Gjykata rrëzon “Planin Ruanda” të qeverisë britanike për emigrantët, Edi Rama miraton “Planin Shqipëria” të qeverisë italiane

Plani i qeverisë britanike për të dërguar në Ruanda emigrantët e paligjshëm, përfshirë dhe shqiptarët, është rrëzuar nga Gjykata e Lartë, duke i dhënë fund betejave ligjore në gjykatat e Mbretërisë së Bashkuar, ndërkohë Qeveria e Edi Ramës sot ka miratuar marrëveshjen me Italinë për deportimin e emigrantëve afrikanë nga Italia në Shqipëri.

Lordi Reed bëri të ditur sot vendimin unanim të gjyqtarëve të Gjykatës së Lartë britanike duke saktësuar se emigrantët që do dërgoheshin do të ishin në rrezik real për t’u kthyer në shtëpi, pavarësisht nëse arsyet e tyre për të kërkuar azil ishin të justifikuara apo jo.

Qeveria britanike ndërkohë tha se “nuk e ka problem me vendimin” dhe se Ruanda ishte “e përkushtuar ndaj detyrimeve të saj ndërkombëtare” për të drejtat e njeriut.

Plani ishte njoftuar për herë të parë nga Boris Johnson, në prill të vitit 2022, atëherë kryemunistër. Të gjithë kryeministrat e njëpasnjëshëm pohuan se politika do të vepronte si një pengesë për ata që kërkonin të kalonin Kanalin, si dhe do të ndihmonte për të shkatërruar bandat e kontrabandës së njerëzve.

Por gjyqtarët thanë se sipas Konventës së Kombeve të Bashkuara për refugjatët, azilkërkuesit duhej të mbroheshin nga “kthimi”, duke u kthyer në vendin e tyre, dhe ky nuk do të ishte rasti në Ruanda.

Lordi Reed vuri në dukje se Gjykatës së Lartë “i kërkohet të vendosë” nëse politika është “e ligjshme”, duke shtuar se kjo është një “pyetje ligjore” dhe gjykata “nuk është e shqetësuar me debatin politik” në lidhje me skemën.

Baza e vendimit, sipas tij, është marrë në të drejtën ndërkombëtare, duke përfshirë Konventën Evropiane për të Drejtat e Njeriut, por edhe traktate të ndryshme të OKB-së.

Ky propozim, nga organizatat bamirëse të refugjatëve vazhdimisht është cilësuar “çnjerëzor” duke theksuar se shkel ligjet e të drejtave të njeriut, ndërsa partitë opozitare e kanë konsideruar planin një “mashtrim”.

Në qershor të vitit të kaluar, Gjykata Evropiane e të Drejtave të Njeriut ndaloi fluturimin e parë për në Ruandë dhë ky Plan u përfshi në procese gjyqësore dhe deri më sot asnjë azilkërkues ende nuk është deportuar.

Ndërkohë Qeveria e Shqipërisë ka miratuar marrëveshjen me Italinë për emigrantët afrikanë të cilët do të vijnë në vendin tonë. Mësohet se ky vendim ka hyrë menjëherë në fuqi, ndërkohë tashmë pritet që të kalojë dhe në parlament.

Vendimi:

V E N D I M PËR PROPOZIMIN E PROJEKTLIGJIT “PËR RATIFIKIMIN    E PROTOKOLLIT, NDËRMJET KËSHILLIT TË MINISTRAVE   TË REPUBLIKËS SË SHQIPËRISË DHE QEVERISË SË REPUBLIKËS ITALIANE, PËR FORCIMIN E BASHKËPUNIMIT NË FUSHËN   E MIGRACIONIT”

Në mbështetje të nenit 100 të Kushtetutës dhe të nenit 17, të ligjit nr.43/2016, “Për marrëveshjet ndërkombëtare në Republikën e Shqipërisë”, me propozimin e ministrit të Mbrojtjes dhe të ministrit të Brendshëm, Këshilli i Ministrave

V E N D O S I:

Propozimin e projektligjit “Për ratifikimin e protokollit, ndërmjet Këshillit të Ministrave të Republikës së Shqipërisë dhe qeverisë së Republikës Italiane, për forcimin e bashkëpunimit në fushën e migracionit”, për shqyrtim e miratim në Kuvendin e Republikës së Shqipërisë, sipas tekstit dhe relacionit që i  bashkëlidhen këtij vendimi.

Ky vendim hyn në fuqi menjëherë.

K R Y E M I N I S T R I

EDI RAMA

Në mungesë dhe me porosi

ZËVENDËSKRYEMINISTRI

BELINDA BALLUKU.