Erdhën në Tiranë! Ja që Ne nuk ishim afganë…
Mbërrijnë në Shqipëri qytetarët e parë afganë, të cilët u pritën nga Ministrja për Evropën dhe Punët e Jashtme, Olta Xhaçka dhe Ambasadorja e SHBA, Yuri Kim
Avioni që transportonte grupin e parë të të shpëtuarve nga Afganistani i pushtuar nga talibanët, me rreth 121 afganë, mes tyre 11 foshnja mbërriti në Aeroportin “Nënë Tereza” në orën 03:15.
Ndonëse grupi i parë i nisur nga Kabuli ka bërë një zbritje në Tbilisi të Gjeorgjisë për t’u nisur më pas drejt Shqipërisë, zbritën nga avioni, zunë radhën dhe iu nënshtruan kontrolleve mjekësore në stendat e ngritura posaçërisht në Rinas për të vazhduar me planin e strehimit në struktura hoteliere, ashtu siç ishte dhe itinerari i planifikuar nga qeveria por asnjëri nuk i ngjante refugjatëve shqiptarë të fillimviteve ’90 siç i kishte pasqyruar Kryeministri Edi Rama në mediat botërore.
Po, një numër i konsiderueshëm prej tyre ishin gra dhe fëmijë që u larguan nga vendlindja e tyre sepse ishin të rrezikuar nga talibanët por asnjëri nuk u pa të çirrej kundër kriminelëve talibanë dhe të gërthet se nuk kishte ngrënë bukë, asnjëra prej grave të mbuluara, dhe ishin të gjitha, nuk hoqi shaminë me të mbërritur “në liri” dhe asnjëra nuk hoqi burkën se “e kishin detyruar talibanët”.
Pra, ishin refugjatë, por jo si Ne ose më saktë, Ne nuk paskemi qenë afganë kurrë! Aq më pak si një piktor shqiptar që hapte ekspozitë në Greqi sepse refugjatët shqiptarë ishin në kërkim të tokës së premtuar!
Dhe ustai i propagandës që për fatin e keq të shqiptarëve është Kryeministër, Edi Rama, vazhdon me reklamën:
“Dhe me këtë episod live mikpritjeje shqiptare, që na kujton kush ishim dikur e na bën nder si vend e si popull, që krenohemi me traditën jo veç me fjalë, ju uroj një ditë të mbarë të gjithëve, duke i uruar së bashku me të gjithë ju mirëseadhjen, në tokën ku ligji i të parëve thotë se shtëpia e shqiptarit është e Zotit dhe e mikut, edhe 121 fëmijëve, grave e burrave nga Afganistani fatkeq, të cilët braktisën shtëpinë e tokën e tyre, për të shpëtuar jetën,” thekson Edi Rama në reagimin e tij përmes rrjetit social Facebook duke reklamuar mjete të emergjencave civile që shqiptarët nuk i panë as në këto tre muaj vere kur ishin të rrezikuar nga zjarri!
Ndryshe, Kryeministri Rama në intervistën e fundit për mediat e huaja është shprehur se në Shqipëri mund të strehohen deri në 4000 afganë. Cili është numri i saktë i afganëve që do të strehohen në Shqipëri sepse kjo varet nëse Edi Rama do të jep edhe ndonjë intervistë për mediat e huaja ppor e sigurt është se do të akomodohen në Durrës, Tiranë dhe Berat.
Por, mos harroni, nuk është e lehtë të jeshë Edi Rama!
