Edi Rama SPAK-un apo SPAK-u Edi Ramën
nga Agim Popoci
“Asnjë ëndërrimtar politik kurrë nuk ka qenë mjaftueshëm i egër që të mendoj mbi rrëzimin e linjave që ndajnë Shtetet dhe bashkimin e popullit amerikan në një masë të përbashkët.” Shumë kohë më parë e ka thënë i madhi John Marshall, që njihet si themeluesi i Gjykatës së Lartë në SHBA, kryetar i së cilës ishte plotë 31 vjet, postulat që do ti shërbente shumë Kryeministrit Edi Rama para se ta merrte pushtetin në vitin 2013!
Por, sot, është vonë, shumë vonë! Dhe, këtë ai e vulosi në Kongresin e PS të shtunën, pasi kishte shkelur për 8 vjet linjat fetare e krahinore, partiake e ekonomike, shkeli dhe ato të krimit duke u munduar të na bindë se do ta marrë edhe Drejtësinë me Reformën që do të zbatoj!
Që nga dita e parë e fillimit të Reformës në Drejtësi shumë shqiptarë mund të kenë dëgjuar teori nga më të ndryshmet nëse pula e bëri vezën apo veza e bëri pulën, por askush nuk e ka vënë në dyshim se Edi Rama e bëri SPAK-un! Aq më shumë, kur në krye të këtij institucioni të ri u vu një prokuror i komunizmit duke u munduar ti bind shqiptarët se për 30 vjet tranzicion nuk kishte lindur një jurist që mund ta bëjë dhe prokurorin e mirë, aq më pak kreun e Prokruorisë së Posaçme për të cilën trumbetohej shumë se do ta luftoj Krimin dhe Korrupsionin.
Dhe, Arben Kraja, si një prokuror komunist, bëri atë që dinte të bënte, nënshtrimin ndaj shefit!
Jo se këshillohej nga një kroate që kishte arrestuar Ish-Kryeministrin e Kroacisë, por të gjithë e paragjykuan Arben Krajën se ishte vënë nga Edi Rama për të arrestuar Ish-Kryeministrin e Shqipërisë! Jo Leka Meksin, Fatos Nanon apo Ilir Metën, por Sali Berishën. Ishte malok, nuk ishte pak për një ëndërrimtar politik si Edi Rama!
Çuditërisht Arben Kraja nuk i vuri prangat Sali Berishës! Edi Rama heshti por nga ana tjetër kaloi shumë linja, u bë me raste edhe katolik, kur i duhej tension akuzonte malokët, oligarkët “i bleu” dhe sot i shërbejnë më mirë se Berishës të cilin e akuzonte partia e tij kriminale, shkërmoqi Partinë Demokratike me ndihmën e politikanit më të paaftë në historinë e Shqipërisë, Lulzim Basha, krimin e vuri nën kontroll uar edhe pse u thurën shumë legjenda dhe drejtësinë që e kishte krijuar vetë, normalisht, e ka edhe sot në grusht!
Pra, edhe sot tre ditë pas Kongresit të PS kur Edi Rama akuzoi SPAK-un dhe një tufë “analistësh” janë gjuajtur në ofensivë propagandistike për të na bindur se SPAK-u është i pamëshirshëm ndaj politikanëve të së majtës!
Pse Edi Rama ishte aq shumë i acaruar gjatë fjalës së tij në Kongresin e PS të shtunën e 9 Prillit nuk dihet me siguri, por sot pas 8 vjetësh në pushtet askush nuk mund të çuditet pse nuk u arrestua Sali Berisha. Janë gërmuar mijëra dokumente, janë marrë disa nga ministrat e Berishës në pyetje edhe pa SPAK-un, por gjithçka ngeli në nivelin e akuzës politike edhe pse nuk u mor për bazë “përgjegjësia individuale”.
Përveç prokurorit të komunizmit, Arben Kraja, nuk bëri punë as diplomacia amerikane që i dha dorë me shpalljen e Sali Berishës NON GRATA, ndërkohë që Edi Rama po zihej duke shikuar SPAK-un që nuk bezdiset nga liria që gëzon Dr.Berisha!
Gjithsesi, ndër socialistë klima ishte ndryshe sepse po shikonin korrupsionin në radhët e qeverisë së Edi Ramës që po lulëzonte me hapa galopant, dhe rastin e Saimir Tahirit që tregonte se prangat i vihen vetëm atij që thotë shefi!
Dhe jo vetëm kaq! Përgjimet e BILD treguan se ndonëse shqiptarët e dëgjuan me zë se kush janë ata që vjedhin votat ose i blejnë ato, madje në rastet e ministrave të Ramës nuk mungoi as mburrja, ishte Kryeministri Edi Rama që përcaktoi lirinë me vulën e SPAK-ut!
Rasti me patronazhistët ishte edhe më i frikshëm si për sjelljen e SPAK-ut ashtu dhe Kryeministrit që sot është i acaruar. Kur SPAK-u hetoi median që publikoi veprën kriminale të patronazhistëve dhe jo vendin nga kishin dalë ato të dhëna, Edi Rama nuk gërthiste mbi SPAK-un por mburrej me këta kriminelë që menaxhojnë të dhënat sensitive të qytetarëve.
Por kur SPAK bëri një arrestim “të gabuar” dhe iu desh të ngjitet drejtë majave të piramidës shtetërore me projektin korruptiv të inceneratorëve, Edi Rama shpërtheu në Kongres kundër SPAK-ut; Jo pse mëhalla socialiste dhe rivalët e saj filluan të gëlojnë me prangat në duart e Arben Ahmetajt dhe Erion Veliajt, por sepse po konfirmohet roli i Engjëll Agaçit në gjithë këtë dramë.
Nëse këtij epilogu i shtojmë dhe hingëllimën e Sali Berishës duke ardhur në krye të opozitës me ripërsëritjen e denoncimit për “Don Agaçion”, është e qartë se Kongres të ri të PS nuk do të shohim ama afresku i Arbën Krajës në tempullin e drejtësisë së re shqiptare me autor Edi Ramën, nuk është larg mendsh!
Pse nuk e ka përfillur këtë fakt vetë Arben Kraja, ëndërrimtari Edi Rama nuk i ka faj! E nëse kreu i SPAK e arsyeton me faktin se nga mund ta dinte ai se çfarë lloj ëndërrimtari është Edi Rama, kjo e konfirmon se cili mund të jetë fati i një njeriu me formim komunist, qoftë ai edhe në krye të një institucioni si SPAK; Ndryshe, këtë lloj ëndërrimtari shumë kohë më parë e ka përkufizuar autori i romanit të famshëm “The Hitchhiker’s Guide to the Galaxy”, Douglas Adams:
“Ishte ëndërrimtar, mendimtar, filozof spekulativ… ose, siç do ta thoshte bashkëshortja e tij, idiot.”
