Edi Rama nuk ndalet para asnjë krimi, Berisha: Do i bëj gjyqin publik, jo me deklarata, por me fakte konkrete

Kryetari i Partisë Demokratike, Sali Berisha u zotua sot se Kryeministrit Edi Ramës do i bëj gjyqin publik, jo me deklarata, por me fakte konkrete që dëshmojnë se ai nuk ndalet para asnjë krimi.

“Shumë ditë më parë, unë premtova se procesin e shëmtuar politik të Edi Ramës, unë do ta kthej në gjyqin publik të shekullit kundër personit, që në historinë e Shqipërisë, paraqitet njeriu më i rrezikshëm pas Enver Hoxhës.

Gjyqin publik të Edi Ramës, nuk kam ndërmend ta bazoj në epitete, se Lana do mbushej me to në qoftë se do hyjmë në atë fushë.

Kam ndërmend ta bazoj vetëm në fakte të pakundërshtueshme, në ligje dhe vendime, që japin përgjigjen më shterruese, aktit të shëmtuar politik të Edi Ramës dhe larove të tij, Kraja, Millonai, Gjoka.

Në dacibaon e tyre politike, Edi Rama me larot e tij, turpi i drejtësisë në Shqipëri dhe botë, aludojnë dhe pretendojnë se Sali Berisha, reformën programatike në sistemin e pronësisë, një reformë fondamentale për programin e PD, ligjet dhe vendimet për kët reformë, i ndërmori për të favorizuar dhëndrin e tij, që ai të mund të marrë 140 metra tokë, të trashëguar sipas të gjithë dokumentave zyrtare nga familjarët e tij, gjyshja e tij konkretisht, dhe mbi këtë bazë ndërtojnë akuzat e turpshme të favorizimit të dhëndrit dhe pasurimit të paligjshëm të tij dhe më pas të Sali Berishës.

Në krye të radhës, dua të deklaroj se ndërhyrja në ligjin e kthimit dhe kompensimit të pronave, siç do faktohet me të dhëna të pakundërshtueshme, kishte dy qëllime madhore.

Së pari, të mbronte interesin publik. Askush nuk mund të zhvaste apo të stërzhvaste pasuri publike.
Së dyti, askujt nuk mund t’i mohohej prona që u takonte dhe gjithsecilit duhet t’i njihej dhe rikthehej apo kompensohej prona e tij.

Në përputhje me këto qëllime, u bënë edhe ndryshime institucionale. Në vend të një komisioni që ecte çalë-zvarrë, u krijua me standardin modern, agjencia e kthimit dhe kompensimit të pronave.
Kjo agjenci, me një punë të admirueshme, sipas dosjeve, arriti me 53.775 vendime nga viti 2006 deri në vitin 2012, t’ju rikthejë shqiptarëve 1 miliardë e 16 milionë metër katrorë.

Përveç kësaj, t’ua kompensojë me tokë apo me para edhe 561 milionë e 400 mijë metër katrorë.
Pra, kjo agjenci, në 6 vite, me 53.775 vendime, u riktheu apo kompensoi pronarët shqiptarë me 1 miliardë e 577 milionë e 400 mijë metër katrorë.

Nga të cilat, armiku i popullit, Jamarbër Malltezi, në përputhje me të gjithë dokumentet zyrtare, ka marrë 140 metra katrorë.

A ka mendje njerëzore, përveç Edi Ramës, që mund të imagjinojë se shqiptarëve iu rikthyen në përputhje me ligjet, 1.577.400.000 metër katrorë? Cili do ishte ai që mund të imagjinonte se ligjet, se vendimet për rikthimin e 1.577.400.000 metër katror, kishin për qëllim favorizimin e njërit prej qindra e mijëra pronarëve, që kishte gjithsej në këtë shumë 140 metër katrorë trashëgimi familjare. Ky është Edi Rama,” tha Sali Berisha duke saktësuar se se “armiku i popullit”, Jamarbër Malltezi, mori 140 metra katrorë nga 1.577.400.000 metra katrorë që iu rikthyen pronarëve.

