Ekzekutim mafioz/ Kush është ish-polici i vrarë, Santiago Malko. Pistat…
Santiago Malko, 26-vjeç, është i riu që u ekzekutua me breshëri kallashnikovi mbrëmjen e të martës në zonën e Xhamllikut në Tiranë.
Malko, rezulton i përfshirë në një ngjarje të rëndë kriminale, që mund të kishte përfunduar edhe me vrasje, por u parandalua nga shërbimet e Komisariatit Nr. 3 në Tiranë.
Por mësohet se policia ka përjashtuar nga pistat e hetimit konfliktin e ish-policit me vëllezërit Gentian e Edmond Lashi, në vitin 2016, pasi anëtarët e të dy familjeve i kishin dhënë besën njëri-tjetrit se do ta mbyllnin këtë ngjarje.
Për këtë arsye, pistat kryesore të hetimit janë përqendruar në fushën e biznesit të lojërave të fatit të viktimës, si dhe në faktin se ai ka qenë një ndër protagonistët e ngjarjes së 4 tetorit të vitit të kaluar në zonën e ish-Bllokut, ku u vra një person.
Santiago Malko kishte përfunduar kursin për Patrullë të Përgjithshme dhe ka qenë pjesë e kësaj strukture në Policinë e Tiranës vetëm për 3 muaj. Malko ishte përjashtuar nga Policia e Shtetit në vitin 2014, për shkak të një problemi me lojërat e fatit. Ai kishte një biznes me lojëra fati, me të cilin kishte thyer ligjin. Deri në momentin e përjashtimit nga policia, ai ishte një person pa probleme me drejtësinë.
Por, pas përjashtimit, i riu ka nisur problemet me ligjin, me konfliktin në lokal me vëllezërit Lashi, ku pati tentativë edhe për përdorimin e armëve. Por ky konflikt ishte mbyllur me mirëkuptimin e të dyja familjeve, ndaj dhe është përjashtuar të jetë një ndër arsyet e vrasjes së 26-vjeçarit.
Ndërsa bashkëshortja e tij vazhdonte të ishte pjesë e Policisë së Tiranës, në njësinë “Shqiponja”.
Kush është gruaja e Malkos, ish-efektivja bukuroshe e “Shqiponjave”
Santiago Malko ishte i martuar me ish-efektiven e Forcave “Shqiponja”, Dea Ricku.
Dea ka punuar për pak kohë si police e rendit në Komisariatin e Kamzës dhe më pas, në janar të vitit 2016, është bërë pjesë e “Shqiponja-ve”, duke qëndruar për disa muaj. Një vit më vonë, në 2017, Dea Ricku ka vendosur të shkëputet nga policia me dëshirën e saj.
Nuk dihen arsyet e vërteta të largimit të saj nga policia, por ky vendim, raporton BW, është marrë pikërisht në vitin kur bashkëshorti i saj ka nisur problemet me drejtësinë, pas konfliktit me vëllezërit Lashi.
Në kohën që shërbeu në Policinë e Shtetit, Dea Ricku bëri bujë në media, për shkak të bukurisë së saj. Në një intervistë mediatike në atë kohë, Dea shprehej se bukuria e saj nuk i kishte sjellë asnjë problem dhe se nuk ishte ndjerë e provokuar. “Unë, thoshte Dea, kam një qëndrim timin, cakun e të cilit nuk lejoj ta kalojë askush!”.
