Efektet anësore të ilaçit “Antishpifje”

“Asnjë ministër dhe asnjë deputet i Partisë Socialiste nuk do të tolerojë më asnjë shpifje. Çdo shpifje të hedhur në drejtimin tonë nga kazani politik e mediatik, a qoftë edhe nga kazani i profileve zyrtare digjitale, ne do ta padisim në gjykatë. Boll me përgënjeshtrime, boll me kundërpërgjigje, boll me debate televizive të sajuara për t’u bërë jehonë shpifjeve apo për të fituar audiencë e me zhurmën e fabrikës së baltës. Boll me këtë neveri që po helmon Shqipërinë dhe po rrënon çdo gur themeli të edukatës e mirësjelljes qytetare, që çdo familje e ndërton përditë me aq mund e durim për fëmijët e vet. Çdo shpifje në gjyq.”

Kështu e ka menduar kryeministri Edi Rama ilaçin kundër shpifjes! I madh e i vogël u çuan për ta kritikuar këtë nismë idiote të kryeministrit, pa e vënë para pasqyrës së Qeverisë dhe vetë Edi Ramës se çfarë mund të ndodhë nëse fillon jetësimi i tij.

Si çdo ilaç madje edhe vetë “Glybera”, që është ilaçi më i shtrenjtë në botë prej miliona eurove, ka efektet anësore. Këtë nuk e ka menduar kryeministri i cili është mësuar me sëpatë në dorë ti zgjidhë gjërat, e kur të ndodhë gjëma të tërhiqet.

Mirë deputetët dhe  ministrat rilindas do të reagojnë, por çfarë do të ndodhë kur të reagon çdo qytetar i Shqipërisë ndaj këtyre deputetëve dhe ministrave.

Çfarë do të thotë, psh. ky ilaçi “Antishpifje” për Elisa Spiropalin kur thotë: “Shqipërinë që ideoi ky burri këtu, Skënderbeu, mund ta bëjë vetëm një njeri, Edi Rama.” Kanë kaluar shumë ditë nga kjo thënie historike por Shqipëria nuk u bë siç e ideoi ai burri, ose më sakt, Spiropali shpifi.

Në Akademinë verore të FRESSH, ministrja e Mbrojtjes, Olta Xhaçka tha se:

“Edi Rama, është i vetmi kryetar partie që sfidohet,” dhe  “Vetëm PS ka debat të brendshëm dhe kolegjialitet.” Dy shpifje në 20 sekonda dhe dy seanca gjyqësore që mund të zgjasin me vite

Xhaçka mburrej në korrikun e këtij viti me kryeministrin e saj se si “Në seancën e sotme plenare të Samitit të NATO, Presidenti Trump përshëndeti posaçërisht Kryeministrin e Shqipërisë për fjalën e tij në darkën e mbrëmshme të liderëve të Aleancës”, ku Rama tha se Shqipëria vlerësohet shumë pozitivisht për kontributin e saj në programin e Aleancës, rritjen e buxhetit të mbrojtjes…

Këtë përshëndetje vetëm ministrja jonë e Mbrojtjes e ka dëgjuar dhe më e rëndë është mburrja që ajo bënë me kryeministrin e saj edhe kur ai shpif me rritjen e buxhetit të Mbrojtjes!

Ministri i Financave, Arben Ahmetaj është shfajësuar deri më sot nga opinioni për broçkullat që thotë duke u quajtur i paditur, por ilaçi “Antishpifje” mund ta irritoj inteligjencën e ndonjë vrojtuesi të shifrave. Nuk është e njëjta gjë kur ai thotë se gjatë mandatit të parë janë hapur 230 mijë vende pune dhe kryeministri Rama nxjerrë grafikun ku thuhet se “maj 2013- maj 2017” janë punësuar 208.146.

Ministri i Financave thekson pas zgjedhjeve të fundit për televizionin ARD se shkak i pjesëmarrjes së ulët në votime ishte vapa dhe festsa e Bajramit. Shpif dy herë! Zgjedhjet përgjithësisht janë mbajtur në qershor, në temperatura edhe më ekstreme dhe zgjedhjet e vitit 2017 kishin pjesëmarrjen më të ulët në zgjedhjet pluraliste. Pra, vetëm vapa nuk mund të jetë shkaktare. Bajrami! Kjo është arsyeja më idiote që mund të dalë nga goja e një shqiptari pa të meta mendore, sepse zgjedhjet janë zhvilluar edhe në Ramazan dhe pjesëmarrje kaq e ulët nuk ishte shënuar.

