Edi Rama zgjohu, Kosova s’është Serbi!
nga Agim Popoci
Mbanë takim me Kryeministrat e vendeve të Ballkanit Perëndimor për përgatitjen e Samitit të Procesit të Berlinit në Tiranë pa asnjë berlinez, vazhdon dhe e tërheq zvarrë Komisionerin për Fqinjësi dhe Zgjerim të BE, Oliver Varheyli, ndonëse nuk ka lidhje fare me këtë proces, dhe, nuk e pranon në këtë takim Zv/kryeministrin e Kosovës, Besnik Bislimi, meqë Albin Kurti ishte në Simpoziumin SIMY në Greqi, me arsyetimin se niveli i tij është dytësor dhe jo i përshtatshëm, dhe se dosja e takimit do t’i dërgohet me postë të sigurt zyrës së Kryeministrit.
Këndëvështrim ky i çuditshëm i Kryeministrit Edi Rama, nuk shkon as në takimin e dy qeverive ku pritej të firmoseshin 13 marrëveshje, dhe pasi e sheh se jo vetëm Albin Kurti ndihet i përbuzur në Kosovë, i firmos ato marrëveshje dhe i nis si idiot, me postë!
Ndërsa, sot, në këtë takim pa lidhje, ku asgjë nuk mund të koordinohet kur nuk janë pjesëtarët e vetë Procesit të Berlinit, njeriu që i ka deleguar firmën Zv/Kryeministrit për pjesën më të madhe të kontratave më të rëndësishme, nuk pranon Zv/Kryeministrin e Albin Kurtit dhe sërish i kthehet postës, duke theksuar se dosja e takimit të sotëm do t’i dërgohet me postë të sigurt Qeverisë së Kosovës, përkatësisht zyrës së Kryeministrit.
Pa u përgjigjur në pyetjen se pse duhet shpenzohen gjithë ato salltanete për mbledhjen e dy qeverive kur gjithçka mund të realizohet me postë, dhe pse ky takim i sotëm për diskutim dhe koordinim për të hartuar kërkesa të përbashkëta, për t’i paraqitur në Samitin e Tetorit, kur sërish e gjitha mund të realizohet me postë, përgjigjen e Kryeministrit Edi Rama e shohim në buzëqeshjen sapo takoi Kryeministren e Serbisë, Ana Brnabiç!
Ndonëse është i ndërgjegjshëm që Brnabiçin nuk e pyet njeri në Serbi aq sa e pyet Bajram Begajn në Shqipëri, përderisa President është Aleksandar Vuçiç përkatësisht Kryeministër Edi Rama, ai i dha aq shumë rëndësi sot në Tiranë, Kryeministres së Serbisë, sa u la të kuptohet se Ramës nuk i duhet Albin Kurti kur Brnabiç është aty!
Po, sot, Kryeministri Edi Rama kishte një mesazh të qartë, si për Albin Kurtin, Besnik Bislimin dhe kosovarët, pikërisht ashtu siç e thotë me zë, si shefi i tij i Ballkanit të Hapur, Aleksandar Vuçiç, ashtu dhe noterja e tij Ana Brnabiç: Kosova është Serbi!
Por, një gjë harroi Edi Rama, pavarësisht edukatës familjare që ka dhe ideologjisë partiake e cila e mëson për Kosovën!
Për dallim nga paraardhësi i tij, Kryeministri Fatos Nano, i cili donte ta pranonte ujin, ajrin dhe tokën e Kosovës të unifikuar me Serbinë, vetëm për të nënshkruar marrëveshje për mostaksim të dyfisht me Serbinë duke shkelur mbi tokën e përgjakur të Kosovës, sot Kosova është shtet i pavarur dhe asnjë projekt me Beogradin nuk mund të negociohet pa prezencën e Prishtinës zyrtare, pavarësisht daljes në det që Aleksandar Vuçiç e ka me nxitim!
Autostrada e Paqes që bashkon Serbinë me Rrugën e Kombit është projekt që është menduar të financohet nga Procesi i Berlinit ashtu si dhe hekurudha Nish-Prishtinë-Durrës, por kjo nuk ka të bëjë me ëndrrat e Edi Ramës dhe Partisë së tij Komuniste, që nuk po bëhen dot socialistë!
Askush në Kosovë nuk po i thotë Edi Ramës të zgjohet, mund të vazhdojë të jetojë me ëndrra jugosllave aq më shumë tani që edhe kanabisin do ta legalizoj! Por, më 16 Tetor, kur pritet të mbahet takimi i Procesit të Berlinit në Tiranë dhe Albin Kurti do jetë aty, liderët e BE të ngopur me maskarada ballkanike do ti tregojnë këtij deliranti që bënë edhe shefin e shqiptarëve, jo me fjalë por me vepra, se Kosova ka dhe do të ketë Kryeministër që i del zot, pavarësisht se për cilin projekt bëhet fjalë!
Sepse, thjeshtë: Kosova s’është Serbi
