EMA miraton përdorimin e vaksinës Moderna

Rregullatori i barnave i Bashkimit Evropian, EMA, miratoi sot përdorimin e vaksinës kundër COVID-19, Moderna.

Kjo është vaksina e dytë që autorizohet nga Agjencia Evropiane e Barnave, pasi vaksina Pfizer/BioNTech e ka marrë dritën jeshile në fund të dhjetorit.

Miratimi i Modernës vjen në kohën kur BE po përballet me kritika për fushatën e ngadalshme të imunizimit, e cila mbetet prapa Shteteve të Bashkuara, Mbretërisë së Bashkuar apo Izraelit.

“Kjo vaksinë na ofron një mjet tjetër për të kapërcyer emergjencën aktuale,” tha drejtorja ekzekutive e Agjencisë Evropiane të Barnave, Emer Cooke.

Shefja e Komisionit Evropian, Ursula von der Leyen, tha se ky është një lajm i mirë për përpjekjet tona, për të sjellë sa më shumë vaksina COVID-19 tek evropianët.

Bashkimi Evvropian ka nisur vaksinimin më 27 dhjetor, por ritmi është i ngadaltë.

Vaksina Moderna thuhet se është 94.1 për qind efektive.

Javën e kaluar, Agjencia Evropiane e Barnave tha se vaksina e zhvilluar nga kompania AstraZeneca dhe Universiteti i Oxford, nuk ka gjasa të marrë dritën jeshile në BE në muajin e ardhshëm.