Edvin, kjo rruga nën ballkon është rruga e shpresës, Berisha: Studentë, koha të ngriheni, mbushni sheshet

Duke iu përgjigj deklaratave të sotme të Kryeministrit Edi Rama, Kryetari i Partisë Demokratike, Sali Berisha, e sqaroj nga protesta para shtëpisë së tij se “rruga nën ballkon” është rruga e shpresës, rruga e njerëzve guximtarë, rruga e fitores ndërsa u bëri thirrje studentëve të dalin në protesta dhe të mbushin sheshet.

“Sot më shumë se kurrë, pas 32 viteve, koha, Shqipëria kërkon fjalën e gjeneratës së re. Kërkon guximin e kësaj gjenerate, kërkon vizionin e kësaj gjenerate, kërkon fuqinë e saj. Në qoftë se 32 vite më parë, një gjeneratë të rinjsh u përball me një guxim epik me diktaturën komuniste dhe e zvarriti atë rrugëve të Tiranës, nuk duhet të harrojmë se e keqja ndër vite, e keqja këto 10 vitet e fundit, mori përsëri, lëshoi shtat dhe mori formë tjetër.

Studente dhe studentë, koha u thërret sot më shumë se kurrë, të ngriheni, të lini auditoret, të mbushni rruget dhe sheshet sepse universitetet tuaja po nuk u ngritët ju sot, pas 10 vitesh nuk do kenë më studentë,” tha Kryetari i Partisë Demokratike, Sali Berisha, duke shtuar se kurrë ndonjëherë, një rend, një sistem, një regjim nuk ka shkatërruar vendin dhe të ardhmen siç e shkatërroi Edi Rama në këto vite ndërsa përfundoi me një mesazh për Kryeministrin:

“Edvin, rruga e Surrelit është rruga e turpit, është rruga e vjedhjes, është rruga e drogës, është rruga e mashtrimit, është rruga e dështimit.

Rruga nën ballkon është rruga e fitores, është rruga e shpresës, është rruga e besimit, është rruga e shqiptarëve, është rruga e fitores.

Rroftë Shqipëria!”

Fjala e plotë:

Ju falënderoj nga zemra për praninë tuaj, ju përshëndes përzemërsisht ju dhe oratorët e mrekullueshëm për fjalët e tyre.

Por më lejoni t’i dërgoj një mesazh nga rruga nën ballkon Edvin Kristaq Ramës.

Edvin, kjo rruga nën ballkon është rruga e shpresës.

Kjo rruga nën ballkon është rruga e njerëzve të lirë.

Kjo rruga nën ballkon është rruga e njerëzve guximtarë.

Në të vërtetë, kjo është rruga e lirisë.

Por rruga e Surrelit është rruga drejt Pëllumb Gjokës, drejt McGonigalit, drejt Bajrëve, drejt Gjushit tënd.

Edvin, rruga e Surrelit është rruga e turpit, rruga e vjedhjeve, rruga e krimit, rruga pa të ardhme, rroga qorr, rruga pa fund.

Dëgjova me shumë kënaqësi fjalimet e të rinjve, e profesorëve, jam jashtëzakonisht i prekur dhe frymëzuar.

Sot më shumë se kurrë, pas 32 viteve, koha, Shqipëria kërkon fjalën e gjeneratës së re.

Kërkon guximin e kësaj gjenerate, kërkon vizionin e kësaj gjenerate, kërkon fuqinë e saj.

Në qoftë se 32 vite më parë, një gjeneratë të rinjsh u përball me një guxim epik me diktaturën komuniste dhe e zvarriti atë rrugëve të Tiranës, nuk duhet të harrojmë se e keqja ndër vite, e keqja këto 10 vitet e fundit, mori përsëri, lëshoi shtat dhe mori formë tjetër.

Përsëri kjo e keqe bëri që të gjitha pushtetet të përqendrohen, të grabiten, të mblidhen në duart e një personi.

Përsëri kjo e keqe bëri që opozita të shndërrohet në një fiktivitet.

Por kjo e keqe, miqtë e mi, të mos harrojmë kurrë se kohërat kurrë nuk do e harrojnë.

Kjo e keqe u soll me rininë shqiptarë si e keqja më e madhe, si pushtuesi më i egër që kjo rini ka njohur në të gjitha kohërat.

Ju lutem shumë, djemve dhe vajzave të reja, gjeni dhe lexoni promemorien e armikut doktrinar më të keq të kombit shqiptar, Vaso Çubrilloviç. Lexoni se si ky armik i qenies sonë parashtronte platformën e zbrazjes së Shqipërisë, platformën e shuarjes së kombit shqiptar duke dëbuar shqiptarët nga Shqipëria.

