Edi Rama vazhdon dhe mburret me borxhin 650 mln euro, akuzon opozitën dhe…

Kryeministri Edi Rama doli sot para mediave i shoqëruar nga Ministrja e Financave Anila Denaj dhe ministri për Rindërtimin Arben Ahmetaj për të folur për daljen e Shqipërisë në tregjet e kapitali dhe eurobondin 650 mln euro me të cilin vazhdon dhe mburret, por rezultoi se kishte dhe për qëllim të përqesh opozitën. Ish-Deputetes Jorida Tabaku nuk iu përgjigj për çështjet që ajo ngriti, por me lojëra fjalësh “balonë tabake, balonë tahuke” u foli gazetarëve të ekonomisë që kishte përballë edhe pse nuk ishin ata analistët lolo që e sollën në pushtet dhe sot i tërheq zvarrë.

Për ata që kanë ngelur pa kulm mbi kokë nga tërmeti i 26 Nëntorit nuk tha asgjë ashtu si dhe ata që për bukën e gojës vuajnë pas pandemisë së koronavirusit, ama u foli për eurobondin.

“Ky eurobond garanton planin e ri kombëtar, Shqipëria 2030 që adreson një zhvillim të mëtejshëm ekonomik dhe social duke adresuar rindërtimin dhe rimëkëmbjen pasi Shqipëria del nga dy goditje njëra pas tjetrës. Si dhe ambicien tonë për një shtysë të ekonomisë dhe punësimit vitet e ardhshme. Sapo ne të jemi gati në javët në vijim me planin e ri kombëtar do të kemi një event të veçantë. Prezantimi i tij siç e ka bërë me dije ministri i shtetit nuk do jetë një program zhvillimi në letër, aq më pak një strategji në një dokument që duhet përkthyer nga masa por do të jetë një plan veprimi i kalendarizuar në afat shkurtër, afatmesëm dhe afatgjatë. Ajo që ka ndodhur dje me Shqipërinë që doli në tregun e kapitaleve, është ajo që ndodh me çdo vend që merr vlerësimin e situatës. Është me rëndësi të nënvizohet, merr vlerësimin lidhur me riskun. Më vjen keq që ky lajm i jashtëzakonshëm nuk ka marrë vëmendjen e duhur por më vjen dhe më keq që për atë pjesë të vëmendjes që i ka kushtuar opozita ka vazhduar një avaz që nuk i shkon fare. Nuk bëhet fjalë për qeverinë por për shtetin dhe popullin megjithëse nuk diskutohet që është mëritë e kësaj qeverie që dalim në tregjet e kapitalit pas dy goditjeve. Ne kemi dalë me një prim zero dhe nga ana tjetër më vjen keq që flitet në mënyrë të ngjashme në fluturimin e atyre balonave tabakë pa bisht.”

Por Edi Rama edhe kur nuk flet, flet për opozitën, kështu ndodhi edhe në këtë rast kur nuk kishte përgjigje por përbuzje po:

“Nuk e di e keni parasysh kur kemi qenë fëmijë dhe luanim me balona, bishti ishte element i rëndësishëm. Balonat tabakë ishin më bindëse se balonat tahuke, kur s’kishim bisht nuk fluturonim dot. Ne kemi marrë një konfirmim nga tregjet që në radhë të parë na shikon si vend të besueshëm në raport me institucionet financiare dhe në radhë të dytë na jep mundësinë të zgjerojmë bazën tonë të financimit e investimit. Është një bazë që konsolidon planin tonë kombëtar Shqipëria 2030.

Kur vendi del në tregjet e kapitaleve është në një proces të hapur ku synimet jo gjithmonë përputhen me kërkesën e tregjeve. Atyre që thonë hë mo se borxh morët, ju kujtoj që çdo njeri që hyn në një sistem bankar nuk mjafton të duash të marrësh borxh por duhet të gjesh dhe ata që të japin borxh dhe duhet të kenë besim. Është vlerësim për librin e llogarive të vendit,” tha kryeministri Edi Rama e për të bindur elektoratin sepse gazetarët që kishte përballë e kishin të qartë se bëhet fjalë për një gropë, ai lexoi më tej mesazhin e konsulentit të Shqipërisë.

“Dua t’ju lexoj mesazhin që kam marrë me kënaqësi nga drejtuesi i bankës Rothschild që ishte konsulenti ynë dua ta ndaj me ju për kënaqësinë e përbashkët jo për të shtuar lëvdatat e merituara për qeverinë por për kënaqësinë e përbashkët në një moment kaq të rëndësishëm për ekonominë: “I dashur kryeministër kemi mbyllur bashkë me kolegët emisionin e eurobondit, 650 mln për 7 vjet me 3.5% interes”, tha më tej Rama.

Sërish iu kthye opozitës duke theksuar se disa politikanëve iu ka rënë për hise që të mbulojnë ekonominë edhe pse vetë s’u bë as politikan dhe as piktor për çfarë është arsimuar.

