Edi Rama, urgjent një statujë!
nga Agim Popoci
Skandali McGonigal dhe publikimi aktakuzës kundër tij, protesta e opozitës para Kryeministrisë mesditën e së shtunës, ca të pakënaqur me fundin e vakët të protestës, gara që shpërtheu ndër asqerët e Lulzim Bashës për të ngadhënjyer mbi bollinot qeveritar, si dhe sjellja e Edi Ramës me përfundimin e kësaj proteste, Kryeministrit të Shqipërisë i lë shteg për një zgjidhje të vetme dhe të domosdoshme për protagonistët e gjithë kësaj situate të krijuar: Ngritja e një statuje të Edi Ramës!
Jo pse e bëri poçarin ndërsa po zhvillohej protesta e opozitës dhe një skulptor servil po i fliste mbi kokë se çfarë ide gjeniale që ka, jo pse sot realisht është vetë diktator dhe vetë disident në këtë vend të përmbytur në gjak nga Enver Hoxha ku po rriten mutacione të frikshme me dishepull krimi, por, për të shpëtuar opozitën, shoqërinë dhe veten, pse, jo!
Me përfundimin e protestës, u pa se nevojë e domosdoshme është statuja e Edi Ramës në sheshin kryesor, sepse gjithë ajo pjesë e opozitës që llapi në emër të Lulzim Bashës, ishte bashkë me ata që ishin kundër regjimit komunist të Enver Hoxhës, vetëm kur kishin statujë për të tërhequr zvarrë!
Sot, kur diktatori është gjallë, ata nuk afrohen dot, bëjnë obstruksione për çfarëdo lloj proteste që bënë opozita duke marrë si sebep prezencën e Sali Berishës dhe teserën e tij komuniste, por, jo! Mungon statuja! Dhe, në mungesë të statujës për ta tërhequr zvarrë, i bashkohen korit të bollinove me ose pa lekë, për ti thënë miletit se sa komunist që është Saliu!
Madje, kjo ndodhë edhe sot, kur u konfirmua se Edi Rama bleu FBI-në për të hetuar opozitën, se nuk është Gjykata e Apelit por Edi Rama që mbanë varur vendimin për Statutin e PD, kur Rama mohon fjalën e lirë edhe në Parlament; Dhe, sot, kur Edi Rama kontrollon ujin, ajrin dhe tokën.
Statujë edhe për opozitën reale, që mos të turpërohen dhe mos të japin leksione demokracie kur dikush kërkon të shporret diktatori nga faqja e dheut, se si hajduti do largohet me votë! S’kanë pse të jenë të pakënaqur, le ta marrin statujën dhe ta tërheqin zvarrë për kokërr të qejfit, pse duhet të shqetësohet për këtë gjë diktatori! Pse nuk ka Neritan Cekën që t’iu humb rrugën në oborr?! Jo, kjo më s’ka kuptim, jo pse nuk ka Bllok, por, sepse gjithçka të madhe e të vlefshme që të sheh syri në Shqipëri, është e bijve dhe bijave të nomenklaturës komuniste!
Diktatori duhet ta ketë të qartë se gjurmët e protestës së fundit nuk janë as zhgarravina të revolucionit, siç i cilësoi, por, mungesë e një statuje për ta zhgarravitur; Mungesë, ndryshe nuk do të kishte dush regjimi që do ti lante gjithë ato pisllëqe që ka bërë Edi Rama nga viti 2000 deri më sot!
Një statujë, poçar, urgjent, jo vetëm për tu mëshiruar ndaj këtij mileti që nuk ka më as gjak shqiptari në vena sepse ndryshe do të tërhiqte ty zvarrë!
Me këtë rast, do të shpëtosh edhe vetë ti Kryeministër pavarësisht se kush e bënë statujën, Edi Rama apo ai skulptori servil që dhe deltinën e mbanë siç i thotë Partia!
Dhe, pavarësisht pse diktatori është gjallë, kjo nuk i ka penguar dhe nuk i pengon kujt në këtë vend pa Zot!
Në fund, duhet ta kesh të qartë o shoku Diktator se me vënien e statujës nuk do të përfitojnë as bollinot, as asqerët e Llullit dhe Kunatit, më shumë se ti! Ti do shpëtosh sepse shqiptarët do ta tërheqin statujën tënde zvarrë deri sa të lodhen!
Paqe dhe selam, usta poçar, edhe nëse statuja bëhet njëzet e pesë copë, s’ke pse shanë keq turqisht ose shqip, dhe nuk ke arsye të ligështohesh.
Nxirre Lali Erin në bulevard për ti prerë gjobat të gjithë atyre që morën dhe këtë guxim për ta tërhequr statujën zvarrë, e me modelin e kërpudhës futi sërish një tender gjigand për ndërtimin e një statuje që do ta kenë zili edhe Kadri Morina me Qet Kastratin, si investitor të njohur të statujave që ti ke porositë, nga Argjentina e deri në Komunën e Parisit të Tiranës!
Për t’u çmend nuk ka se kush të çmendet, as mysliman e as i krishterë, sepse po të ishte ky milet që çmendet nga një diktator, do kishte ikë me kohë Enver Hoxha, e për ty as që bëhet fjalë, por ikën ata vetë!
Kështu, që, urgjentisht, vendose statujën, mos e çajë kokën dhe mos pyet fare Fugën, sepse ata janë gati të të thonë:
Më shaj, për besë, prapë!
