Edi Rama poshtëroi pensionistët, Berisha: Ndërhyrja në pensione, emergjencë!

Edi Rama po mashtron pensionistët, gropën në fondin e sigurimeve shoqërore e ka krijuar qeveria e tij, tha sot Kryetari i Partisë Demokratike, Sali Berisha, duke u zotuar se me ardhjen e PD në pushtet, në tre muajt e parë të qeverisjes do vendoset minimumi jetik dhe 57 për qind të pensioneve që janë nën 170 euro do kalojnë në minimumin jetik 200 euro ndërsa pensionet mbi 200 euro rriten me 20 përqind.

Duke mos fsheur skepticizmin për zotimin e SPAK për zgjedhjet parlamentare të 11 majit, Kryetari i Partisë Demokratike tha sot se po të kishte ndërmend Prokuroria e Posaçme ta hetonte krimin elektoral, e prangoste Edi Ramën mbrëmë në shesh në miting.

Konferencën e përjavshme sot Kryetari i Partisë Demokratike e nisi me njërin nga problemet më të mprehta, por dhe më të dhimbshme që përjeton shoqëria shqiptare, gjendjen e pensionistëve në Shqipëri.

“Sot, pensionistët shqiptarë, të cilët 12 vite më parë merrnin pensionet më të larta se të gjitha vendet e tjera të rajonit, përfshi Rumaninë e Bullgarinë, janë katandisur me pensionet jo më të ulëta, por 2-3 herë më të ulëta se sa të vendeve të rajonit.

Qëndrimi ndaj pensionistëve shqiptare ishte një qëndrim në kufijtë e çnjerëzisë dhe poshtërimit.
Pensionistëve, të cilëve me ligj u takonte indeksimi, nuk iu është indeksuar as gjysma e inflacionit të këtyre viteve.
Por ata kanë marrë edhe një tjetër goditje të fortë. Goditja tjetër e rëndë është se një pjesë e mirë e barnave janë hequr nga lista e rimbursimit, të domosdoshme për mjekimin e tyre të përditshëm.
Së fundmi, qindra mijëra pensionistë kanë pasur një mbështetje nga fëmijët e tyre, familjarët e tyre jashtë vendit. Remitancat kanë pësuar një zhvlerësim në masën 35-40 përqind.
Edi Rama ka ndjekur një politikë cinike dhe mashtrimi ndaj pensionistëve.
Pasi iu mbajti kompensimin e 6 muajve të vitit të kaluar për t’ua paraqitur si bonus në dhjetor, ai ndau për buxhetin e shtetit të vitit 2025 gjithsej 16 milionë për indeksimin e tyre.
E vërteta është që 16 milionë nuk indeksojnë më shumë se 40 përqind të inflacionit vjetor të këtyre qytetarëve.
Edi Rama ndërmori një fushatë mashtrimesh të paskrupullta ndaj pensionistëve. I tillë ishte mashtrimi se për pensionet e tyre të ulëta, fajet i kanë biznesmenët.
Gropën më të madhe në fondin e Sigurimeve shoqërore e krijon administrata shtetërore. Pra, në qoftë se fondi i sigurimeve shoqërore ka një gropë të zezë të madhe, kjo gropë është krijuar se ministria e Financave nuk u paguan sigurimet shoqërore që duhet të kalojnë paralel me rrogën që marrin në fondin e sigurimeve shoqërore. Janë mbi 100 milionë euro detyrime ndaj këtij fondi, të cilat nuk i ka shlyer Edi Rama.
Po kështu debitorë të mëdhenj në fondin e sigurimeve shoqërore janë qeveritë vendore socialiste.
Pra, janë këto që fundosin fondin e pensioneve dhe bëjnë të pamundur rritjen e pensioneve nga ky fond,” tha Sali Berisha ndërsa u zotua se brenda 3 muajve të qeverisjes së Partisë Demokratike do rriten me 20 për qind pensionet mbi 200 euro dhe do vendoset minimumi jetik.

“PD ka deklaruar dhe deklaron se ndërhyrjen në pensionet e shqiptarëve e konsideron një emergjencë.
Dhe se kjo ndërhyrje do bëhet 3 muajt e parë të qeverisjes.
Tre muajt e parë të qeverisjes do vendoset minimumi jetik. Kjo nënkupton që 57 përqind të pensioneve, të cilat janë pensione jo të plota, por të pjesshme dhe si të tilla nënkuptohet janë nën 170 euro, që të gjitha kalojnë në minimumin jetik 200 euro. Pra, pësojnë një rritje nga 20 gjer në 70 për qind si pensione.
Pensionet mbi 200 euro rriten me 20 përqind.
Kështu që kjo ndërhyrje do bëhet me paratë e buxhetit të shtetit. Do merren paratë nga buxheti i shtetit, do transferohen në fondin e pensioneve. Do shlyhet buxheti që buxhetorët kanë ndaj pensionistëve.
Nuk ka gjë më të turpshme në botë, punonjësit e buxhetit nuk paguajnë sigurime shoqërore. Kjo nuk ndodh kund në botë, përveçse në shtetin e mafies që është Shqipëria. Se kjo duhej të ishte automatike. Ky është një zbulim i ri skandaloz që tejkalon imagjinatën. Merr fund.
Nuk merr qytetar shqiptar rrogë në shtet pa kaluar automatikisht, krahas firmës që firmos për rrogën, të tjerët në sigurimet shoqërore të pensionistëve.
Por, përveç kësaj, do kalojnë në fondin e pensioneve nga buxheti i shtetit i gjithë shuma e domosdoshme për të realizuar këto premtime. Për të realizuar pra minimumin jetik 200 euro dhe rritjen me 20 përqind të pensioneve të tjera mbi 200 euro.”