“Toka që unë përmenda më sipër, prej 1.577.400.000 metra katrorë është tokë bujqësore, është truall, është kullota, është pyje dhe e përzier.

Tani të rikthehemi pak te toka truall, e kthyer në metra katrorë.

Gjatë viteve 2006-2012, agjencia e kthimit dhe kompensimit të pronave, e krijuar me ndryshimet në ligjin për kthimin dhe kompensimin e pronave, iu riktheu shqiptarëve, 54.220.000 metër katrorë truall.

Po kjo agjenci, kompensoi pronarët edhe për 64.900.000 metër katrorë truall. I kompensoi me tokë fizike ose me para.

Pra, në total, pronarët morën nga kjo agjenci, dokumentet për 119.120.000 metër katrorë tokë.

Në këto 119 milionë dhe 120 mijë metër katrorë, janë brenda edhe 140 metër katrorë të Jamarbër Malltezit, trashëgimi me të gjithë dokumentet zyrtare nga familjarët e tij, tokë e konfiskuar 60 vite më parë nga regjimi komunist dhe e rikthyer gjatë këtyre viteve.

Prapë shtroj pyetjen: a ka mendjen njerëzore që mund të pretendojë se ligjet e pronave, se reforma e pronësisë, se ndryshimi i institucioneve u bë për të favorizuar Jamarbër Malltezin? Pra, rreth 120 milionë metër katrorë truall u kompensuan që Jamarbër Malltezi të marrë 140 metër katrorë truall.

Po, ekziston një mendje e tillë dhe kjo mendje është rrezik i madh. Ju garantoj për çdo shqiptar. Ndaj dhe unë këtu para jush kam vendosur t’i bëj gjyqin publik, jo me deklarata, por me fakte konkrete që dëshmojnë se ky zotëri nuk ndalet para asnjë krimi apo vetëposhtërimi, vetëm e vetëm që të shpëtojë lëkurën e tij.

Mos harroni se ai sot rri në burg politik, i burgosur politik, se nga 119.120.000 truall, ka marrë 140 metër katrorë të vetat, ka marrë ndërkohë në të vërtetë kjo përbën, bashkë me familjen Begeja, as 8 përqind të pronave të tyre. Por ky është hesap tjetër.

Pra, ka marrë 140 metër nga 1 miliard e 577 milionë e 400 mijë metër katrorë të kthyera.

Në dacibaon e tyre, fakt për favorizim, paraqitet zgjatja e afatit të paraqitjes së dokumenteve. Turpi i Edi Ramës dhe atyre që shkruajnë në atë mënyrë.

Para meje, afatin e kishte zgjatur Fatos Nano me dy vite. Pas kësaj zgjatje që bëra unë, afatin e kam zgjatur prapë në vitin 2008. Por për dijeninë tuaj, zgjatja e parë e afatit ka pasur pothuajse zero efekt në dosjen e familjarëve të klubit Partizani, pasi ata e kishin nisur procesin në vitin 1994 dhe e vërteta është se kthimi dërrmues u bë nga komisioni i kthimit dhe kompensimit të pronave në vitin 2006, kur shumica e anëtarëve ishin zgjedhur nga mazhoranca socialiste.

Ky është njëri aspekt. Po të marrësh marrëzitë, të cilat referohen ata për ndryshimin e ligjit të pronave, ato kanë pasur vetëm këtë qëllim, që toka të mos mund të grabitej nga shteti, por toka t’i kthehej pronarit dhe kjo ka ndodhur,” tha Kryetari i Partisë Demokratike Berisha i cili deri sa dje foli për ndryshimin e destinacionit të terrenit të klubit sportiv Partizani që bëri Edi Rama, sot ai tha se e pret një dënim me 8 deri në 12 vite burg.

“Merre si ta marrësh, por unë dje faktova para jush këtu me hartë dhe dokumente të paraqitura nga Edi Rama, se ai është autori që ka ndryshuar në mënyrë të kundraligjshme destinacionin e terrenit të klubit Partizani, nga terren sportiv, në terren urban.

Unë nuk e di çfarë fakti mund t’u paraqes tjetër, pasi me këtë fakt, Edi Rama dënohet të paktën 8 deri në 12 vite burg.

