Energjia, privatët prodhuan 40.7% të totalit, HEC-et e vegjël përfituan 136 mln euro

Kaskada e Drinit ka vijuar të jetë burimi kryesor i prodhimit të energjisë në vend ku nga rreth 6.2 milionë MWh që ishte prodhimi total në janar-gusht pjesa më e madhe i takon Korporatës Elektroenergjetike Shqiptare, KESH.

Konkretisht të dhënat zyrtare të 8-mujorit të publikuara nga Enti Rregullator i Energjisë tregojnë se KESH ka prodhuar 3.66 milionë MWh energji apo 59.4 për qind të sasisë së energjisë së prodhuar në vend ndërkohë që pjesa e privatëve ishte 40.7 për qind.

Hidrocentralet private të lidhur në rrjetin e transmetimit prodhuan 750 mijë MWh apo 12.1 për qind të totalit, ata të lidhur në rrjetin e shpërndarjes kishin një nivel lehtë më të ulët se grupi i parë duke përbërë 11.4 për qind të totalit.

Të dy këto grupe ku bëjnë pjesë prodhuesit me përparësi të energjisë apo HEC-et deri në 15 MW shesin energjinë tek kompania e shpërndarjes sipas një çmimi të caktuar nga Enti Rregullator i Energjisë në bazë të një formule standarde dhe që për vitin 2023 ishte 10 lekë/KWh.

Referuar sasisë totale të energjisë së prodhuar nga këto dy grupe që rezulton pak më shumë se 1.45 milionë MWh dhe duke llogaritur çmimin prej 10 lekë/këh këto subjekte kanë faturuar rreth 14.5 miliardë lekë apo rreth 136 milionë euro.

Ndërkohë grupi tjetër i privatëve që shesin në tregun e lirë, kryesohet nga Devoll Hyrdopower me HEC-et në kaskadën e Devollit i cili rezulton se ka prodhuar 5 për qind të totalit të energjisë në vend dhe më pas vijnë HEC-et Ulëz, Shkopet, Bistrica 1 dhe Bistrica 2 në administrim të Kurum International që kanë prodhuar mbi 269 mijë MWH energji duke përberë kështu 4.35 për qind të totalit.

Viti 2023 ka qenë një vit më i mirë nga ana hidrike sesa viti paraardhës duke i dhënë kështu mundësi kompanisë publike por edhe privatëve për të pasur një prodhim më të qëndrueshëm energjie çka ka ulur edhe nivelin e importeve të cilat deri në gusht ishin minimale.

Ndërkohë gjatë shtatorit dhe tetorit KESH ka nisur blerjet në tregun e lirë për të siguruar furnizimin me energji të vendit në kushtet kur edhe nivelet e kaskadës janë ulur por edhe optimizimit të prodhimit të saj./Monitor/