Edward Joseph: Njohja e pasaportës nga Spanja, hapë perspektivë për Kosovën
Pasaporta lëshohet vetëm nga shtetet dhe Spanja e ka njohur atë, ajo nuk e njeh vetëm shtetësinë e Kosovës, ka sqaruar Profesori amerikan në Universitetin Johns Hopkins në Washington, Edward Joseph, duke vlerësuar se ky vendim Spanjës hapë perspektivë të re për Kosovën në proceset integruese.
Duke e vlerësuar të rëndësishëm njohjen e pasaportës së Kosovës nga shteti spanjoll, njohësi i mirë i rrethanave në Ballkan, Profesor Edward Joseph sqaron se Spanja është shtet i cili nuk e ka njohur dhe ka qëndrim më të rreptë me Kosovën nga pesë shtetet e BE-së që vazhdojnë të mos e njohin.
“Spanja mund të përdorë të njëjtën procedurë për anëtarësimin e Kosovës në BE dhe NATO, dhe kjo do të thotë që Serbia nuk mund të bëjë asgjë. Por, Kosova duhet të bëjë hapa përpara. Hapi i parë është ndryshimi i situatës në veri, duke mbajtur zgjedhje të reja,” tha Profesori amerikan ndërsa foli edhe për njohjen e targave RKS nga Serbia.
“Kjo nuk është dhuratë nga Beogradi, por serbët e Kosovës e kanë kuptuar së targat janë të nevojshme,” tha Joseph duke sugjeruar që Kosova duhet t’i dëgjoj partnerët ndërkombëtar dhe sa më shpejt t’i mbajë zgjedhjet e reja lokale në katër komunat në veri.
“Kosova ka përgjegjësit e veta. Kryeministri Kurti i ka përgjegjësit e tij për tensione në Kosovë. Thirrja ime e vazhdueshme ka qenë që Kosova të jetë e kundërta e Aleksandar Vuçiçit dhe të bëjë përpjekje maksimale që t’i përafroj serbët e Kosovës. E kjo ka të bëjë me zgjedhjet e reja në veri, që serbët të kthehen në institucionet e Kosovës dhe në Policinë e Kosovës,” tha Edward Joseph duke e konsideruar gabim të Kryeministrit Albin Kurti pse nuk i ka dëgjuar Shtetet e Bashkuara, Ambasadorin Hanovier, NATO-n, Mbretërinë e Bashkuar dhe miqtë e tjerë, të cilët i kanë kërkuar që të mos i dërgoj kryetarët e komunave në veri.
Në fund, Profesori amerikan në Universitetin Johns Hopkins në Washington, Edward Joseph, e konsideron gabim edhe qëndrimin e Shteteve të Bashkuara ndaj Serbisë dhe qasjen e butë ndaj Vuçiçit.
“SHBA në thelb projekton frikë nga Beogradi, të cilën presidenti Vuçiç e interpreton saktë dhe e shfrytëzon. E gjitha kjo shkon natyrisht në dobi të aleatit të tij, që është Rusia,” tha Joseph duke shtuar se Presidenti Biden e kupton mirë Ballkanin, por administrata e tij ka dështuar ndërkohë e cilëson Presidentin serb Vuçiç si lider klasik autokrat që përpiqet të marr gjithë kontrollin duke e margjinalizuar opozitën ndërsa është i bindur se zgjedhjet në Serbi ishin të parregullta.
