Edi Rama përmbyti Shkodrën, Berisha: Hapja e portave, ngriti urën e Bahçallëkut me themel!
Kryetari i Partisë Demokratike, Sali Berisha, akuzoi sot Kryemnistrin Edi Rama se ishte ai që përmbyti Shkodrën duke hapur portat, dhe vërshimi ishte aq i fuqishëm sa ngriti urën e Bahçallëkut me themel.
Duek folur para Grupit Parlamentar ai tha se PD do paraqesë 23 amendamente, ku do propozohet krijimi i fondit rezervë të KESH në mënyrë që të dëmshpërblehen të përmbyturit, si dhe rritja e pagave me 25 për qind.
“Akti i tyre është kriminal dhe i papërgjegjshëm, sepse ligji i detyron që në çdo vendim që marrin për hapjen e portave, duhet të njoftojë autoritetet vendore. Dhe autoritetet vendore marrin masa që të njoftojnë popullatën. Kjo nuk ka ndodhur. Kanë hapur dy tunelet e Komanit, portat e Komanit dhe të gjitha tunelet, portat e Vaut të Dejës. Kaq i madh, kaq i fuqishëm ka qenë vërshimi, saqë ka ngritur me themel urën e Bahçallëkut. Ka marrë bazamentin e ujit. Gjysma e urës është zhdukur.
Nuk kishin parë ndonjëherë banorët dhe njeriu që i përmbyti ata, ka dy ditë që i gënjen në mënyrë të turpshme, në vend që të kërkojë ndjesë dhe të shkarkojë të gjithë zinxhirin përgjegjës për përmbytjet. Rama bën gjithçka që të mos dëmshpërblejë, por ne do i çojmë përpara ligjit. E përgëzoj zotin Spahiu për padinë. Nuk shkonte dot në Shkodër, por shkonte në Sukth për të përgëzuar Sakon për ballon e saj. Në kulmin e përmbytjeve, Sako bënte ballo për kryeministrin te Kodra e Kuajve.
E përgëzoj Mit’hat Hazbiun për atë që i tha kryeministrit. Ky u soll me tërbim dhe përfundoi në spital ai. I bërtiste qytetarit: Burg, burg, burg. Ndaj amendamenti është shumë i rëndësishëm, që të krijohet fondi rezervë. Se ligji e thotë që ai që përmbyt, ai të paguan,” tha Sali Berisha para Grupi Parlamentar ndërsa foli për 23 amendamentet që do të paraqesë PD në seancën e nesërme plenare të Parlamentit të Shqipërisë:
“Mbledhja është një mbledhje pune shumë e rëndësishme për shkak të rendit të ditës, tepër i veçantë. Janë buxheti i shtetit, për të cilin deputetët e PD-së kanë përgatitur 23 amendamente, kanë thirrur në interpelancë dhe Edi Ramën.
Amendamentet e paraqitura përbëjnë natyrisht një përmbysje reale të planifikimit dhe shpërndarjes së buxhetit, nga një buxhet për t’u vjedhur, në një buxhet në shërbim të qytetarëve, nevojave të tyre, rrogave dhe pensioneve të tyre, më të ulëtat në rajon, dhe që me këtë buxhet bëhen edhe më të ulëta siç e paraqitën ata.
Në buxhet, në amendamentet e përgatitura, janë përparësuar, pas rrogave dhe pensioneve, ku kërkohet një rritje 25 përqind e rrogave dhe pensioneve, një rritje shumë e ndjeshme e tyre, janë përparësuar buxheti për arsimin, i cili përsëri është diskriminuar, është përparësuar buxheti për shëndetësinë, janë përparësuar lëvizje dhe masa fiskale në favor të qytetarëve për të ulur përballimin e çmimeve të tmerrshme që ka sot. Do kërkohet ulja e TVSH në 6 përqind për energjinë dhe ushqimet, barazimi i TVSH-së për produktet bujqësore, heqja e akcizës së gazit, limiti i arkës, rimbursimi i të gjitha dëmeve të Covidit për bizneset.”
Risi në propozimet e Partisë Demokratike ishte krijimi i Fondit rezervë të KESH në mënyrë që të dëmshpërblehen të përmbyturit.
“Propozohet krijimi i fondit rezervë të KESH në mënyrë që dëmshpërblimi i të përmbyturve të mos jetë më çështje mundësie, por çështje detyrimi real ku KESH të detyrohet të mbajë një fond prej 15 për qind për përmbytjet që krijon në zonat ku janë të vendosura digat. Përmbytja e fundit ishte një përmbytje kryekëput e diktuar nga vjedhja qeveritare.
Nëse ka pasur një ndryshim të motit, të parashikuar me saktësi të madhe nga gjeoshkenca shqiptare dhe ajo italiane, ka qenë ndryshimi i motit të ditëve që kaluam. Por ato ndryshime moti nuk bllokuan Edi Ramën dhe Ballukun që të vazhdojnë vjedhjen me import energjie. Mbajtën të mbushur liqenin e Komanit dhe nuk prodhonin energji, hapnin portat e Komanit. Por ky është një liqen me kapacitet të kufizuar. Gjithnjë do një përkujdesje të veçantë. Ditët që mund të prodhonin energji, këta blinin energji me një çmim prej 230 euro megavati, në një kohë kur sot e shesin me 79 euro megavatin,” tha Kryetari i Partisë Demokratike duke folur dhe për amendamentet e PD ku kërkohet dëmshpërblimi i ish-të përndjekurve, anulimi i pagesave për PPT-të, përveç asaj të hemodializës, dhe rritje pagash për pedagog:
“Për pedagogët e universitetit kërkohet rritja 30 përqind e pagave. Ky kujtoi se i shtypi, por e vërteta është se universiteti po zien. Ne do mbrojmë rritjen e rrogave të tyre dhe përsëri mbetemi larg Prishtinës”. “Ne mbështesim kërkesën për dyfishimin e ndihmës ekonomike. Detyrimisht. Mbështesim kërkesën për votim elektronik në bashkinë e Durrësit dhe atë të Elbasanit. Heqja e TVSH-së për inputet bujqësore, e mbështesim plotësisht.
Pra, në tërësi janë 23 amendamente, të cilat e transformojnë buxhetin nga një buxhet për t’u vjedhur nga qeveritarët, në një buxhet për të lehtësuar dhe ndihmuar qytetarët. Është një transformim rrënjësor i buxhetit,” tha Kryetari i Partisë Demokratike, Sali Berisha, duke ju drejtuar deputetëve të PD që mbrojnë këto 23 amendamente jashtëzakonisht të rëndësishme për një fytyrë të re dhe organizim të ri të buxhetit të shtetit ndërsa përfundoi:
“Beteja është e ashpër, hajdutët që vjedhin nga mëngjesi në darkë, nuk ndalen dhe nuk ngopen!”
