Ekzekutimi i gjykatësit Kalaja, Berisha: Dëshmi e dështimit të plotë të Reformës së Drejtësisë nga Soros

Duke dënuar ekzekutimin e gjyqtarit dje në sallën e Gjykatës Apelit si vrasje që ngjitet në nivelin e krimit shtetëror dhe dëshmon shkallën ekstreme të pasigurisë në narkoshtetin shqiptar, Kryetari i Partisë Demokratike, Sali Berisha, konstaton se ekzekutimi i gjykatësit Astrit Kalaja dëshmon dështimin e plotë të reformës së drejtësisë nga Sorosi dhe sorosianët e tjerë.

“Duke ruajtur ndjeshmërinë e plotë ndaj reagimeve që më pëlqejnë apo nuk më pëlqejnë në tërësi dhe në veçanti ndaj rastit konkret, dua të përsëris qëndrimin tim të prerë se nuk pajtohem kurrë me marrjen e jetës dhe aq më tepër ekzekutimin në detyrë të zyrtarëve për asnjë lloj arsye, ndaj dhe kam dënuar dhe dënoj me forcën më të madhe ekzekutimin e gjykatësit Kalaja në sallën e gjyqit dhe përsëri shpreh ngushëllimet e mia familjes Kalaja.
Por me këtë rast dua të theksoj se ekzekutimi publik në sallën e gjyqit i gjykatësit Kalaja sikur të ishte në një kafene apo mejhane të qytetit, dëshmon shkallën ekstreme të pasigurisë në Shqipëri, narkoshtetin e parë dhe të vetëm në Europë.
Në këtë kuadër, vrasja në sallën e gjyqit e gjykatësit Kalaja ngjitet në nivelin e krimit shtetëror dhe kjo jo se plumbat u shkrehën nga shteti, por se vrasja ndodhi në mungesë të plotë të të gjitha përgjegjësive dhe detyrimeve shtetërore, qoftë edhe atyre më minimale për mbrojtjen e jetës dhe veprimtarisë së zyrtarëve të shtetit brenda institucioneve të tyre. Kjo ka vetëm një shpjegim, zëvendësimin e shtetit, e ligjit me Maliqin,” tha Sali Berisha duke konstatuar se ekzekutimi i gjykatësit Kalaja dëshmon dështimin e plotë të reformës së drejtësisë nga Sorosi dhe sorosianët e tjerë.

“Tani, do rikthehem përsëri tek reagimet, duke shtuar përsëri se vrasja e drejtësisë është triumfi i vetëgjyqësisë, në të cilën askush nuk ka të ardhme.
Por me këtë rast theksoj se ekzekutimi i gjykatësit Kalaja në sallën e gjyqit, njëlloj sikur të ishte në shesh apo rrugë të qytetit, dëshmon gjithashtu dështimin e plotë të reformës së sistemit të drejtësisë nga George Soros dhe sorosianët e tjerë, të bazuar kjo në korrupsionin më të madh kombëtar dhe ndërkombëtar, reformës që de facto privoi qytetarët shqiptarë nga një proces i drejtë ligjor, di asnjëherë në tërë historinë e tyre, si asnjëherë në historinë e Europës pas luftës.
Me vetingun gjueti shtrigash, të bazuar në korrupsionin gjysmë dhe 1 milion euro pagesa në Shqipëri, sot për shkak të vakuumit që solli ky proces është krijuar një stok prej 230 mijë dosje.
Sot, qytetarët shqiptarë, që para reformës së George Sorosit, duhet të prisnin dy gjer në 4 vite për një vendim gjyqësor, sipas të dhënave zyrtare të sotme, duhet të presin 4 deri në 6 herë më shumë apo mbi 15 vite. Stoku i dosjeve për t’u shqyrtuar kërkon sipas ekspertëve rreth 20 vite.
Rasti i djeshëm është rasti më dramatik i vetëgjyqësisë, por e vërteta është se rastet e vetëgjyqësisë për shkak të këtij sistemi të falimentuar, po shtohen çdo ditë,” tha lideri i opozit duke vlerësuar se përdorimi i drejtësisë si armë politike nga narkoshteti është kriminalizimi dhe dështimi i saj më i madh që Ramaduro i ka bërë këtij sistemi

