Edi Rama Tungjatjeta!

nga Agim Popoci

Pasi protesta e Opozitës së Bashkuar dëshmoi se radhët e opozitës janë duke u shtuar me kërkesën e tyre për zgjedhjet e lira e të ndershme, kryeministri Edi Rama e mprehi shpatën edhe një herë për situatën.

Filloi me arrestimet e të gjithë atyre që nuk patën frikë ti thonë në sy liderit global se janë kundër politikave të tij kriminale që po zbrazin dita-ditës, gjithnjë e më shumë vendin tonë.

Arrestimi i kryetarit të Partisë Demokratike Dega Fier, Luan Baçi, nuk ishte rastësi edhe pas protestës madhështore të Opozitës së Bashkuar, sepse ishte pikërisht qyteti i Fierit, i cili ditë më parë i dha goditjen e madhe Edi Ramës. As administrata në gatishmëri të kryeministrit nuk arriti të shkëlqej nga protestat që organizuan demokratët në qarkun e Fierit, dhe, me këtë arrestim ai i bëri me dije demokratëve dhe jo vetëm, se kjo është shpata që u rin tek koka, gjithë armiqve që ka bota!

Ndonëse Ish-deputeti Luan Baçi në mungesë të provave u la lirë, ai vazhdoi me arrestimet si në Fier ashtu edhe Tiranë, ku nuk u kursye as Sekretari i Përgjithshëm i PD, Gazment Bardhi, lideri i opozitës, Lulzim Basha, i bëri të qartë Edi Ramës se asnjë arrestim dhe procedim penal nuk e ndal Partinë Demokratike dhe qytetarët për të përmbushur misionin për Shqipërinë si gjithë Europa: “Përdorimi i militantëve dhe ushtarëve të krimit në Polici për të goditur qytetarët dhe kundërshtarin politik është tipari më i qartë i këtij regjimi kriminal: Edi Rama ka ardhur në pushtet me ndihmën e bandave dhe ka zgjedhur të jetë me bandat kundër popullit.”

Por Edi Rama vazhdoi represaliet e tij dhe u kujtua se kishte harruar të arrestoj edhe protestuesit tek Unaza e Re që janë prekur nga projekti Unaza e Madhe, aty ku opozita denoncoi edhe projektin korruptiv prej 100 milionë euro.  

Dhe derisa kryeministri vazhdoi me arrestimet, duke mos respektuar dhe përvojat në historitë e diktatorëve, është ironike po aq sa e frikshme, por meritat më të mëdha pse sheshet shqiptare mbushen përplot në çdo protestë qytetare të thirrur nga Opozita e Bashkuara i takojnë Edi Ramës.

Pra, është pikërisht Edi Rama ai i cili e ngriti lartë zanin shipes, me politikën e tij kriminale. Dhe, sot, gjithë këtë popull në dritë e qiti! Nuk ja ka më kush frikën, as me polici dhe ushtri, as me Ish-Gjeneral Sandër Lleshajn dhe Lali Erin, të cilëve ylli kyq vazhdon dhe u shndërrin mbi maja!      

Sot, në kulmin e krizës të cilën vetëm Edi Rama nuk e sheh dhe vazhdon me politikën e tij kriminale, në Bruksel ra daullja dhe zyrnaja. Komisioni i BE për Punët e Jashtme, AFET, dhe Liritë Civile, Drejtësisë dhe Punët e Brendshme, LIBE, e bënë të qartë se Shqipëria si shtet që dëshiron ti bashkohet Bashkimit Evropian është larg arritjes së kritereve madje ka shënuar dhe kthim mbrapa. Dhe, atë që me muaj e thotë Opozita e Bashkuar ndërkohë Edi Rama vazhdon e përsërit se por si nuse është bërë Shqipëria, dhe mburret se flamurtare i prin rilindja, sot Brukseli zyrtar e tha me zë dhe figurë, se Shqipëria nuk ka një Gjykatë Kushtetuese funksionale, dhe jo rastësisht! Kjo ka rezultuar në situata ku ligje antikushtetuese, nga të cilat përfiton qeveria janë miratuar pa pasur mundësi për ankimim, në dëm të vendit dhe sundimit të ligjit. Dhe, jo vetëm kaq!

Sot, Brukseli zyrtar tha se prania e sundimit të ligjit duhet të jetë një element kyç për të vendosur, nëse një vend pranohet në BE ndërkohë që shqiptarët vazhdojnë e përsërisin që ky duhet të jetë element kyç që ai të pranohet dhe nga ata vetë në mënyrë që të jenë të lirë të jetojnë në atdheun e tyre. Këtë e bëri të qartë dhe kryetari i Partisë Demokratike, Lulzim Basha, duke theksuar se protestat do të vazhdojnë dhe do të fuqizohen nga dita në ditë, nga java në javë, deri sa të realizohet ajo që do çdo shqiptar: “Zgjedhje të lira e të ndershme, një qeveri nga populli, për popullin dhe të popullit.”

Edi Rama Tungjatjeta!