Erdhi dita/ Urojnë edhe të dëshpëruarit Rama-Meta

Ndonëse ishin në pritje të fitores së PDK-së përkatësisht AAK-së, Kryeministri Edi Rama dhe Presidenti Ilir Meta urojnë fituesin i cili miqtë e tyre, Kadri Veseli dhe Ramush Haradinaj, i shporri nga pushteti.

Kështu Kryeministri Edi Rama e nisi ditën me urimin drejtuar Kosovës dhe Vetëvendosjes së Albin Kurtit.

“Urime Kosovës për zgjedhjet e suksesshme parlamentare🇽🇰Urime Vetëvendosjes e Albin Kurtit për rezultatin më të mirë. Urime LDK e Vjosa Osmanit për rezultatin e dytë më të mirë. Urime PDK e Kadri Veselit për pranimin shembullor të rezultatit. Sa më e mbarë dita e re për Kosovën,” thekson Edi Rama përmes rrjetit social Twitter.

Ndërsa për Presidentin e Republikës, Ilir Meta, zgjedhjet e djeshme në Kosovë, janë një shembull i shkëlqyer i funksionimit të demokracisë dhe i besimit te demokracia dhe vota e lirë.

“Urime qytetarëve të Kosovës dhe klasës politike, që i treguan mbare botës se shteti i Kosovës është jo vetëm tërësisht funksional, por edhe një shembull i demokracisë në rritje, në një rajon që ende vuan nga autoritarizmi dhe pamundësimi i zgjedhjeve tërësisht të lira, si ato që e gjithë bota ndoqi dje në Kosovë!”