Emërimet në AKI, Vetëvendosje: Antikushtetuese, pazar i PAN-it të vjetër!
Pas vendimit të Ish-Kryeministrit Ramush Haradinajt për të emëruar Kreshnik Gashin Drejtor të ri të Agjencisë së Kosovës për Inteligjencë, AKI, dhe Burim Ramadanin Inspektor të Përgjithshëm të AKI-së, ka reaguar Lëvizja Vetëvendosje duke i konsideruar emërime antikushtetuese dhe pazar i PAN-it të vjetër
“Sot u njoftuam nga mediet për pazarin e ri të Thaçit e Haradinajt në kurriz të shtetit. Sa më shumë afrohet dita e largimit të PAN-it nga pushteti, aq më shumë po dalin në pah fijet që i mbajnë lidhur. Thaçi e mori drejtorin e AKI-së e Haradinaj e mori kryeinspektorin,” thekson Lëvizja Vetëvendosje duke shtuar:
“Propozimi nga Haradinaj dhe dekretimi nga Thaçi për të dy këto pozicione është përveç të tjerave dhe antikushtetues. Në dy drejtime, sepse ish-kryeministri s’mund ta ushtrojë këtë kompetencë e Presidenti s’mund të dekretojë propozime nga një ish-kryeministër.
Propozimet janë po ashtu emërime politike. I pari, ish-vartës i Hashim Thaçit në MPJ, u emërua si drejtor i AKI-së pasi që dështoi t’i mbrojë numrat e Z-mobile nga pozitat e drejtorit të bordit të ARKEP-it. I dyti u emërua kryeinspektor pasi dështoi të bëhej deputet i AAK-së, i cili mbahet mend për ankesat e tij rreth vjedhjes së votave që iu bënë nga brenda subjektit të tij. Duket se ky emërim ishte dhe rehatimi i tij” thekson Vetëvendosje në reagimin e saj duke përfunduar:
“Sigurisht që me t’u konstituuar institucionet ky vendim antikushtetues do të adresohet për këtë shkelje të rëndë e paprecedent. Ditët e abuzimeve të PAN-it kanë mbaruar, po ashtu edhe mundësitë e tyre për ta rrënuar më tej rendin kushtetues.”
Për të njëjtën çështje ka reaguar edhe anëtari i Lëvizjes Vetëvendosje, Haki Abazi.
“Vendimet në këtë kohë të kryeministrit të vetdorëhequr, për pozitat në AKI janë qellimkëqija dhe me prapavijë, njejtë sikur se edhe dekorimi i ish drejtorit të AKI-s. Këto vendime gjithashtu kanë për qëllim vazhdimin e kapjes së shtetit me militant partiak. Në këtë kohë mund të këtë vetëm ushtrues detyre dhe asesi okupime partiake sidomos ne vendet dhe pozitat me ndjeshmëri të lartë”, ka shkruar ai.
Edhe anëtari tjetër i VV-së, Mefail Bajçinovci, ka reaguar për këtë rast.
“Kapja e institucioneve të sigurisë po vazhdon. PDK dhe AAK i kapin brutalisht dy institucionet e sigurisë siç janë AKI dhe Inspektoriati i AKI-së duke i emëruar eksponentët e vet në pozita kyqe.
Ish- sekretari i MPJ-së Kreshnik Gashi në kohën kur Hashim Thaçi ishte minister i jashtem u emërua drejtor i AKI-së. Burim Ramadani zyrtar i AAK-së emërohet Kryeinspektor i AKI-se. Kapja e institucioneve me njerëz partiak po vazhdon. Këto vendime do të zhvlerësohen me ardhjen e qeverisë Kurti. BOLL MA,” thekson Bajçinovci.