Ministrja e Kulturës, Mirela Kumbaro, të mos e akuzojmë për Teatrin sepse duhet të marrë kredi për të paguar për gjithë ato shpifje që ka bërë, e që në shumicën e rasteve me patjetër është shefi i saj dhe kryeministrin ynë fajtorë. Le ta marrim Bibliotekën Kombëtare. U premtuan hapësira të reja që nga ditët e para të ardhjes në pushtet, në fund të vitit 2015, më 20 dhjetor, me rastin e 95 vjetorit të Bibliotekës Kombëtare, Drejtoresha Asllani, Ministrja Kumbaro dhe Kryeministri Rama përsëritën premtimin për rikonstruktimin dhe marrjen e hapësirave, sikur procesi të mos kishte filluar asnjëherë.

“Unë kam një ëndërr, për një bibliotekë të përtërirë, dinjitoze, jo vetëm për mënyrën si funksionon në informacionin dhe pasurinë që i ofron kulturës kombëtare, por dinjitoze dhe në hapësirat e veta, në mjediset e punës dhe të leximit,” u shpreh znj. Asllani ndërsa Edi Rama, duke i dhuruar Bibliotekës albumin e tij të skicave, deklaroi:

“Ne do të bëjmë për Bibliotekën Kombëtare sa nuk është bërë për 25 vite të marra së bashku. Ne jemi plotësisht të angazhuar në këtë proces dhe do t’ia rikthejmë Bibliotekës pjesën e trupit të saj të amputuar nga barbaria e kulturës së tranzicionit.” Shumë shpifje për asgjë…

Ministri më i çuditshëm për 25 vite të marra së bashku, Fatmir Xhafaj. Duke pasur vëllain trafikant ndërkombëtar droge me vendim gjykate, pranon këtë detyrë të ndjeshme, në shtetin më të kanabizuar në Evropë, duke detyruar kryeministrin të shpif më shumë se sa flet. Të marrim si shembull fjalimin e tij të 5 Gushtit 2016:

“Saliu e ka ndërmarrë fushatën e tij të ndyrë të radhës këtë herë, për të baltosur Fatmir Xhafajn! Dhe në stilin e tij të vjetër e të neveritshëm bolshevik, ka ngritur një akuzë mbi një histori të sajuar këmbë e krye, për të vëllain e Fatmirit. Një histori me drogë venezuelane, për baban e dy fëmijëve që është në punën e tij të ndershme dhe ka vetëm një faj: Është vëllai i njeriut që drejton Komisionin e Posaçëm Parlamentar për reformën më të rëndësishme dhe më të vështirë të 25 vjetëve të fundit!” Dhe jo vetëm kaq!

Ky njeriu që drejtonte Komisionin e Posaçëm Parlamentar për reformën më të rëndësishme dhe më të vështirë të 25 vjetëve të fundit, u gradua ministër i Brendshëm ndërsa fushata e Saliut rezultoi e vërtetë sepse i baltosuri Fatmir Xhafaj e çoi vetë me dorën e tij, vëllain e tij që ishte baba i dy fëmijëve dhe në punën e tij të ndershme, prapa hekurave italiane. Dhe, pa ju futur historisë së shpifjeve të panumërta Xhafaj-Rama për këtë trafikant ndërkombëtar të drogës duhet përmendur vetëm qershinë mbi tortë të avokatisë së këtij trafikanti ndërkombëtarë të drogës:

“Nëse do të kishte diçka të vërtetë për Fatmir Xhafën, do të kishte folur miku ynë i shtrenjtë dhe i pranishëm në mjedisin tonë, ambasadori i SHBA-së Donald Lu. Do të kishte një deklaratë nga BE, por nuk ka,” tha kryeministri që mori përgjigje me shpejtësi nga ambasadori amerikan Donald Lu:

“Rama të flasë në emrin e tij, jo në emrin tonë!”

