Eksportet e nisin vitin me rënie, bie fasoni dhe mineralet

Eksportet nuk po dalin nga trendi rënës ku kanë hyrë prej katër vitesh, duke e nisur dhe janarin me tkurrje.

Sipas INSTAT, në Janar 2026 eksportet e mallrave arritën vlerën 26.7 mld lekë, duke u ulur me 4.5 për qind, në krahasim me të njëjtën periudhë të një viti më parë dhe me 0.3 për qind, në krahasim me Dhjetor 2025.

Gjatë muajit Janar 2026, në uljen e eksporteve prej 4.5 për qind, negativisht kanë ndikuar grupet: “Minerale, lëndë djegëse, energji elektrike” me -2.9 pikë përqindje , “Tekstile dhe këpucë” me -1.8 pikë përqindje, “Produkte kimike dhe plastike” me -0.4 pikë përqindje, etj. Pozitivisht kanë ndikuar grupet: “Makineri, pajisje dhe pjesë këmbimi” me +1.4 pikë përqindje dhe “Lëkurë dhe artikujt prej tyre” me +0.1 pikë përqindje.

Prej të paktën tre vitesh eksportet nuk po arrinë të ngrenë kokë. Gjatë vitit 2025, eksportet e mallrave arritën vlerën 346 mld lekë, duke u ulur me 6.1 për qind. Në 2024-n, eksportet kishin rënë me 16.2 për qind dhe në 2023-n ishin tkurrur me 9.5 për qind. Të dhënat historike tregojnë se gjatë dekadës së fundit ecuria e eksporteve ka qenë e paqëndrueshme. Që nga viti 2015, shitjet jashtë vendit kanë rënë për 7 vite (2015, 2016, 2019, 2020, 2023, 2024, 2025) dhe janë rritur vetëm në 2017-2018 dhe 2021-2022, kur ishte rikuperimi nga pandemia.

Edhe importet me tkurrje

Gjatë muajit Janar 2026, në uljen e importeve prej 4.0 për qind, krahasuar me një vit më parë, kanë ndikuar negativisht grupet: “Materiale ndërtimi dhe metale” me -2.1 pikë përqindje, “Minerale, lëndë djegëse dhe energji elektrike” me -2.0 pikë përqindje, “Produkte kimike dhe plastike” me -1.5 pikë përqindje, etj. Ndërsa pozitivisht ka ndikuar grupi: “Makineri, pajisje dhe pjesë këmbimi” me +2.1 pikë përqindje.

Përmirësohet deficiti tregtar

Sipas INSTAT, Importet e mallrave arritën vlerën 57.9 mld lekë, duke u ulur me 4.0 për qind, në krahasim me një vit më parë dhe me 27.5 për qind, në krahasim me Dhjetor 2025. Defiçiti tregtar i këtij muaji është 31.1 mld lekë, duke u ulur me 3.6 për qind, krahasuar me Janar 2025 dhe me 41.3 për qind, në krahasim me Dhjetor 2025.

Ecuria e tregtisë së mallrave sipas vendeve partnere

Në muajin Janar 2026, vendet me të cilat Shqipëria ka pasur uljen më të madhe të eksporteve, në krahasim me Janar 2025 janë: Italia 3.6 për qind, Kosova 2.0 për qind, etj. Ndërsa vendet me të cilat eksportet kanë pasur rritjen më të madhe, janë: Gjermania 30.2 për qind, Greqia 31.8 për qind, etj.

Në muajin Janar 2026, vendet me të cilat Shqipëria ka pasur uljen më të madhe të importeve, janë: Italia 10.3 për qind, Greqia 3.3 për qind, etj. Ndërsa vendet me të cilat importet kanë pasur rritjen më të madhe, janë: Kina 1.8 për qind, Turqia 13.5 për qind, etj.

Shkëmbimet tregtare me vendet e BE-së zënë 55.4 për qind, të gjithë tregtisë. Në Janar 2026, eksportet drejt vendeve të BE-së zënë 74.1 për qind të eksporteve gjithsej dhe importet nga vendet e BE-së zënë 46.8 për qind të importeve gjithsej./Monitor/