Epopeja e UÇK, Kurti: Marrëdhëniet me SHBA nuk mund t’i cenojë askush
Kryeministri i Kosovës, Albin Kurti tha sot gjatë fjalës së tij në kazermën “Adem Jashari” në manifestimin e ditës së Epopesë së Ushtrisë Çlirimtare të Kosovës se marrëdhëniet me SHBA-në nuk mund t’i cenojë askush.
“Populli është burimi dhe kuptimi i sovranitetit të shtetit. Qëllimi ynë është aleanca me Shtetet e Bashkuara të Amerikës dhe këtë aleancë nuk mund ta cenojë askush. SHBA-ja e do një Kosovë të fortë e të pavarur dhe mbron interesat e saj.”
Ndërkohë duke folur për Komandantin Legjendar të Ushtrisë Çlirimtare të Kosovës, ai tha se Adem Jashari është frymëzim për ushtarët e rinj.
“Është kënaqësi të jesh në prani të forcës së sigurisë së Kosovës. Ushtria çdo herë do të ketë hero komandantin legjendar Adem Jasharin i cili frymëzon ushtarët e rinj. Ishte kjo familje që njëherë e përgjithmonë na treguan neve edhe botës se kur është liria në pyetje nuk ka as çmim as forcë që mund t’i ndal për atdheun.”
Jasharajt tha Kurti na mësuan se asgjë nuk mund të arrihet pa unitet.
“Ne të gjithë jemi në shërbim të vendit dhe jo të vetvetes,” tha Kurti ndërsa foli edhe për përpjekjet për anëtarësimin e Kosovës në NATO dhe BE.
“Ata e bashkuan popullin dhe e ndryshuan çdo familje shqiptare. Ne kemi sakrifikuar që të kemi shtetin tonë dhe ushtrinë tonë.
Ne duam një ushtri të fortë dhe duam anëtarësimin në NATO. Ushtria është nevojë e kohës. Aleanca jonë me NATO është e domosdoshme. Anëtarësimi jonë në NATO dhe në BE duhet të përshpejtohet dhe të parandalojmë ndikimin e fuqive të huaja.” tha Kryeministri i Kosovës, Albin Kurti duke përfunduar:
“Jasharajt na mësuan se asgjë nuk mund të arrihet pa unitet. Ne të gjithë jemi në shërbim të vendit dhe jo të vetvetes!”
Ndryshe, sot me aktivitete të ndryshme është shënuar 22-vjetori i Epopesë së lavdishme të UÇK-së dhe komandantit të saj legjendar Adem Jashari.
Sot është zhvilluar ora e parë mësimore në të gjitha shkollat e Kosovës kushtuar Epopesë së UÇK-së. Në orën 09:00 ishte seanca solemne e Parlamentit të Kosovës, ku të pranishmëve iu drejtua kryeministri Albin Kurti, janë zhvilluar seanca solemne të Kuvendeve Komunale, ndërsa në orën 12:00, në kazermën “Adem Jashari” u bë parakalimi i Ushtrisë së Kosovës, ku trupave të FSK-së iu drejtua presidenti Hashim Thaçi, kryetarja e Parlamenti Vjosa Osmani, kryeministri Albin Kurti dhe përfaqësues nga familja Jashari.
Nesër më 6 mars, në ora 09:00 bëhen homazhe dhe vizita në Kompleksin Memorial ‘Adem Jashari’ në Prekaz, ku do të ketë vendosje kurorash nga tre liderët shtetërorë.
Në ora 12:00 bëhen homazhe në të gjithë Komplekset Memoriale të Dëshmorëve të UÇK-së, ndërsa në ora 17:00 mbahet akademi përkujtimore kushtuar komandantit legjendar Adem Jashari, familjes Jashari dhe gjithë dëshmorëve dhe të rënëve për liri.
Të pranishmëve u drejtohen me fjalim presidenti Hashim Thaçi, kryetarja e Kuvendit Vjosa Osmani, kryeministri Albin Kurti, historiani Agim Vinca, kryetari i Shoqatave të dala nga lufta Hysni Gucati dhe përfaqësues nga familja Jashari.
Në ditën e tretë dhe të fundit të Epopesë së lavdishme të UÇK-së, më 7 mars, në ora 12.00 bëhen homazhe pranë shtëpisë së familjes Jashari, në Prekaz, ku do të marrin pjesë kryeministri Kurti dhe kryeparlamentarja Osmani.
Në ora 18:00 mbahet Nata e Zjarreve në kompleksin memorial “Adem Jashari” në Prekaz, ku do të ndizen flakadanët, si dhe do të mbahet një program kulturor – artistik në sheshin “Adem Jashari” në Skenderaj.
