Efektet negative të COVID-19, deficiti buxhetor rritet me 6,678%
Deficiti buxhetor që reflekton shpenzimet që nuk mbulohen nga të ardhurat u rrit me 6,675% në 5-mujorin e parë, duke sinjalizuar për zgjerim të pazakontë të borxhit publik, si pasojë e efekteve negative që dha bllokimi i ekonomisë prej masave për parandalimin e pandemisë.
Sipas të dhënave zyrtare nga Ministria e Financave, vjet në këtë periudhë, balanca buxhetore ishte me 400 milionë lekë plus, që do të thotë se të ardhurat ishin rreth 3 milionë euro më të larta se shpenzimet, duke e bërë buxhetin suficitar.
Por pandemia e ka ndryshuar kryekëput situatën, për shkak se të ardhurat kanë rënë me ritme të forta nga parashikimet fillestare. Rënia e të ardhurave e shoqëruar me shpenzime të njëjta si në vitin e kaluar, ka çuar deficitin buxhetor në janar-maj në -26 miliardë lekë. Gjithsesi kjo shifër është më e ulët se programi i qeverisë në këtë periudhë, që parashikonte një gropë prej 35 miliardë lekësh.
Të ardhurat buxhetore ranë për periudhën pesë mujore me 14.7% në raport me vitin 2019, ndërsa shpenzimet buxhetore pësuan rënie me 0.5%.
Për të përballuar shpenzimet, në kushtet kur të ardhurat kishin rënë me rreth 27 miliardë lekë qeveria vendosi të ndjekë politikën e financimit të shpenzimeve nëpërmjet borxhit.
Të detajuara sipas zërave shpenzimet buxhetore, rritjen më të madhe e kanë shënuar pagesat e papunësisë me 3449%. Ky zë reflekton pagesat e për dy paketat e ndihmës me një shumë të përgjithshme 8 miliardë lekë nga 225 milionë lekë që ishte ky zë në 5-mujorin e parë 2019.
Zëri i dytë më rritjen më të madhe ishte ndihma ekonomike, shpenzimet e së cilës pësuan rritje vjetore me 26%, si pasojë e rritjes së kësteve mujore për familjet në nevojë për të përballuar jetesën gjatë izolimit.
Në të kundërt, disa zëra buxhetorë në krahun e shpenzimeve janë prekur keq nga pandemia. Investimet në arsimin e lartë kanë pësuar rënie vjetore me gati 30% në 5-mujor. Me të njëjtat ritme ranë edhe shpenzimet për pushtetin vendor, dhe subvencionet e ndërmarrjeve shtetërore.
Shpenzimet kapitale që janë zëri më produktiv në rritjen ekonomike nuk pësuan ndryshime të forta. Gjatë periudhës janë shpenzuar 20 miliardë lekë me një rënie 7%./Monitor/
