Elbasani zgjohet me të shtëna armësh, Ardian Çapja përfundon në spital. Policia jep detajet e para…

Elbasani u zgjua me të shtëna armësh, që rezultuan se kishin në shënjestër Ardian Çapja i cili mbeti i plagosur ndërsa një makinë e djegur u gjet në periferi të qytetit.

Si zakonisht qyteti u blindua nga forcat RENEA por atentatorët e “të fortit të Elbasanit” u larguan madje ata nuk lejuan zjarrfikësit as të shuajnë makinën që i kishin futur zjarrin. Punonjësi i zjarrfikses, Dashamir Muhaxhiri, 38 vjeç, u plagos në lagjen “Skënderbej” ndërsa ishte duke fikur një mjet tip “Wolkswagen” që ishte duke u djegur dhe mendohet se i përket autorëve të plagosjes së Ardian Çapjas.

 Çapja iu nënshtrua një ndërhyrje kirurgjikale dhe u nis drejtë Spitalit të Traumës për një shërim të specializuar por familjarët nuk kanë dhënë këtë version. Në spital uniformat blu deklaruan se ai është rrëzuar në shtëpi dhe është lënduar por shumë shpejtë pas raportimit të gjithë ngjarjes edhe Policia e Shtetit doli me një njoftim paraprak:

“Më datë 08.06.2020, rreth orës 09.37, në urgjencën e spitalit Elbasan, është paraqitur per ndihmë mjeksore shtetasi A.Ç.,rreth 55 vjeç, banues ne lagjen “Emin Matraxhiu”, Elbasan, dyshohet i plagosur me armë zjarri. Policia po punon për sqarimin e rrethanave të ngjarjes,” thekson Policia e Shtetit përme njoftimit.

Aktualisht Ardian Çapja është në Spitalin e Traumës në Tiranë dhe mësohet se është jashtë rrezikut për jetën.

Mësohet se Çapja ka qenë duke dalë nga banesa e tij kur disa persona i kanë hyrë nga pas, ku është një servis, dhe e kanë qëlluar në distancë.

Kush është Ardian Çapja

Ardian Çapja është një emër i njohur për policinë shqiptare, pasi edhe më herët është përfshirë në konflikte me persona të tjerë në qytetin e Elbasanit. Një atentat ishte zhvilluar ndaj tij në vitin 2017, që kishte qenë i mirëorganizuar, ndërsa ai u qëllua me kallashnikov e armë të tjera. Në atë kohë, autorët dështuan në atentat, pasi ishin zbuluar më herët.

Autorët më 2017, raporton BW, të cilët ende nuk janë identifikuar, për të shmangur çdo dyshim, kishin modifikuar automjetin e përdorur prej tyre në mënyrë identike me atë të një prej fqinjëve të fisit Çapja, duke përdorur dhe targa të falsifikuara me numra të njëjtë. Pasi e kanë mbajtur nën vëzhgim për disa ditë, autorët kanë ndërhyrë në momentin kur Ardian Çapja po dilte nga banesa e tij. Ata kanë qëlluar nga një distancë e largët në momentin kur 49- vjeçari ka qenë pranë derës.

Kur ka dëgjuar të shtënat, menjëherë ai është futur brenda duke u shpëtuar plumbave. Nga rindërtimi i ngjarjes, sipas grupit hetimor, Çapja i ka pikasur autorët dhe kjo ka bërë që këta të fundit të qëllojnë nga një distancë e largët. Ky është atentati i dytë që iu bë Ardian Çapjes, pasi më parë është tentuar eliminimi i tij fizik përmes predhës, por që nuk arriti të shpërthente, ngjarje kjo e ndodhur më 6 gusht 2017.

Ndërkohë, Policia bëri të ditur në atë kohë se po heton për zbulimin e pronarit të makinës së përdorur nga autorët, e cila u dogj jo shumë larg vendit të ngjarjes, në lagjen “5 Maji” në Elbasan. Nga ana tjetër, Policia ka identifikuar pronarin e automjetit tip “Benz”, që u gjet i djegur në lagjen “Kala” mëngjesin e së dielës dhe që fillimisht u dyshua se kishte lidhje me atentatin.

Nga hetimet, ka rezultuar se makina e djegur i përket një biznesmeni nga Tirana. Bëhet fjalë për Xh. Hoxhën, i cili e kishte denoncuar në Policinë e kryeqytetit. Vjedhja e makinës, në bazë të denoncimit të bërë nga Hoxha, kishte ndodhur rreth një javë më herët nga atentati në Tiranë.

Hoxha ka shkuar për të verifikuar nga afër nëse “Benz-i” i gjetur i djegur ishte i tij apo jo, duke konfirmuar se bëhej fjalë, pikërisht për automjetin e tij të vjedhur. Nga ana e saj, Policia hetoi mbi mundësinë e përfshirjes së automjetit të vjedhur në Tiranë në atentatin e ndodhur ndaj familjes Çapja, që nuk kishte asnjë indikacion.

Pavarësisht kësaj, Policia kishte dyshime se makina mund të jetë vjedhur për t’u përdorur në ngjarje kriminale dhe për këtë arsye nuk përjashtohet pista që djegia e saj mund të jetë bërë edhe nga autorët e atentatit ndaj Ardian Çapjes.

Ende nuk ka asnjë pistë konkrete për atentatin ndaj familjes Çapja më 2017, por më kryesorja lidhet me konfliktet e vjetra të fisit. Më 3 shkurt 2016 u vranë tre pjesëtarë të kësaj familjeje, kurse Florenc Çapja i shpëtoi një atentati të ndodhur në qershor 2016, ku mbeti i plagosur shoku i tij, Bledar Muça, me të cilin po udhëtonte në një makinë. Ndër vite, familja Çapja është akuzuar si e përfshirë në ngjarje kriminale, por edhe ka qenë pre e tyre.

Gjithçka ka nisur në vitin 2005, ku Sokol Çapja u përfshi në konflikt me ish-kreun e Qarkullimit Rrugor në Elbasan, Fadil Mema. Pas kësaj ngjarjeje mbeti i vrarë Sokol Çapja dhe si autorë u akuzuan nipat e oficerit të Policisë. Kjo pasoi me vrasjen e kunatit të Memës, Ardian Ibrahimi, në maj 2006.

Në vitin 2012, Gentian Beqiri, një nga të akuzuarit për vrasjen e Sokol Çapjes, u ekzekutua, ndërsa ishte lënë në arrest shtëpie. Ndërsa në mars 2015, në Torino të Italisë, u ekzekutua Fadil Mema.

Më pas, në shkurt 2016, mbetën të vrarë Agron Çapja, nipi i tij Ardit Sinakoli dhe Eno Bedalli, ndërsa mes tetë të plagosurve ishte dhe Florenc Çapja. Ndërsa në qershor 2016, Ardian Çapja, Florenc Çapja dhe Bledar Muça u arrestuan për sulm ndaj disa efektivëve civilë të Policisë pasi dyshonin se do të kryenin atentat ndaj tyre.