Energjia në 2022, prodhimi dhe konsumi në rënie, importet rritje 35%

Bilanci energjetik për vitin 2022, i publikuar nga Instituti i Statistikave nuk solli asnjë surprizë sa i takon zhvillimeve që përkufizuan sektorin. Ashtu sikurse pritej dhe ishte nënvizuar edhe më herët prodhimi rezultoi më i ulët sesa në vitin paraardhës kurse importet me një rritje dyshifrore në përqindje.

“ Gjatë vitit 2022, energjia elektrike në dispozicion u ul me 5,8 %. Prodhimi neto vendas i energjisë elektrike arriti vlerën 7.003 Gwh nga 8.963 GWh energji të prodhuar në vitin 2021, duke shënuar një rënie të prodhimit me 21,9 %. Ky prodhim u realizua nga hidrocentralet publike në masën 55,1 %, nga hidrocentralet private dhe koncensionare në masën 44,2 % dhe nga të tjerë prodhues (Fotovoltaikë) në masën 0,7 % të prodhimit neto vendas të energjisë elektrike.

Importi bruto i energjisë elektrike (energji në marrje) arriti vlerën 3.044 GWh nga 2.253 GWh që ishte një vit më parë, duke shënuar kështu një rritje me 35,1 %. Eksporti bruto i energjisë elektrike (energji në dhënie) arriti vlerën 2.123 GWh nga 2.800 GWh duke shënuar një rënie me 24,2 %” thuhet në publikimin e INSTAT.

Prodhimi

Të dhënat tregojnë se në total hidrocentralet publike, në vitin 2022, prodhuan 3.859 GWh nga 5.344 GWh të prodhuar në vitin 2021, duke shënuar kështu një rënie të prodhimit me 27,8 %. Ndërkohë hidrocentralet private dhe koncensionare, prodhuan 3.093 GËh nga 3.578 GWh të prodhuar një vit më parë, duke shënuar një rënie të prodhimit të energjisë elektrike me 13,6 %.

“Shkëmbimi i energjisë elektrike (diferenca mes eksportit dhe importit bruto të energjisë), në vitin 2022, ka arritur vlerën negative prej 921 GWh krahasuar me vitin 2021 ku kishte nje vlerë pozitive prej 548 GWh” vlerëson INSTAT.

Nga ana tjetër humbjet në rrjet kanë arritur vlerën 1.658 GWh nga 1.785 GWh duke shënuar kështu një rënie me 7,1 %. Humbjet në transmetim janë ulur me 12,3 % dhe pesha që zënë në totalin e humbjeve në rrjet është 12,1 %. Humbjet në shpërndarje sipas shifrave zënë një peshë më të madhe, rreth 87,9 % të humbjeve në rrjet dhe janë ulur me 6,4 %, krahasuar me vitin 2021

Bie konsumi, më e theksuar pas fashës

Bilanci i energjisë tregon se përdorimi i energjisë elektrike nga konsumatorët, në vitin 2022, arriti vlerën 6.266 GWh nga 6.630 GWh që ishte në vitin 2021.

“Përdorimi i energjisë elektrike nga konsumatorët familjarë u ul me 0,5 %, duke arritur vlerën 3.075 GWh nga 3.090 GWh që ishte në vitin 2021, ndërsa përdorimi nga konsumatorët jo familjarë u ul me 9,9 % duke arritur vlerën 3.191 GWh nga 3.540 GWh që ishte një vit më parë” thuhet në dokument.

Ndërkohë në analizën tremujore ajo që bie në sy është që në tremujorin e fundit kemi një rënie më të dukshme që duket se lidhet kryesisht me vendosjen e fashës 800 KWh. Qeveria vendosi qe cdo kilovat/ore mbi kete fashe do faturohej me 42 leke. Pavaresisht vendosjes ajo nuk gjeti asnje muaj zbatim.

Në tetor-dhjetor 2022 përdorimi i energjisë elektrike nga konsumatorët u ul me 15,5 për qind. Përdorimi nga konsumatorët familjarë u ul me 9,2 %, ndërsa përdorimi nga konsumatorët jo familjarë u ul me 21,0 për qind./Monitor/