti ku ishin nisur jo vetëm kosovarët por edhe shqiptarët e Luginës së Preshevës dhe Maqedonisë; Prej këtyre 5.000 makinave që po qëndrojnë në Kakavijë, jo se jo. Rroftë Facebooku!
Sot pas 7 vjetësh në pushtet, ku qytetarët u mjaftuan me një status në Facebook dhe filluan pranimin luajal të Edi Ramës edhe ndër shalë nëpër shtëpitë e tyre, e çuditshme është, por, ka zgjidhje!
Askush mos të pretendoj që mund të organizoj një bojkot të tillë si në Tailandë, në rast se, larg qoftë, Gim Zeqo përplas dikë me makinë dhe shqiptarët solidarizohen dhe heqin dorë nga Red Bulli deri në zbardhjen e krimit; Jo, kjo nuk ndodhë, madje rrezik mund të shtohet konsumi i Red Bullit!
Askush mos të pretendoj që Edi Rama ashtu si Kryeministri Prayut të krijoj një Komitet i cili do të hetojë deri në fund qoftë edhe një çështje. Kjo nuk mund të ndodhë dhe u pa me hetimin e krimit elektoral dhe procedurën qesharake që filloi SPAK me qëllim të hapjes së negociatave me BE; Arsyeja e vetme është se Edi Rama nuk ka ndonjë presion publik që e lë pa gjumë, përveç ca injorantëve që e ngazëllejnë të merret me ta në Facebook.
Por, shpëtimi i vetëm nga Edi Rama ishte dhe ngelet vetë Edi Rama!
Me përbuzjen, përçmimin, poshtërimin, vjedhjen dhe zullumin e tij, kur kockat shqiptare do të fillojnë thërrmohen pas shumë thikave që u ka futur deri në kockë, Edi Rama do ti detyroj shqiptarët e ngopur me zemërim, ta largojnë nga froni.
Thonë se zullumi këputet kur trashet, gjithsesi drita po shihet në fund të tunelit. Pasi tashmë nuk ka se çfarë të vjedhë më, ka filluar të fus duart në xhepat e shqiptarëve pa dallim feje, race e krahine!