Çubrilloviçi frymëzoi regjimet nacionaliste serbe jugosllave për të përzënë qindra mijëra shqiptarë nga trojet e tyre.

Por, më shumë se Çubrilloviçi, më shumë se Pashiqi, më shumë se çdo regjim, shqiptarët i përzuri nga vatrat e tyre e keqja që quhet Edi Rama.

Sot, në 8 vite, Shqipëria përlotet, Shqipëria vajton mbi 500 mijë të rinj shqiptarë të cilët u larguan nga vendi i tyre, të cilët braktisën klasat e tyre, braktisën familjet e tyre. Morën rrugët e botës vetëm e vetëm se një e keqë që përqendroi çdo pushtet në duart e tij, vriste si një kuçedër, shpresën e tyre.

Vriste shpresën në çdo skaj, në çdo shkollë, në çdo unviersitet, në çdo qendër pune dhe kudo.

A nuk mjafton kjo që të shpallim Edi Ramën si armikun më të egër të qenies shqiptare?

A nuk mjafton kjo që të shpallim Edi Ramën si të keqen më të madhe kombëtare?

Atëherë, përballë kësaj, a nuk i takon të rinjve shqiptarë, nderi, detyra, misioni të ngrihen si luanë kundër kësaj të keqe për të shpëtuar veten, për të shpëtuar këtë vend që ai po e shkatërron me një program më shkatërrimtar se çdo pushtues tjetër.

Të dashur miq, të dashur gjimnazistë, të dashur studentë, të dashur pedagogë dhe mësues.

Çdo ditë që kalon, ne pakësohemi. Ne çdo ditë, nënshtrimi na poshtëron gjithnjë e më shumë.

Sot, më shumë se gjysma e atyre që mbarojnë gjimnazet janë përjashtuar nga mesatarja për të hyrë në universitete.

Ata nuk kanë alternativë tjetër përveçse të largohen nga Shqipëria.

Sot, shkollat, gjimnazet, kanë bërë jo përpara, por kanë pësuar rënien më të madhe se në çdo vend tjetër të botës në 8 vitet e kësaj të keqe që quhet Edi Rama.

A nuk përbën për ju të dashur mësues dhe mësuese,  të dashur gjimnazistë dhe gjimnazistë, një kambanë alarmi, rënia në pikiatë e cilësisë së arsimit tonë në 8 vite?

Studente dhe studentë, koha u thërret sot më shumë se kurrë, të ngriheni, të lini auditoret, të mbushni rruget dhe sheshet sepse universitetet tuaja po nuk u ngritët ju sot, pas 10 vitesh nuk do kenë më studentë.

Sepse pedagogët tuaj do largohen një nga një dhe vendin e tyre do e zënë trafikantët, kriminelët, militantët dhe injorantët.

Kurrë ndonjëherë, një rend, një sistem, një regjim nuk ka shkatërruar vendin dhe të ardhmen siç e shkatërroi Edi Rama në këto vite.

Ka ndry me çelësa regjistrimin e popullatës, sepse i del 1.5 milionë njerëz.

Miqtë e mi, demokracia në Shqipëria nuk ka qenë e lehtë, ndonjë traditë nuk trashëguam të madhe, por ama me përkushtim, me besim te ardhmja, me përgjegjësi, ia dolëm që të punojmë fort për një Shqipëri anëtare të NATO-s, për një Shqipëri në të cilën shqiptarët lëvizin të lirë, për një Shqipëri në të cilën rrogëtarët, punonjësit paguheshin më mirë se vendet e tjera të rajonit.

Për një Shqipëri, në të cilën vërtet shpenzoheshin 1 miliard, por ndërtohej Rruga e Kombit.

Për një Shqipëri që u bë epiqendër e çështjes kombëtare, u shpall pavarësia e Kosovës. Me një Shqipëri në të cilën popullata rritej nga viti në viti.

Të gjitha këto po i rikujtoj këtu, vetëm për të bindur të rinjtë se Shqipëria bëhet, se Shqipëria është toka e Zotit, se Shqipëria është një nga vendet me pasuritë më përrallore, se Shqipëria nuk pret asgjë tjetër vetëm ëndrrat tuaja për t’u ngritur aty ku e meriton.

