Eficienca e energjisë, plani për ndërhyrje në pallatet ekzistuese në 27 qytete

Agjencia e Eficiencës së Energjisë parashikon që të ndërhyjë me një fazë pilot në  të paktën 27 qytete e qyteza në vend duke përzgjedhur njësi banimi shumëfamiljare kryesisht pallate ekzistues në funksion të eficiencës së energjisë.

Të paktën gjashtë procedura prokurimi të veçanta parashikojnë ndërhyrje të ndryshme dhe në veçanti për Shkodrën projekti ndalet edhe tek ndriçimi rrugor, instalimi i paneleve fotovoltaikë dhe  stacioneve elektrikë. Ky projekt i fundit me fokus tek Shkodra është emërtuar si “Rrugae Energjisë së Pastër”.

Por cilat janë specifikat e ndërhyrjeve për secilën procedurë?

Së pari është kontrata me objekt  Projekt Pilot “Auditim, çertifikim, hartim projekt zbatimi dhe realizim punimesh për rinovim të godinave ekzistuese të banimit shumëfamiljare” me efiçencë të lartë të energjisë, në qytetin e Korçës”. Në këtë projekt pilot Agjencia ka specifikuar se do të përzgjidhen 15 njësi të cilat do të monitorohen në aspektin e konsumit që kanë pasur tre vitet e fundit, do të hartohet projekti për ndërhyrjen dhe do të lëshohet në një fazë të tretë Certifikata e Performancës së Energjisë – paraprake (para punimeve të zbatimit). Më pas në fazën katër do të bëhet realizmi i punimeve të ndërtimit dhe nxjerrja e certifikatës së performencës së energjisë pas punimeve.

Në një kontratë të ngjashme që ndalet tek qyteti i Tepelenës do të përzgjidhen gjithashtu 15 njësi banimi shumëfamiljare të cilat do të kenë edhe ato pesë faza për projektin pilot të Agjencisë së Eficiencës së Energjisë.

Kontrata me objekt Projekt Pilot “Auditim çertifikim dhe projekt zbatimi për rinovimin e godinave ekzistuese shumëfamiljare (blloqe banimi) me efiçencë energjie në qytetet Dibër, Tropojë Krujë, Durrës, Rrogozhinë“. Kjo kontratë do të mbulojë 27,000 m2 , të ndara në mënyrë proporcionale për secilin qytet.

E njëjta vlen edhe për kontratën tjetër  “Auditim çertifikim dhe projekt zbatimi për rinovimin e godinave ekzistuese shumëfamiljare (blloqe banimi) me efiçencë energjie në qytetet: Elbasan, Belsh, Cërrik, Rrogozhinë, Librazhd, Prrenjas, Peqin, Kavajë, Fier, Lushnje” duke u ndalur në banesa shumëfamiljare të ndara në mënyrë proporcionale në qytetet që përfshihen në të, ashtu si për kontratën tjetër  projekt me eficiencë energjie në qytetet: Shkodër, Malësi e Madhe, Kurbin, Kukës, Has, Lezhë, Pukë, Vau i Dejës, Klos, Fushë.

Për projektin e Shkodrës “Rruga e energjisë së pastër” projekti parashikon që në segmentet Lindore dhe Perëndimor i unazës së Bashkisë Shkodër të përzgjedhura për ndërhyrje do të vlerësohet situata aktuale. Kjo do të zhvillohet në terren ku do të kryhen të gjitha matjet e nevojshme sipas Metodologjisë Kombëtare të Llogaritjes dhe do të hartohet Raporti i analizës.

Ndriçimi do të zëvendësohet me llampa LED ndërkohë që parashikohen të vendosen stacione kërkimi për makina elektrike./Monitor/