Emmanuel Macron në Beograd

Presidenti i Francës, Emmanuel Macron ka filluar një vizitë dyditore në Serbi, ku përveç përurimit të punimeve në modernizimin e Aeroporti të Beogradit i cili tashmë është në duart e koncesionarit francez “Vansi” është parashikuar edhe firmosja e 22 marrëveshjeve në mes të dy vendeve ndërsa dialogu Kosovë-Serbi mendohet se është çështja kryesore e kësaj vizite.

Pasi u prit me bukë e krip dhe përuruan fillimin e punimeve të modernizimit në Aeroportin “Nikolla Tesla”, Presidenti i Serbisë, Aleksandar Vuçiç duke përshëndetur presidentin francez u shprehë:

“Jam shumë krenar që sot jeni këtu, në “Portën e Serbisë”, që t’ju falënderoj për besimin që i keni dhënë Serbisë, që keni nxitur ndërmarrësit që të investojnë në Serbi. Jam krenar që do t’ju gostiti sot dhe nesër. Kemi pritur vizitën tuaj, jam i bindur që miqësia jonë do të arrijë në kufijtë që dikur i kemi pasur,” tha Vuçiç.

Më pas Macron tha se është i lumtur që është për vizitë në Beograd. Me këtë rast ai kujtoi në lidhjet historike të Serbisë dhe Francës, duke theksuar se është koha që të kthehet faqja e re e marrëdhënieve në mes të Serbisë dhe Francës dhe porositi se Franca është vend miqësor.

Pas fjalës së rastit, Presidenti i Francës dhe ai i Serbisë iu drejtuan Pallatit të Drejtësisë “Serbia”, ku do të zhvillohet dhe një mbledhje e dy delegacioneve, për të vazhduar me një vizitë në varrezat e mbrojtësve të Beogradit në luftën e parë botërore.

Dita e parë e vizitës do të mbyllet me një vizitë në Kalemegdan, tek Përmendorja e falënderimit Francës.

Vizita e Presidentit të Francës në Serbi, për shtetin serb konsiderohet shumë e rëndësishme si nga aspekti politik ashtu dhe ekonomik e kulturor. Dy vendet do të firmosin 22 marrëveshje, para së gjithash për blerjen e pajisjeve ushtarake dhe armatimit francez, marrëveshjeve në fushën e transportit, drejtësisë dhe arsimit ndërkohë mediat franceze sot kanë raportuar se temat kryesore të bisedimeve do të jenë dialogu Kosovë-Serbi dhe integrimet europiane.

Ndryshe, për sigurinë e presidentit francez kujdesen 5.000 pjesëtarë të njësiteve speciale dhe shërbimeve sekrete, dhe, për jetën e Presidentit Macron do të kujdesen edhe legjionarët francez.