Por çfarë ndodhi këto 8 vite? Si ka mundësi që 1.1 milion shqiptarë ikën nga Shqipëria? Si ka mundësi që zbritëm më të keqpaguarit në rajon? Si ka mundësi që shpenzohen 1 miliard dhe nuk ndërtohet asgjë?

Si ka mundësi që mbyllen portet shekullore për të ndërtuar parajsat e Edi Ramës dhe banditëve të tij? Si ka mundësi që mashtrohemi dhe mashtrohemi? Ëndrra evropiane është bërë horizont që nuk kapet.

Kujtoni pak për një moment, vetëm dy muaj më parë, kur ju tha shqiptarëve se në dhjetor do keni një lajm të madh.

Cili ishte lajmi? Lajmi ishte mbyllja, moshapja e negociatave për kapitujt, sepse Edi Rama shkelmon opozitën, shkelmon Kushtetutën. Sepse Edi Rama nuk njeh ligj, nuk njeh moral, nuk njeh Kushtetutë përveç ambicieve të pushtetit të tij.

Të rinj dhe të reja.

Historia jonë ka qenë e dhimbshme, shumë e dhimbshme.

Por përsëri komb fatlum në kuptimin që jetuam në perandorira lindore shekuj e shekuj, po përsëri u zgjuam në vokacionin tonë perëndimor.

I them këto fjalë për të mos pasur asnjë iluzion se e ardhmja e vetme e shkëlqyer e Shqipërisë dhe shqiptarëve është Bashkimi Europian.

Por ju e patë Edi Ramën në Bruksel, kloun dhe vetëm kloun. Turp dhe vetëm turp.

U kthye nga Brukseli dhe në një akt cinik ndaj shqiptarëve, njësoj si në vitin 2017, festoi hapjen e negociatave.

Miqtë e mi, a do e durojmë ne më shumë këtë njeri?

Sot ishte në Lezhë. Qeverinë e tij e kryesoi aty Arben Ndoka. Kishte ftuar edhe Bajrët dhe bandat e tjera të veriut sepse veriu, ky armik i egër i tij, e do vetëm për banditët dhe bandat e tij.

Shkoi në Lezhë në një kohë kur nga Fushë Kruja, në të katër anët, investimet që janë bërë në 10 vite, janë dy herë më të pakëta se ato që janë vjedhur në inceneratorin e Tiranës, i cili nuk ka asnjë objekt të ndërtuar.

Shkoi në Lezhë, foli për portin, mashtron dhe vetëm mashtron. NATO nuk përzihet kurrë në aferat korruptive të Pashiqit shqiptar, Edi Ramës.

Pra, çfarë po ndodh me ne?

Ne nuk votojmë se votën na e numëron Edi Rama.

Shqiptarët paguajnë taksa, taksat ua vjedh Edi Rama me ministrat tij.

Shqiptarët kërkojnë të drejtat, të drejtat u cungohen në gjykatat e Edi Ramës.

E vetmja alternativë për ta është të largohen.

Jo miq, duhet të largojmë Edi Ramën, të shpëtojmë Shqipërinë, të shpëtojmë veten tonë, të rivendosim pluralizmin.

Kjo betejë, kjo rrugë po e tmerron atë çdo ditë.

Dëgjoni dhe shikoni hajdutët që kanë frikë të tmerrshme sepse nga mëngjesi deri në darkë, gromësijnë vjedhjet e tyre.

Dëgjoni çfarë thonë, po flet, po shkel rregullat Sali Berisha, po shkel vendimet Sali Berisha.

Më lejoni t’u them këtu, or budallenj, unë jam Sali Berisha.

Dhe dëgjoni këtu t’u them se Sali Berisha ka një Kushtetutë të vendit, të cilën e ka respektuar me rigorozitetin më të madh sepse ajo është Kushtetutë demokratike.

Por krahas saj, kushdo që e shkel atë, Sali Berisha ka një Kushtetutë të dytë, të cilën nuk ia shkel dot njeri mbi tokë përveç Zotit dhe kjo është ndërgjegjja e tij.

Mjerë ai që mendon dhe beson se mund t’i shkelmojë Sali Berishës, Kushtetutën supreme, Kushtetutën e ndërgjegjes së tij.

Ndaj dhe i them edhe njëherë, Edvin, rruga e Surrelit është rruga e turpit, është rruga e vjedhjes, është rruga e drogës, është rruga e mashtrimit, është rruga e dështimit.

Rruga nën ballkon është rruga e fitores, është rruga e shpresës, është rruga e besimit, është rruga e shqiptarëve, është rruga e fitores.

Rrofshi ju,

Rroftë fitorja,

Rroftë Shqipëria!