Ekonomia shqiptare humbet 1 mld euro, PD: Edi Rama mendon për oligarkët!

Kryeministri Edi Rama mendon për oligarkët edhe kur ekonomia shqiptare humbet 1 mld euro! Kështu reagon Partia Demokratike përmes Ish-Deputetes Jorida Tabaku pas publikimit të të dhënave nga INSTAT ku konfirmohet një krizë e madhe në ekonominë dhe rritje të papunësisë.

“Rama dështoi në menaxhimin e dy krizave të mëdha të këtij viti. Qeveria dështoi t’i përgjigjej në kohë krizës së shkaktuar nga tërmeti, dështoi dhe të siguronte ndihmën e duhur njerëzore dhe ekonomike ndaj biznesit dhe qytetarëve përgjatë pandemisë,” thekson Jorida Tabaku duke cituar INSTAT-in i cili raporton se rënia ekonomike në vend për 3 mujorin e tretë është 130 mln euro ndërsa Produkti i Brendshëm Bruto, pra çfarë prodhon e gjithë ekonomia jonë, është kontraktuar me 3.3%.

“Parashikimet flasin se ekonomia do të kontraktohet për këtë vit në 7.5% të PBB-së. Buxheti 2021 nuk është ideuar për t’i ndihmuar qytetarët. Varfëria do të rritet sikundër dhe BB e ka parashikuar duke shkuar në nivelet e 2005, pra shqiptarët do të kthehen 15 vjet pas tek të ardhurat e tyre.”

Ndërkohë që në këtë kohë krize ku janë humbur nga ekonomia 1 mld euro, thekson Tabaku në reagimin e saj përmes rrjetit social Facebook, qeveria shqiptare do të japë për PPP-të e programuara 120 mln euro duke u rritur me 40% në raport me këtë vit.

“Gjëja e fundit që i intereson kësaj qeverie jemi ne, qytetarët e Shqipërisë. Pas 7 vite dështimesh, ajo që mund të ofrojë Rama është, gjithnjë e më shumë dështime,” konstaton Ish-Deputetja e Partisë Demokratike, Jorida Tabaku duke përfunduar:

“Ne, Partia Demokratike, do të sjellin ndryshim dhe një shpresë të re për Shqipërinë.”