Ekipi Olimpik i Xhudos në karantinë

Për shkak të situatës së krijuar nga koronavirusi Qeveria e Kosovës nga e premtja ka pezulluar të gjitha aktivitetet sportive. Për këtë arsye sot edhe Ekipi Olimpik i xhudos ka hyrë në karantinë.

Trajneri Driton Kuka, që në ekipë ka pesë garues, të cilët ndodhen brenda normës Olimpike Tokio 2020, ka theksuar se ekipi është izoluar në sallën e stërvitjes.

“Prej sot ekipi Olimpik është në karantinë, që do të thotë do të izolohet prej kontaktit me njerëz tjerë,” ka sqaruar Kuka përmes webfaqes zyrtare të Komitetit Olimpik të Kosovës, KOK.

“Do të jenë 10 persona, përfshirë sparing partnerët që do të qëndrojnë, ushqehen e stërvitin së bashku deri në një moment tjetër. Të gjithë do të jenë në karantinë tek salla ku stërvitim,” tha trajneri i kampiones, Majlinda Kelmendi.

Shkaku i koronavirusit, Federata Ndërkombëtare e Xhudos (IJF), ka pezulluar Grand Slamin e Ekateringut në Rusi, Grand Prixin e Tbilisit, Grand Prixin e Antalyas, gara këto që vlenin për pikë Olimpike, si dhe Kampionatin Evropian “Pragë 2020”, i cili tani pritet të mbahet në muajin qershor.

Driton Kuka mendon se edhe Lojërat Olimpike Tokio 2020, do të shtyhen.

“Lojërat Olimpike me siguri do të shtyhen. Normal, për ne do të ishte mirë të mbahen në kohë, meqenëse ne nuk kemi ndërprerje, por shumë shtete të fuqishme tashmë janë jashtë stërvitjeve dhe kjo flet shumë.”

Majlinda Kelmendi (-52 kg), Distria Krasniqi (-48 kg), Nora Gjakova (-57 kg), Loriana Kuka (-78 kg) dhe Akil Gjakova (-73 kg), pritet të marrin pjesë në Lojërat Olimpike Tokio 2020 me normë.

LO Tokio 2020 janë parashikuar të mbahen prej 24 korrik – 9 gusht 2020 në Tokio të Japonisë.