EDS në Tiranë/ Misioni im, Basha: Shqipëria europiane të qeveriset nga rinia!
Kryetari i Partisë Demokratike, Lulzim Basha, para 300 pjesëtarëve të organizatës studentore të Partisë Popullore Europiane, EDS, tha se misioni i tij dhe lidershipit aktual të PD, është të shtrojë rrugën që Shqipëria europiane të qeveriset dhe të jetë në duart e rinisë shqiptare.
“Me respektin më të thellë dhe shpresën më të madhe për energjinë, vizionin dhe kurajon e studentëve shqiptarë, dua të deklaroj fare hapur: misioni im, misioni i lidershipit aktual të PD, është të shtrojë rrugën që Shqipëria europiane të qeveriset dhe të jetë në duart e rinisë shqiptare. Na ndihmoni në këtë mision, sepse rruga është plot sfida, por e vetmja që na çdo drejt Europës.”
Duke folur për “Sfidat e studentëve në rrugën europiane të Shqipërisë”, Lulzim Basha sqaroi se pse Arsimi i Lartë është prioritet i PD:
“Ne do t’i japim fund kësaj gjendjeje, jo thjesht e vetëm se jemi partia që e krijuan studentët, se pa rininë shqiptare të mirëarsimuar, nuk mund të ketë Shqipëri europiane, ndaj prioriteti i PD është arsimi i lartë, për të cilin do të dyfishojmë buxhetin dhe do të bëjmë të mundur që asnjë i ri të mos mbetet pa studiuar për shkak të vështirësive ekonomike.
Do të zerojmë tarifën për “Bachelor” dhe “master” për 90% të studentëve që vijnë nga familje me të ardhura nën 640 mijë lekë të vjetra në muaj, do ta financojmë direkt nga buxheti dhe do ta përgjysmojmë për pjesën tjetër që vjen nga familje më të ardhura mbi 640 mijë. Do të përdorim çdo vit mbi 30 milionë dollarë për rinovimin e shpejtë të infrastrukturës së studentëve, laboratorë, konvikte,” tha lideri i opozitës para studentëve të EDS duke dhënë dhe arsyet e misionit të tij:
Në fund, kryetari i Partisë Demokratike sqaroi pse kjo nuk është thjeshtë një betejë për pushtet dhe pse nesër duhet të jemi të gjithë bashkë në Protestën e Madhe:
“Nuk është një betejë për pushtet, por për Europën dhe vlerat që na bashkojnë. Vetëm me zgjedhje të lira dhe të ndershme shkohet në Europë. Përballë në këtë betejë kemi një kupolë të rrezikshme politikanësh të korruptuar dhe të lidhur me krimin. Për këtë jemi nesër të gjithë bashkë, në protestën e së shtunës.”
