Ekskluzive/ Vizita surprizë e Erdogan në Tiranë, kujt do i bëjë karshillëk Edi Rama…

Pafrike.al ka mësuar nga burime qeveritare dhe diplomatike se Presidenti i Turqisë, Recep Tayyip Erdogan, do të zhvillojë një vizitë në Tiranë më datën 30 qershor.

Burimet konfirmojnë se presidenti turk do të jetë në bordin e një prej avionëve që më pas do t’I përkasin kompanisë më të re të fluturimeve, Air Albania, e cila do të jetë një bashkëpunim shqiptaro turk, ku 49 % e aksioneve do i përkasin Turkish Airlines, ndërsa 51 % janë në ortakëri të Albcontrol dhe MDN Investment.

Vizita e Erdogan në Tiranë do të realizohet vetëm dy ditë pasi Këshilli i Ministrave të BE-së do të shprehet për hapjen ose jot ë negociatave për Shqipërinë.

Referuar asaj çka raportohet shanset që Shqipërisë t’i hapen negociatat janë të pakta dhe në rastin më të mirë ato do të jenë të kushtëzuara, një model pak a shumë i njëjtë i aplikuar nga BE edhe në raste të njëjta.

Në këtë kuadër, duket se vizita e Presidentit turk në Shqipëri mund të përdoret nga Rama si një karshillëk që do t’I bëjë Europës dhe partnerëve strategjikë të Shqipërisë. Në rast të një vendimi negativ, Rama mund të përdorë vizitën zyrtare të Presidentit turk, ndoshta për ti bërë BE-së karshillëkun e rradhës.

E ndërkohë që në Tiranë mund të nisin debatet mbi atë se çfarë do të vendosë BE, Rama mund të përdorë këtë vizitë për të folur për investimet, investitorët apo vendet e punës që do të hapen me kompani që do të vijnë nga Turqia.

Por gjithashtu me interes do të jenë mesazhet që do të japë nga Tirana, Presidenti turk dhe veçanërisht kërkesa tashmë e zyrtarizuar nga Turqia për ekstradimin e gylenistëve që ndodhen në territorin shqiptar.

Në prill të 2018, Ambasadori turk në Tiranë, Murat Ahmet Yoruk, deklaronte se bisedimet mes autoriteteve shqiptare dhe atyre turke për esktradimin e personave të lidhur me Fetallah Gulen vazhdojnë.

“Përpjekjet mes Shqipërisë dhe Turqisë në lidhje me largimin e personave të lidhur me organizatën Feto janë mjaft pozitive. Qeveria shqiptare, ka qënë ndër të parat që e ka dënuar grushtin e shtetit dhe në këtë mënyrë e ka mbështetur qeverinë turke. Nuk do të lejojmë që organizata Feto të prishë marrëdhëniet Shqipërisë dhe Turiqisë. Edhe pse persona të lidhur me këtë organizatë po bëjnë propagandë të errët për të shtrembëruar qllimet tona në Shqipëri”, do të shprehej diplomati turk në Tiranë.

Në të njëjtin muaj, Edi Rama, do e cilësonte si të drejtë shqetësimin e Presidentit turk lidhur me rrjetin e gylenistëve.

“Në rastin konkret, bashkëbisedimi im me presidentin Erdogan është i drejtpërdrejtë, i hapur dhe vëllazëror. Kurrë nuk ka qenë një çështje presioni shqetësimi i tij që është absolutisht, absolutisht i bazuar për këtë rrjet që kërcënoi të përmbyste me dhunë rendin Kushtetues në Turqi.

Unë besoj se nuk mund të mbahet një qëndrim bardhezi në kuptimin që jo s’ka. Unë besoj që është një rrjet që meriton një vëmendje shumë të veçantë. Ne jemi të detyruar që të bëjmë detyrën ndaj çdo rreziku që përbën kërcënim dhe këtu bëhet fjalë për një kërcënim të brendshëm”, do të shprehej Rama.

Raportet mes Ramës dhe Erdogan shpesh herë kanë ngjallur polemika dhe reagime në nivel ndërkombëtar, ndërsa nga momenti që në postin e kryeministrit është ulur Edi Rama ka pasur një shtim të ndikimit turk në Shqipëri.

Erdogan ka folur se investimet turke në Shqipëri arrijnë në 3 miliardë dollarë, ndërsa Rama ka udhëtuar drejt Turqisë disa herë, ku është takuar me Presidentin turk.

Pozicioni i Shqipërisë pro një rezolute të propozuar nga Turqia, kundër vendimit të Presidentit amerikan Donald Trump, për të zhvendosur ambasadën amerikane nga Tel Avivi në Jeruzalem, shkaktoi polemika të forta jo vetëm në politikën shqiptare.  Vendimi u konsiderua si personal apo zgjedhje e Ramës dhe jo i konsultuar me institucionet kryesore në vend, Parlamentin dhe Presidencën.

Tashmë pritet se çfarë qëndrimi do të mbajë Edi Rama, cila do të jenë mesazhet që do të përcjellë Presidenti turk, dhe cili do të jetë reagimi i Kryeministrit ‘mik’ të Erdogan…