Edi Rama u mek nga MEK!

nga Agim Popoci

Ndryshe nga 4 milionë shqiptarë të cilëve Kryeministri Edi Rama për dhjetë vjetë u mohoi lirinë e shprehjes dhe të menduarit, lirinë e lëvizjes dhe të drejtat në lirinë e privuar, të drejtën e mirëushqyerit dhe frymëmarrjes, mbi 4 mijë muxhahedinë të opozitës iraniane, MEK, të vendosur në kampin ASHRAF në Manzë, nuk e lejuan këtë lloj trajtimi nga kryeministri shqiptar!

Duke mos mohuar ekzistimin e ndonjë të infiltruari në mesin e 4.158 të strehuarve në kampin e Manzës, duke mos mohuar as keqbërësit kibernetikë iranianë që mund të jenë vendosur në mesin e këtyre muxhahedinëve, as SPAK, as GJKKO e aq më pak policia e Edi Ramës mund të kenë drejtën e keqtrajtimit të mijëra njerëzve, qofshin këta dhe muxhahedinë iranianë, sepse në mesin e tyre janë 70 terroristë kibernetik që i bënë dëm sistemit të të dhënave të qytetarëve shqiptarë!

Edi Rama u tallë dhe me 500 mijë opozitarë shqiptarë më 14 Maj duke ju dhënë leksione ligjore me pedagog Ilir Rusmalin, se kush quhet Kryetar dhe kush Kryetar Nënkryetar, kush quhet votë e vlefshme dhe kush jo, dhe kush janë ata që do të jenë kryetarë të bashkive edhe për katër vitet e ardhshme, por, këtë se bënë dot me 4 mijë opozitarë iranianë!

Jo se nuk respektojnë ligjin, siç po mundohet ta paraqes makineria propagandistike e Fugës, por ndryshe nga opozita shqiptare, opozitarët iranianë i bënë të qartë Edi Ramës se i janë mirënjohës që trajtohen si qytetarë të këtij shteti, por, nuk lejojnë të trajtohen si çdo keqbërës kibernetikë me metodat e shtetit ligjor të Kryeministrit të Shqipërisë; Dhe, në asnjë mënyrë, të jenë të barabartë si qytetarët shqiptarë kur protestojnë!

Pse Edi Rama i vdes në dru dhe i asfikson me gaz lotsjellës opozitarët shqiptarë deri sa të shtrihen në bregun e Lanës ndërsa Lulzim Basha duartroket e buzëqeshë, fajtorë nuk janë opozitarët iranianë!

Pse kjo përplasje në mes të muxhahedinëve dhe policisë shqiptare përfundoi me një epilog fatal, ku humbën jetën 1 opozitar iranian dhe 36 mbetën të plagosur, për këtë vetëm pjesëtarët e MEK nuk janë fajtorë!  

Pse personat me rrezikshmëri të lartë kërkohen brenda një kampi, siç është ky në Manëz, MEK mund të jetë shkaku por jo dhe pasoja e vrasjes së një njeriu nga policia shqiptare, vetëm pse proteston ndaj sjelljes së dhunshme policore; Kur provat kërkohen nga një polici, çdo lloj rezistence qytetare që mund të lind, nuk mund të luftohet me dhunë të shfrenuar deri në vdekjen e atyre që protestojnë!    

Pse guxojnë të sfidojnë dhunën policore shqiptare të Edi Ramës, vetëm opozitarët iranianë nuk janë fajtorë; Sepse, janë po këta guximtarë që sfidojnë dhe regjimin e egër iranian i cili nuk i kërcënon me ligjet e Edi Ramës, por, me varje në litar!

Pse është e tillë kjo opozitë iraniane, ka dinjitet dhe respekt për veten e vet, gëzon dhe mbështetjen e Shteteve të Bashkuara!

Pse sundon në këtë mënyrë Edi Rama dhe lejohet ta shkel me këmbë opozitën e cila më nuk ka dinjitet as për veten e vetë, dhe aq më pak është krenare pse është shqiptare, gëzon mbështetjen vetëm të George Soros, e tashmë dhe trashëgimtarit, Alex!   

Kjo është dhe arsyeja pse sot Kryeministri Edi Rama u mek nga MEK-u!

Edi Rama nuk e kupton se çfarë është krenaria e një qytetari që mendon ndryshe nga ai sepse e ka krijuar idenë se e ka zotëruar duke e shkelur me këmbë. Dhe, lëre që nuk e kupton, por as nuk lexon, ndryshe do të kuptonte pse qindra të rinj u mblodhën para zyrës së tij për të protestuar për qëndrimet e tij antikosovare dhe proserbe, dhe, pse njëri ndër autorët e Deklaratës së Pavarësisë së SHBA, Benjamin Franklin, e ka thënë shumë kohë më parë:    

“Ndoshta nuk ka pasion njerëzor më të vështirë për t’u zotëruar sesa krenaria. Fshihe, lufto, mbyte, mpije sa të duash, ajo është përsëri gjallë dhe herë pas here do të nxjerrë  kokën e do të shfaqet; do ta shihni, shpesh në histori. Sepse edhe nëse mund ta imagjinoja se e kisha zotëruar plotësisht, ndoshta do të krenohesha për modestinë dhe përulësinë time.”