EMA gjen lidhjen mes vaksinës AstraZeneca dhe rasteve të trashjes së gjakut

Agjencia Evropiane e Ilaçeve tha se ka gjetur lidhje të mundshme në mes të vaksinës kundër koronavirusit, të kompanisë AstraZeneca dhe një çrregullimi të rrallë të trashjes së gjakut, mirëpo EMA thotë se përfitimet e vaksinës tejkalojnë rreziqet.

Përmes një deklarate, kjo Agjenci sot nuk ka vënë kufizime të reja në përdorim të vaksinës për personat mbi 18 vjeç por saktëson se shumica e rasteve që janë raportuar me trashje gjaku, janë gra nën moshën 60-vjeçare, brenda dy javëve të vaksinimit.

EMA thotë se bazuar në të dhënat aktuale, Agjencia nuk ka qenë në gjendje të identifikojë faktorë specifikë të rrezikut.

Ekspertët, raporton RFE, kanë rishikuar disa dhjetëra raste që janë raportuar në Evropë dhe Mbretëri të Bashkuar, ku 25 milionë persona kanë marrë vaksinën e kompanisë AstraZenenca.

“Rastet e raportuara të trashjeve jo të zakonshme të gjakut, pas vaksinimit me vaksinën e AstraZenecas, duhet të renditen si efekte të mundshme anësore të vaksinës,” tha shefja ekzekutive e agjencisë, Emer Cooke.