Emigrimi masiv, 48 mijë shqiptarë u bënë shtetas të BE në vitin 2024

Vala e re e emigracionit masiv që ka përfshirë vendin po reflektohet në numrin e lartë të shtetësive që po marrin shqiptarët në një nga shtetet e Bashkimit Europian.

Të dhënat e fundit të Eurostat bëjnë të ditur se për shtetasit shqiptarë u dhanë 48 mijë shtetësi nga vendet e BE-së ku ata jetonin, duke i renditur ata të tretët, pas Sirisë dhe Marokut, dy shtete me një popullsi shumë më të lartë sesa Shqipëria.

Italia është vendi që ka dhënë më shumë shtetësi për shqiptarët, me 66 për qind të totalit, e ndjekur nga Greqia, me 22.3, Gjermania 6.6 për qind, Suedia 1.6 për qind dhe të tjerat 3.8 për qind.

Në Greqi, shqiptarët renditen të parët për marrjen e shtetësisë, dhe në Itali po ashtu.

Europa
Eurostat njoftoi se në vitin 2024, pothuajse 1.2 milionë persona fituan shtetësinë e vendit të BE-së ku jetonin, një rritje prej 11.6 për qind ose +122.700 persona krahasuar me vitin 2023. Numri i shtetësive të dhëna u rrit me 54.5 për qind krahasuar me vitin 2014, kur u dhanë gjithsej 762 100 shtetësi.

Pjesa më e madhe e këtyre shtetësive të reja u dha nga Gjermania 288.700 ose 24.5 për qind e totalit të BE-së, Spanja 252.500 ose 21.4 për qind dhe Italia 217.400 ose 18.5 për qind.
Shumica e përfituesve 88.0 për qind ishin nga vende jashtë BE-së, ndërsa shtetasit e vendeve të tjera të BE-së përbënin 10.6 për qind.

Në vitin 2024, ashtu si edhe një vit më parë, shtetasit sirianë përbënin grupin më të madh të qytetarëve të rinj të BE-së, me 110.100 shtetësi të dhëna. Shtetasit marokenë ishin grupi i dytë më i madh, me 97.100 shtetësi të dhëna, të ndjekur nga shqiptarët, 48.000.

Norma e natyralizimit tregon numrin e personave që fitojnë shtetësinë në një vend gjatë një viti, në raport me numrin total të banorëve jo-shtetas në fillim të atij viti.

Në vitin 2024, Suedia regjistroi normën më të lartë të natyralizimit ndër vendet e BE-së, me 7.5 shtetësi të dhëna për çdo 100 banorë jo-shtetas, e ndjekur nga Italia 4.1 dhe Spanja e Holanda me nga 3.9.

Në anën tjetër të shkallës, normat më të ulëta të natyralizimit për 100 banorë jo-shtetas u regjistruan në Lituani 0.1, Bullgari dhe Estoni, secila me 0.3.