Emigrantët brenda një viti dërguan në Kosovë mbi 1.2 miliardë euro

Gjatë vitit 2022, diaspora ka dërguar në Kosovë 59.4 milionë euro më shumë. Për këtë periudhë, vlera më e lartë ishte gjatë muajit gusht me 131.6 milionë euro nga totali prej mbi 1.2 miliardë euro.

Pavarësisht krizës botërore të shkaktuar nga agresioni ushtarak rus në Ukrainë, mërgata vazhdon të kontribuojë në dërgimin e parave për familjet e tyre në Kosovë.

Të dhënat e Bankës Qendrore të Kosovë, BQK, tregojnë se gjatë vitit 2022, diaspora ka dërguar 59.4 milionë euro më shumë.

Për këtë periudhë, vlera më e lartë ishte gjatë muajit gusht me 131.6 milionë euro nga totali prej mbi 1.2 miliardë euro.

Sipas kanaleve të dërgimit, BQK-ja thotë se, 702.1 milionë euro janë transferuar me anë të agjencive të dërgesave të parëve, kurse pjesa tjetër me anë të bankave komerciale dhe kanaleve alternative.

Ndërsa, sa i përket dërgesave të mërgatës sipas vendeve, Gjermania është shteti ku më së shumti dërgohen para në drejtim të Kosovës. Nga ky vend kanë ardhur 41.2 për qind e dërgesave, ndjekur nga Zvicra me 20.2 për qind dhe Shtetet e Bashkuara të Amerikës me 9.1 për qind.

“Remitancat përbëjnë një ndër financuesit kryesor të konsumit, dhe kanë një pjesëmarrje prej 14.1 për qind në gjithsej Prodhimit të Brendshëm Bruto e gjeneruar në vend. Përveç faktorit altruist që karakterizon dërgesat e emigrantëve në Kosovë, e që mund të jetë përforcuar si pasojë e tkurrjes së të ardhurave të disponueshme në ekonomi si pasojë e inflacionit, rritja e remitancave gjatë muajve të verës mund t’i atribuohet edhe zhvlerësimit të euros ndaj valutave tjera”, thuhet në raportin e BQK-së për vlerësimin tremujor të ekonomisë.

Po ashtu sipas BQK-së në tremujorin e tretë është vërejtur një rritje.

“Në tremujorin e tretë të 2022-së, është vënë re një rritje prej 21.6 për qind e remitancave të dërguara përmes bankave, ndërsa remitancat përmes agjencive për transferimin e mjeteve shënuan rritje prej 14.3 për qind”.

Ndërsa sipas Bankës Botërore, pjesëmarrja e remitencave në PBB-në e Kosovës është rreth 20 për qind, ku nga shpallja e pavarësisë janë dërguar 13 miliardë euro.

Shuma e remitencave të dërguara sipas viteve në Kosovë: 2008 – 858 milionë euro, 2009 – 865 milionë euro, 2010 – 825 milionë, 2011 – 814 milionë euro, 2012 – 775 milionë euro, 2013 – 867 milionë euro, 2014 – 901 milionë euro, 2015 – 796 milionë euro, 2016 – 808 milionë euro, 2017 – 911 milionë euro, 2018 – 1.13 miliardë euro, 2019 – 1.23 miliardë euro, 2020 – 980 milionë euro dhe 2021 – 1.14 miliardë euro.

Për sa i përket vizitës së mërgatës në vend, Aeroporti Ndërkombëtar i Prishtinës “Adem Jashari” gjatë këtij viti thotë se ka shërbyer numrin më të madh të udhëtarëve ndonjëherë, pra rreth 3 milionë udhëtarë dhe 21,842 fluturime.

Top pesë destinacionet që kanë prirë për nga numri i udhëtarëve që kanë fluturuar drejt Prishtinës përfshin vendet si Zvicra, Gjermania, Turqia, Austria dhe Britania e Madhe.

Nga rezultatet preliminare të regjistrimit të diasporës, numri i qytetarëve të Kosovës që jetojnë në vende të ndryshme të Evropës dhe botës, të cilët i janë përgjigjur regjistrimit është rreth 350 mijë./Monitor/