Duke theksuar përsëri se asgjë nuk përligj krimin horror, ekzekutimin e gjykatësit në sallën e gjyqit, por askush nuk mund të mohojë se ai krim makabër dëshmon për shkallën e tmerrshme të korrupsionit të gjithanshëm që ka pushtuar vendin, dhe në rastin konkret, sistemin e drejtësisë, siç faktohet kjo nga organizatat prestigjioze ndërkombëtare.
Sot ryshfeti dhe gjoba për qytetarin shqiptar në sistemin e drejtësisë është shumëfishuar krahasuar kjo me çdo kohë para saj.
Qytetarët shqiptarë duhet të paguajnë qimet e kokës vetëm e vetëm për të mundur me afrue shqyrtimin e dosjes së tyre nga gjykata. Pale pastaj për vendimin.
Sot, dosjet e prokurorëve dhe gjykatësve janë objekt falsifikimesh, manipulimesh, zhdukjesh dokumentesh, krimi flagrant pra, absolutisht njëlloj si në kohën kur ato administroheshin nga hetuesit e sigurimit të shtetit apo gjykatat popullore të diktaturës.
Së fundmi theksoj se asgjë nuk përligj absolutisht asgjë, marrjen e jetës së një njeriut, aq më tepër të një gjykatësi në drejtësi, por përdorimi i drejtësisë si armë politike nga narkoshteti është kriminalizimi dhe dështimi i saj më i madh që Ramaduro i ka bërë këtij sistemi.
Kurrë ndonjëherë drejtësia jonë nuk ka qenë në gjendje dramatike që është sot,” tha Kryetari i Partisë Demokratike duke paralajmëruar se Edi Rama po shfrytëzon vrasjen e një gjykatësi për të kaluar kodin e narkodiktaturës.

“Së pari, po të kishte minimumin e përgjegjësisë, ngjarja nuk mund të ndodhte kurrë në sallën e gjykatës së Apelit. Po pikërisht se nuk ka asnjë lloj përgjegjësie dhe nuk mban askush përgjegjësi, Ramaduro thotë se fajin e ka Kodi Penal. Ai kod që lejon dënime nga më të mëdhatë.
Ministrat, apo pseudoministrat e tij, në kor, thonë se fajin e ka arma pa leje. Po njerëz të shpifur si këta nuk mund të ketë, të turpshëm. Këta turpërojnë qytet, fshat, vend, krahinë, fis dhe çdo gjë.
Këta janë… se e si të vrapojnë…
Kjo është një përpjekje e Edi Ramës për të kaluar Kodin Ramaduro-Rakipi. Kodin e narkodiktaturës.
Shfrytëzon gjakun, jetën e një gjykatësi për të kaluar kodin e narkodiktaturës.
Nuk ka asnjë mungesë në kod. Asnjë mungesë.
Si mund të ketë? Kush e pengon detektorin? Funksionimin e tij? Kontrollin me detektor? Kush e pengon që të ketë roje salla e gjyqit? Kush i pengon këto? I pengon korrupsioni dhe mospërgjegjësia.
Shikoni sa i papërgjegjshëm, ky që katandisi drejtësinë në gjendje katastrofale me Sorosin, në këtë gjendje ku qytetari duhet të presë 15 vite për drejtësi, qytetarët janë privuar nga procesi ligjor i drejtë që ndodh në kohën e duhur.
Ky është kusht në konventa. Gjykimi nuk jepet përnjëherë, do kohën e vet. Por kurrë 15 vite. Vetë drejtuesit e këtyre institucioneve kanë deklaruar se do 15 vite një dosje në apel për t’u shqyrtuar.
Vetë ata kanë deklaruar, me përgjegjësi, se nuk ekziston procesi gjyqësor më.
Çdo jurist e di që një vendim që jepet pas 15 vitesh nuk ka asnjë vlerë më. Këto nuk e justifikojnë vetëgjyqësinë, por kjo është një katastrofë, ky është një falimentim i sistemit ekzistues,” tha Kryetari i Partisë Demokratike, Sali Berisha, duke përfunduar:
“Këtë falimentim të sistemit ekzistues, Edi Rama përpiqet ta maskojë me kodin. Jo mor. Ai kod lejon dënimin përjetë. Çfarë kërkon nga një kod tjetër ti? Me këtë kod janë dënuar me burgim përjetë dhjetëra që i ka liruar Edi Rama mbrapa.
I ka liruar ai i gjati, e dëgjuat të Rumin që thoshte me atë të gjatin jemi marrë vesh. Kush është ai i gjati? Erion Braçe është ai i gjati? Më thoni pak se mediat heshtën, nuk dolën me tituj: kryeministri në marrëveshje me Rumin. Jo, jo.
Kjo është hipokrizi, ky është tmerr. Është të shfrytëzosh vrasjen e një gjykatësi, të vrasësh për së dyti në këtë mënyrë. Shkoi ai, u fut, ia numëroi sa dha vendimin.”

Ndryshe, konflikti për një godinë në lagjen “Skënderbeg” në Shkodër, e njohur si ish-Shkolla e Rezervave, për të cilën Gjon Shkambi pretendonte pronësinë dhe ku, sipas tij, ishin bërë veprime të paligjshme, përfundoi me ekzekutinub me armë të gjyqtarin Astrit Kalaja në sallën e gjyqit, nga nipi i tij, Elvis Shkambi, pasi Kalaha dha një vendim që binte në kundërshtim me pretendimet e xhaxhait të tij. Autori qëlloi gjithashtu edhe drejt palës tjetër në proces, Ragip Kurtaj dhe djalit të tij, Ervis Kurtaj, duke i lënë të plagosur.