Ejup Maqedonci zëvendëson Ministrin e Mbrojtjes, Armend Mehaj

Koloneli Ejup Maqedonci, sot ka marrë detyrën e ministrit të Mbrojtjes, pas dorëheqjes së Armend Mehajt nga ky post.

Maqedonci, raporton RFE, e ka konfirmuar vetë këtë lajm përrmes një postimi në rrjetin social Facebook.

Ndërkohë edhe ministri Armend Mehaj ka konfirmuar dorëheqjen e tij nga ky post duke përmendur arsyet familjare për dorëheqjen e tij nga posti i ministrit të Mbrojtjes.

Armend Mehaj tha se dorëheqjen e tij e ka pranuar edhe kryeministri i Kosovës, Albin Kurti.

Kryeministri i Kosovës, Albin Kurti, falënderoi Mehajn për punën në Ministrinë e Mbrojtjes.

“Ministër të ri të mbrojtjes emërova Ejup Maqedoncin, me të cilin kemi bashkëpunuar deri më tani në funksione tjera. Ministrit Maqedonci i uroj punë të mbarë në avancimin e mbrojtjes dhe sigurisë, në zhvillimin dhe ndërtimin e ushtrisë sonë,”u shpreh Albin Kurti përmes rrjetit social Facebook.

Kush është ministri i ri i Mbrojtjes?

Ejup Maqedonci doli në pension të parakohshëm nga Forca e Sigurisë së Kosovës në korrik të këtij viti. Ai ka qenë pjesëtar i Ushtrisë Çlirimtare të Kosovës në Zonën Operative të Llapit.

Më pas si pjesë e Trupave Mbrojtëse të Kosovës, TMK. ka shërbyer për një dekadë si komandant i batalionit për kërkim-shpëtim.

Maqedonci më pas ka vazhduar detyrën e shefit të departamentit të operacioneve dhe trajnimeve në Shtabin e Përgjithshëm të FSK-së.

Pas pensionimit, raporton RFE, Mehaj i ka ndarë Maqedoncit “Medaljen e Karrierës” për kontributin e dhënë për formimin, ristrukturimin dhe modernizimin e FSK-së.

Ndryshe, Armend Mehaj kishte ardhur nga Norvegjia për t’u bërë pjesë e Qeverisë së Kosovës, të udhëhequr nga Albin Kurti, e cila u votua në mars të vitit 2022.

Kolonel Ejup Maqedonci ka përfunduar dy Kolegje ushtarake dhe dy programe master në Shtetet e Bashkuara.