Epopeja e UÇK-së, homazhe në Prekaz, Osmani:
Duke përkujtuar sakrificën e komandantit legjendar Adem Jashari dhe të gjithë luftëtarëve të Ushtrisë Çlirimtare të Kosovës, Presidentja Vjosa Osmani ka bërë homazhe në kompleksin memorial “Adem Jashari” në Prekaz, në kuadër të aktiviteteve për përkujtimin e Epopesë së UÇK-së.
“Në këtë Epope të UÇK-së kthehemi sërish në Prekaz, vendin që simbolizon një sakrificë të paçmuar për lirinë tonë dhe rrugëtimin më të pastër, plot me sakrifica, që na mundësoi sot të kemi shtetin tonë,” tha Vjosa Osmani duke shtuar se çdo vizitë në Prekaz rikthen dhimbjen për ata që humbën jetën gjatë luftës, duke përfshirë jo vetëm komandantin Jashari dhe bashkëluftëtarët, por edhe shumë gra e fëmijë që ranë viktima.
“Prekazi mbetet udhërrëfyes për rrugën tonë përpara, një kujtesë e përjetshme e angazhimit dhe sakrificës që ka formësuar lirinë dhe shtetin tonë.”
Pas homazheve te varrezat e Jasharëve, Presidenta e Kosovës, Vjosa Osmani vizitoi edhe kullën ku u prit nga Baca Rifat Jashari.
Ndërsa Kryeministri Albin Kurti pasi bëri homazhi me kabinetin e tij qeveritar tha se kanë ardhur në Prekaz për të ia kujtuar vetes çmimin e lartë që është paguar për shtetin e pavarur dhe sovran, për çlirimin e Kosovës dhe për lirinë e popullit dhe të qytetarëve.
“Tre breza të Jasharëve, gjatë tri ditëve, u flijuan për çlirimin e vendit, lirinë e popullit, për Republikën dhe për bashkimin tonë, andaj familjes Jashari ne ia kemi borxh të përjetshëm e të pashlyeshëm angazhimin e përditshëm që ta ruajmë e ta mbrojmë shtetin dhe të drejtat dhe liritë e qytetarëve pa dallim,” tha Albin Kurti duke shtuar se sot Kosova ka ushtrinë e saj, e cila është amanet i Adem Jasharit.
Ndërkohë Kryetari i PDK-së, Bedri Hamza, bashkë me strukturat e Partisë Demokratike të Kosovës kanë bërë homazhe në Prekaz me rastin e Epopesë së UÇK-së, ku ka nderuar sakrificën e familjes Jashari dhe të gjithë të rënëve për lirinë e Kosovës.
“Jemi në Prekaz për të shprehur respekt dhe për të bërë nderim në themelet e lirisë dhe pavarësisë së Kosovës, duke theksuar se ky respekt duhet të jetë gjithmonë deri në përulje. Çfarëdo që të bëhet sot nuk është e barazvlefshme me veprën dhe sakrificën që kanë bërë Jasharajt, duke shtuar se respekti për ta duhet të jetë i përjetshëm,” tha Bedi Hamza duke e konsideruar Prekazin si një vend që duhet të shërbejë si frymëzim për të punuar për të ardhmen e shtetit dhe të fëmijëve.
Si gjithmonë edhe këtë vit ka bërë homazhe në Prekaz me rastin e Epopeja e UÇK-së, Kryetari i Bashkimit Demokratik për Integrim, Ali Ahmeti, ku ka nderuar sakrificën e familjes Jashari dhe të gjithë të rënëve për liri.
“Liria fitohet me gjak dhe në Prekaz u dëshmua sakrifica e një familjeje të tërë që qëndroi krah për krah me burrat dhe vëllezërit, duke u flijuar që nga ajo flakë të lindë liria, pavarësia dhe drejtësia,” tha Ali Ahmeti dhe në këtë vend janë rrënjët e shtetit më të ri të Evropës.
“Sot në Prekaz nuk ka parti politike, por një betim për të mbrojtur identitetin dhe dinjitetin e Ushtria Çlirimtare e Kosovës.”
Ndryshe, në kuadër të aktiviteteve shtetërore në shënim të 28-vjetorit të Epopesë së UÇK-së, krerët institucional dhe politikë bënë homazhe në Kompleksin memorial “Adem Jashari”, në Prekaz, për të vazhduar me agjendën e 6 dhe 7 mars, të Epopesë së UÇK-së.
10:00 – Krerët e shtetit homazhe në Kompleksin Memorial “Adem Jashari” në Prekaz;
10:00–12:00 – Homazhe nga përfaqësuesit komunalë në Kompleksët Memoriale të dëshmorëve;
13:00 – Ekspozitë “Tri ditë që ndryshuan historinë” e organizuar nga Kuvendi i Republikës së Kosovës;
19:00 – Akademi përkujtimore për Epopenë e UÇK-së, me pjesëmarrje artistike nga Opera dhe Filarmonia e Kosovës në Pallatin e Rinisë (Salla e Kuqe);
21:00 – Mbyllja e ceremonisë.
7 Mars
18:00 – Nata e Zjarreve në Prekaz;
18:15 – Ndezje e flakadanëve në shtatë rajonet e Republikës së Kosovës;
19:00 – Program artistik në sheshin “Adem Jashari” në Skenderaj.
Kujtojmë se sulmi i gjerë që Serbia e kishte ndërmarrë në Drenicë për të eliminuar Ushtrinë Çlirimtare të Kosovës ishte kthyer në një rrethim të hekurt për Lagjen e Jasharëve në Prekaz, që ishte qendra dhe simboli i luftës për liri në Kosovë.
Kjo ngjarje e rëndë më 5, 6 e 7 mars të vitit 1998 kishte ngritur çështjen e Kosovës në krye të agjendës botërore, dhe vazhdon të jetë një kujtim i lavdishëm për historinë e kombit tonë.
