Ekspertët e FDA përkrahin vaksinën Pfizer/BioNTech për fëmijët mbi pesë vjeç

Një panel i Qeverisë amerikane ka votuar për të rekomanduar vaksinën kundër koronavirusit të kompanisë Pfizer/BioNTech, edhe për fëmijët e moshës nga 5 deri në 11 vjeç.

Ekspertët e Administratës amerikane për Ushqim dhe Ilaçe, FDA, kanë përkrahur sot këtë vendim, raporton RFE, duke i hapur rrugën autorizimit brenda disa javësh.

Në muajin shtator, kompania Pfizer është shprehur se të dhënat kanë treguar që vaksina kundër koronavirusit është e sigurt për atë grup-moshë.

SHBA-ja tashmë është duke vaksinuar fëmijët e moshave nga 12 vjeç e lart.

Vendimi i fundit prek rreth 28 milionë fëmijë amerikanë.

Ky vendim tani pret miratim nga FDA dhe Qendrat për Parandalimin dhe Kontrollin e Sëmundjeve. Ekspertët e FDA janë shprehur, raporton RFE, se janë të bindur se përfitimet e vaksinës tejkalojnë rreziqet.

Ndryshe, të dhënat zyrtare në SHBA tregojnë se 160 fëmijë të moshave pesë deri në 11 vjeç, kanë vdekur me koronavirus, prej shpërthimit të pandemisë. Në total, SHBA ka regjistruar rreth 740.000 vdekje nga koronavirusi.