Shpifjet në mbrojtje të Saimir Tahirit po i harrojmë jo pse edhe ky është baba i një fëmije por meqë ilaçi nuk është konsumuar nga njeri. Ama nuk duhet ta harrojmë Taulant Ballën, me detyrë, kryetar i Grupit Shpifës të Partisë Socialiste, që është bërë edhe sinonim i gënjeshtrës, krimit, drogës dhe tashmë edhe përdhunimit. Për këtë njeri nuk bënë punë as ilaçi në fjalë dhe as ligji, duhet një Gjykatë Speciale për të përballuar gjithë ato shpifje që i thotë ky njeri.

Ashtu sikur se edhe një Gjykatë tjetër Speciale vetëm për kanalin më kriminal në këtë tokë ERTV!

Meqë shembujt janë të panumërt po e mbyllim këtë kapitull shpifjes socialiste me xhevahirin e fundit me tre shpifës. Gjatë një takimi në Elbasan, ku ishin të pranishëm edhe ministrat e kabinetit qeveritar, kryeministrit Edi Rama iu ankua një qytetar për rrugën Tiranë-Elbasan e cila nuk ka mbaruar ende. Rama me këtë rast kërcënoi ministrin e Transporteve, Damian Gjiknuri, se ky projekt duhet të përfundojë brenda këtij viti.

“Tani këtë çështje duhet ta marrë përsipër kush e ka përsipër, ministri i Infrastrukturës. Sot është marrë vendimi që mbaron deri në fund të vitit, ai e ka në dorë vetë…o ta mbarojë, o të mbarojë”, tha Rama.

Gjiknuri si Gjiknuri, nuk i takon kot kësaj mazhorance:

“Në fakt vendimin e deklaroi kryeministri dhe ne na mbetet vetëm ta zbatojmë. Fatkeqësisht do të duhen edhe ca para më shumë, kështu që edhe ministri i Financave do të ndajë barrën me mua, por ne do ta bëjmë të mundur ta mbarojmë atë rrugë. Për ne ka prioritet dhe rruga do të mbarojë. Menjëherë me lëvrimin e fondeve rruga do të mbarojë, ka mbetur vetëm një segment dhe kjo është e sigurt.”

Meqë kanë mbetur edhe 80 ditë deri në fund të vitit, dhe është e qartë se kjo mazhorancë nuk do ta përfundoj këtë rrugë sikur të qëndroj edhe 80 vjet në pushtet, na mbetet ta mbyllim këtë kapitull të shpifjeve me tre shpifës.

 Këta të vrasin…

“Çdo lek i fituar nga një gjyq për shpifje, do të shkojë në Fondin e Edukimit. Ky fond do të krijohet prej nesh për të mbështetur çerdhet, kopshtet, bibliotekat e shkollave, nxënësit e mirë të çdo komuniteti, me libra, kompjutera apo materiale mësimore.

Fondi i Edukimit, do të garantojë që paratë e ardhura nga gjyqet që do të bejnë kryeministri, ministrat, deputetët, kryebashkiakët socialistë apo të tjerë veprimtarë të forcës sonë politike të gjendur përballë një shpifjeje, të shkojnë në destinacion, mbështetur në propozimin e fituesit të gjyqit,” thekson projekti më idiot i këtyre 25 viteve.

Dhe, kanë kaluar 5 vjet nga kjo qeverisje kriminale dhe 25 vjetë pluralizëm me qeverisje jo fortë stabël, por tallje të tillë me popullin nuk ka bërë asnjëra prej tyre. Shpifin në grup dhe imagjinojnë lekët e fituara nga ata që do të shpifin për këta shpifës të certifikuar. Dhe jo vetëmkaq! Shpikin edhe Fond Edukimi edhe pse çdo institucion edukimi që ka edukuar në këtë tokë shqiptare e kanë degraduar në papërmirësueshmëri.

Në fund, për të gjithë ata që janë të habitur nga kjo nismë e kryeministrit më të dështuar shqiptarë, duhet kujtuar se kyçja e gojës dhe e mendimit nuk është asgjë:

Janë po këta që kanë vrarë shqiptarë plotë 45 vjet!