Unë nuk po bëj këtu prokurorin e narkoshtetit, unë po bëj këtu gjyqin publik.

Dhe unë mendoj se me faktet që paraqiti vetë Edi Rama, iu provova shqiptarëve se ky njeri me ndryshimin që i ka bërë destinacionit të terrenit sportiv në vitin 2006, në një kohë kur nuk ishte e pronarëve, ishte krejtësisht pronë e shtetit, atëherë kjo do të thotë se ata që kishin synim këtë pronë, e paguan apo nuk e paguan atë, nuk kemi për ta marrë vesh ndonjëherë, por Edi Rama shkeli rëndë ligjin e urbanistikës dhe me këtë ligj dënohet me të paktën 8 vite burg.

Prandaj doli te Bolino ai, nxori hartat dhe sillej e mbështillej.

Po dje, a u përpoq të fshihet për pjesën tjetër prapa ndryshimit të ligjit të sportit? E thotë vetë. Unë ua citova aty.

Çfarë doli aty? Ligji i sportit përkundrazi vetëm sa e saktësonte, kishte respektuar pronësinë e pronarëve, por kurrë ndryshimin e destinacionit.

Kurse Edi Rama me kompaninë zvicerane UrboPlan, me të cilën janë marrë dy persona, se ky Shalsi ka qenë si punë vullnetari, paskan qenë Artan Dhuli dhe ministrja Majlinda Dhuli. Këta kanë qenë dy personat e ngarkuar për planin zviceran, në të cilin Edi Rama e ka lënë zonë urbane.

A nuk janë këto dëshmi flagrante të një shkelje madhore të ligjit nga ish-kryetari i bashkisë?

Pastaj, pse nuk paskam të drejtë unë, si nuk qenka e drejtë që të deklaroj se dacibao është shkruar në zyrat e Edi Ramës, kur ai vetë del dhe citon dacibaon.

Nuk i thashë unë Edi Ramës që dil pak te Bolino e na thuaj se e bëra pas ndryshimit të ligjit për sportin. E bëri vetë atë se e ka mizën nën kësulë. Dhe doli e citoi dacibaon.

Atëherë, a dëshmon se Edi Rama është pas dacibaos.

Kurse sot, e njëjta gjë është thënë për ligjin e pronave. Po aty thotë se edhe ndryshimi i kryetarit, ishte komision dhe u bë agjenci, erdhi një pedagoge, Justina Boriçi në timonin e kësaj agjencie, e kanë marrë në pyetje njëlloj si në zyrat e Sigurimit të Shtetit.

Më fal për shprehjen, po janë edhe budallenj. Se sigurisht kryeministri nuk mund të emërojë pa u njohur me CV dhe të gjitha, një drejtor të një agjencie me rëndësi kombëtare, siç është agjencia e kthimit dhe kompensimit të pronave.

Sepse çdo i emëruar në poste të larta, nuk ndodh si me Edi Ramën, që e marrin vesh nga televizori, jo sepse do kërkosh edhe mendimin, do pranojë apo jo në radhë të parë.

Dhe këtë ata, me porosi të Edi Ramës, le që janë përpjekur me të gjitha format.

Por nuk është qëllimi, por këta përdorin si argument se është favorizuar Jamarbër Malltezi, pra për të më inkriminuar mua thonë se janë bërë ndryshime në ligjin e pronave. Unë e shpjegova pjesën kryesore, ka edhe një pjesë tjetër që do e shpjegoj në seancën tjetër të gjyqit publik kundër Edi Ramës.

Nuk ka avokat në botë që e mbron Edi Ramën. Edi Rama është tashmë i pakallur me këto që ka bërë,” tha Kryetari i Partisë Demokratike, Sali Berisha, duke përfunduar:

“Për të thënë që unë të kam favorizuar ty apo ndonjë tjetër, së pari a ke dokumente të rregullta apo jo.

Se favoret bëhen ose duke shkelur dokumentet, ose duke shkelur procedurën. Mekanizmat kryesorë.

Asnjë procedurë nuk është shkelur. Asnjë dokument. Të gjithë dokumentet janë origjinalë.”