Sot, tha lideri i opozitës, Edi Rama po blen vota me bonusin elektoral!

“Edi Rama po spekulon në kundërshtim me ligjin, në kundërshtim me kodin elektoral, me Kushtetutën, me bonusin elektoral të pensionistëve.
Ky është një akt i turpshëm, një akt i cili synon të blejë vota në fushatë, që nuk e bën asnjë shtetar në botë përveç narkodiktatorit Edi Rama. Ai e bën këtë.
Me këtë rast, unë siguroj pensionistët se përveç rritjes së pensioneve që njoftova, çdo pensionist do pajiset me kartën e konsumatorit me të cilën ai do marrë 450 euro në vit dhe nuk do jetë bonus siç e quan Edi Rama, por do jetë rikthim i TVSH-së që ata paguajnë për çdo gjë që blejnë në jetën e tyre, duke filluar nga ilaçet, ushqimi, buka dhe çdo gjë tjetër,” tha Kryetari i Partisë Demokratike duke garantuar se kjo do bëhet kjo sepse nuk mund të tolerohet më tutje ky hendek i tmerrshëm që po e copëton shoqërinë shqiptare.

“Në këto përmasa është tmerrësisht i frikshëm. Ndaj do jepen, fillimi do jetë karta e konsumatorit me 450 euro për çdo qytetar që merr minimumin jetik, për çdo pensionist dhe çdo rrogëulët.
Nuk mjaftojnë këto. Jo! Do të ulet çmimi i energjisë në 7 lekë për kilovat nga 85 që e sollën këta.
Dhe do proporcionohen të gjitha qiratë e banesave sociale në përputhje me rrogën,” tha Berisha duke konstatuar:

“Një rrogëtar me rrogë 700 mijë lekë, paguan 62 mijë lekë qira në banesë sociale. Një pension me pension 130 euro, paguan 62 euro për qira në ndërtesë sociale. Kjo merr fund. gjithçka do proporcionohet.
Në qoftë se pensioni është 4 herë më i ulët se rroga, 4 herë më e ulët do jetë pagesa e qirasë së tij.
Nuk mund të trajtohen njerëzit si kavie laboratori. Jo!”

Lidhur me hetimin e krimit elektoral për të cilin u zotua SPAK, Kryetari i Partisë Demokratike, Sali Berisha, duke mos feshur skepticizmin tha se po të kishte ndërmend Skapi të hetonte krimin elektoral, e prangoste Edi Ramën mbrëmë në shesh në miting

“Pika e parë, në qoftë se vërtet Skap e ka ndërmend të hetojë krimin elektoral, Edi Ramës duhej t’i vinte prangat në shesh me mitingun elektoral që organizoi mbrëmë.
Unë nuk mund të besoj në shpallje të një organi që fle mbi dosje të tmerrshme të krimit elektoral, evidente, zyrtare, të mbledhura në përputhje me procedurën ligjore provat dhe faktet.
Por, po qe se Spak pretendon se do ta dënojë, ja ku e ka Edi Ramën, mitingu i mbrëmshëm ishte shkelja më e rëndë e ligjit elektoral që ka ndodhur.
Përdor administratën në bllok, e nxjerr në shesh se kështu po më sulmojnë familjen, po më sulmojnë gruan, po më sulmojnë Erion Veliajn.
I gjithë fjalimi ishte një avokati e dëshpëruar sikur qytetarët shqiptarë kanë halle se çfarë po thonë gazetat, portalet apo kundërshtarët politikë për Edi Ramën dhe familjen e tij. Se ky ishte problemi i qytetarëve…
Dhe ky ishte fjalimi se shyqyr që e regjistruan se ishte një sallatë fjalësh pa vlerë. Një njeri i dëshpëruar, një njeri i cili e sheh që toka po shket me shpejtësi nën këmbë.
Në fakt ky është termi më i drejtë.
Po i shket me shpejtësi toka nën këmbë.
Nuk foli një fjalë për Mynihun. Nuk tha një fjalë të vetme.
Shkoi në Munich, do kishte takim, tha. Asnjë takim me dinjitarët e lartë amerikanë. Asnjë ftesë. Asnjë foto.
Mirëpo kjo e poshtëroi keq edhe tek të vetët. Se tani kanë filluar edhe të vetët t’i largohen, të tremben prej tij.
Plus asnjë fjalë për superskandalin me USAID, në një kohë kur bashkëshortja dhe ish-bashkëshortja janë dy kokat kryesore të skandalit.
Po ma përmendin, thotë, po thuaj, trego sa janë marrë. Del Çuçi dhe Delina e thonë se nuk kemi marrë asnjë qindarkë. Po 10 milionë i ke me kontratë.
Drejtësi për të gjithë programi, pasuri për elitën e korruptuar të ekstremit të majtë në Shqipëri.
Pra, nuk flet për këto. Flet nëse ishte gardëroba kështu, nuk kam përgjegjësi, bën një sallatë fjalësh, se unë kur u ktheva nga Parisi për vakinë e babait, përpiqet të kapë momente emocionale të mbulojë skandalet, vjedhjet e tij.
Po çfarë gjynah ka ai, po të ketë gjynah ai, nuk lë të sëmurët të vdesin në spitale. Po të ketë gjynah ai, nuk vdiqën 20 mijë nga Kovidi dhe atë e bën ministre, në vend që ta çojë në burg. E ka një taktikë ai që bën këto për të ngjallur keqardhje.”