“Sot është dita për të buzëqeshur sot. Dhe me kolegët tanë opozitarë që janë të mirëkuptuar, pasi janë jashtë institucioneve dhe rrugëve të procedura dhe proceseve. Memoria ka një vlerë por nuk të mban gjallë kur je jashtë kontaktit me realitetin. Shqipëria është i pari vend i tregjeve emergjente që arrin të dalë me një prim zero nga një emision i ri vendesh. Është një sukses i jashtëzakonshëm duke marrë në konsideratë tregun e vendeve sot, sa i takon cilësisë së librit. Libri përfaqësonte në momentin e fundit 3.1 mld. Pra 8.4 herë se sa nevoja e vendit. Dolëm me një objektiv dhe na u ofrua 4.8 herë më shumë. Po si mund t’i ofrohet një kredimarrësi me rrisk?! Mund t’i ofrohen, pasi kredimarrësi është i besueshëm ne librin e llogarive të parë dhe jo nga libri i analistëve politike që merren me ekonominë, apo dhe politikanëve që iu ka rënë për hise që të mbulojnë ekonominë. Nuk besoj se këto janë krahasimet më të mira për t’u bërë, por meqë ka hyrë në modë krahasimi, kjo ka thjesht këtë vlerë. Në rast se Shqipëria nuk do të kishte këtë tregues makro-ekonomik, do ta kishim goditur në vlerësimin e tregjeve.”

Kur një gazetare mori guximin ta pyes Kryeministrin pasi ai tha se eurobondi do të përdoret për fushën e rimëkëmbjes se ku konkretisht ku do të përdoret, në rrugë, rritje të pagave, vërtetë doli një ditë për të buzëqeshur:

“Një gazetare e re ekonomie dhe një piktor i vjetër sa unë besoj njësoj marrim vesh nga ekonomia. Eurobondi është një investim i tregjeve kapitale mbi tregun tonë. Falë rezultatit, kemi fituar kredibilitet. Plani ynë është i qartë. Nuk është eurobondi që financon shkollat a spitalet, por eurobondi financon projektet e Shqipërisë.”

Kryeministri Edi Rama mohoi se do të ketë amnisti fiskale për funksionarë e politikanë por tha se është një temë tjetër nëse janë ish-funksionarë të shtetit para 10 viteve apo në vitet ’90.

“Funksionarët janë tërësisht të përjashtuar nga amnistia. Nuk bëhet fjalë për këtë. Politikanët nuk përjashtohen. Gjithkush që ka pasur një mandat qeverisës nuk mund të jetë pjesë e amnistisë. Natyrisht nëse bëhet fjalë për persona që 10 vjet më para kanë punuar në shtet është temë tjetër por në kuptimin e funksionarëve që janë në institucione nuk përjashtohen. Nëse ka punuar në shtet në vitet ’90 dhe pastaj është marrë me punë private është pjesë tjetër. Asnjë që është marrë me politikë, që ka qenë gjykatës, prokuror nuk mund të amnistohet,” tha Kryeministri Rama duke mohuar edhe faktin se tatim-fitimit dhe e TVSH-së është korrigjim i politikave fiskale por deklaroi se kanë ndryshuar shumë gjëra, që nga situata ashtu edhe forca e qeverisë.

“Nuk është një korrigjim i atyre që kemi bërë më parë por nuk jemi në të njëjtën kohë si më parë dhe nuk jemi po ata që ishim më parë. E them këtë jo se është mëkat të ndryshosh mendim. Çurçill thotë që vetëm budallenjtë nuk ndryshojnë mendim. Por tani jemi në kohë tjetër. Janë të gjithë gjërat që kanë ndryshuar, ka ndryshuar dhe forca jonë. Jemi më të fortë se 2-3 vite më parë. Eurobondi na ka dhënë një frymëmarrje të madhe dhe na jep mundësi të shikojmë planin kombëtar pa rezerva. Gjithë puna jonë ishte ja të presim eurobondin. Ne nuk duam një plan Shqipëria 2030 dhe të themi fillon në 2025. Jo, ky plan fillon tani.”

Dhe sot kur ata që ngelën pa kulm mbi kokë për shkak të tërmetit të 26 Nëntorit dhe ata që janë me stomak bosh për shkak të COVID-19 vazhdojnë të jenë të mashtruar, Edi Rama vazhdon të jetë i bindur se është në krye të mazhorancës me paketën më të zgjeruar sociale në krahasim me të shkuarën.

“Jemi mazhoranca që kemi paketën më të zgjeruar sociale në krahasim me të shkuarën por me atje ku duam të shkojmë është e pamjaftueshme. Kemi mësuar gjëra të rëndësishme nga periudha e mbylljes. Një nga gjërat që kemi mësuar se sa shumë mund të bëjmë dhe si mund ta bëjmë të strukturuar në fushën e arsimit marrëdhënien dixhitale. Si mund të zgjidhim klasat kolektive. Mund të mblidhen për aktivitete në klasa kolektive por mësimin mund ta marrin në mënyrë dixhitale nga mësuesit më të mirë”, deklaroi Rama.