Efekti ishte minimal, Albin Kurti: Taksa hiqet nga 1 Prilli, me kushte!
Kryeministri i Kosovës, Albin Kurti, në seancën e jashtëzakonshme për taksën 100 për qind ndaj Serbisë që u zhvillua sot ka paraqitur argumentet që zëvendësimi i taksës me masën e reciprocitetit është zgjidhja më e duhur. Duke folur për këtë zëvendësim ai madje i rikujtoi deputetëve se në vitin 2011 Parlamenti i Kosovës kishte miratuar një rezolutë ku kërkonte masa reciprociteti ndaj Serbisë.
“Edhe në fushatën zgjedhore, edhe pas saj, edhe në programin qeverisës edhe sot e kësaj dite jemi të angazhuar për zëvendësimin e kësaj tarife 100 për qind ndaj mallrave të Serbisë me parimin e reciprocitetit të plotë politik ekonomik e t regtar. Ky në fakt është edhe obligim i të gjithë shtetit tonë meqenëse me 7 dhjetor të vitit 2011 është miratuar edhe një rezolutë në Kuvendin e Republikës ku asaj kohe kryeparlamentar ishte z. Jakup Krasniqi me të cilën rezolutë ne kemi shprehur qëndrimin tonë dinjitoz e me integritet me një mocion me tri pika,” tha Kurti ku i përmendi AAK-së se këtë rezolutë që kërkonte masa reciprociteti ndaj Serbisë e kishin votuar 3 deputetë të saj, ndërsa tha se kanë qenë 4 deputetë të PDK-së që kanë votuar kundër.
“Ne konsiderojmë se rezolutat e Kuvendit të Kosovës nuk janë tekst në letër por vendime për t’u respektuar e për t’u zbatuar. Aplikimi i tarifës 100 për qind nga ana e Kosovës u shfrytëzua si prektekst nga Serbia për të refuzuar dialogun dhe si rezultat i kësaj Kosova u bë subjekt i trysninë ndërkombëtare ndërsa në anën tjetër efekti i tarifës 100 për qind ka qenë minimal, për shkak se edhe nuk u zbatua si duhet, qoftë përmes kontrabandës, qoftë përmes marrëveshjeve të fshehta siç është ajo për importim të energjisë elektrike.”
Me këtë rast, nga foltorja e Parlamentit të Kosovës, Kryeministri Kurti tha se disa marrëveshje që u arritën në Bruksel nuk u zbatuan; Dialog i cili deri më tani është bërë për statusin e Kosovës, ndërsa me vendosjen e reciprocitetit dialogu mund të shkoi drejt zgjidhjes së pengesave një nga një.
“Në vend që të dialogojmë me Serbinë për territorin tonë, për organizimin e sistemit institucional ne do të dialogojmë për pikat që e reflektojmë sovranitetin e vendit. Të jemi sovran kur të diskutojmë, e jo të diskutojmë për sovranitetin për të qenë sovran. Dhe çdo heqje e një barriere nga lista nënkupton një njohje më tepër të sovranitetit të Kosovës nga ana e Serbisë,” tha ai duke u shprehur qartë se duhet të bëjmë Serbinë ti njohë të gjitha dokumentet që i lëshojmë ne, siç e konsiderojmë veten të na konsiderojë edhe ajo.
“Unë besoj që qëndrimi im është qëndrimi i duhur për të ecur përpara, jo ose krejt ose hiç, ose tash ose kurrë. Qasja jonë është ajo e cila praktikisht na ka vendosur në ofensivë, masat e vendosura në defanzivë ku ti shndërrohesh në një kështjellë për t’u mbrojtur nga një rrethim që të vie rrotull është gabim na pikëpamja e shtetit. Ka versione më të mençura për të arritur qëllimet e vendosura. E dini se ka shumë pengesa për të eksportuar në Serbi, të kalojmë më ofensivë e jo të detyrohemi të arsyetojmë taksën,” tha Kryeministri i Kosovës, Albin Kurti duke bërë të ditur në fund një varg masash të reciprocitetit ndaj Serbisë dhe për këtë tha që janë duke punuar dhe duke u përgatitur me institucionet përgjegjëse.
