Erdhi si shpresë për shqiptarët, largimi i Yuri Kim vlerësohet si shpresë shumë e madhe!

Sot Ambasadorja e SHBA në Tiranë, Yuri Kim, në fjalën e saj të fundit për opinionin shqiptar si amabsadore nuk ishte aq e rëndësishme si ajo ambasadorja e cila shkeli për herë të parë në tokën shqiptare, për të cilën shqiptarët e terrorizuar nga regjimi Edi Rama, e konsideronin si shpresën e vetme, aq më shumë që vinte në kohën e një administrate republikane dhe pas një fijaskoje të madhe të Diplomacisë Obama; Dhe, çuditërisht po këta shqiptar që shpresonin aq shumë në përfaqësuesen e shtetit amerikan, sot iu rikthehet shpresa kur mësuan se ajo po largohet!

Kështu, problemet shqiptare janë po ato sikur në ditën kur mori detyrën Yuri Kim, me agravimin e theksuar me sistemin e ri të Drejtësisë që u krijua me ndihmën e vetë amabsadores amerikane, dhe sot ajo i thekson si “detyra të shtëpisë”: Të zgjidhet çështja e pronave dhe të çrrënjoset korrupsioni!

“Këto investime do e ndihmojnë Shqipërinë për shpërndarjen e energjisë në rajon, në qershor të 2022 nënshkruam memorandumin për bashkëpunimin për rrjetin 4G. Investimet e huaja të SHBA arritën në një nivel të ri, që është dyfishi i asaj të pandemisë. Tregtia jonë dypalëshe është rritur në mënyrë të vazhdueshme.

Eksportet janë 3 herë më të larta se dy vjet më parë. Jam besimplotë që investimet e SHBA do të rriten dhe Shqipëria do të modernizojë sistemin për rregullat e biznesit, të zgjidhë kërkesat dhe zbatojë të drejtat e pronës dhe të çrrënjos korrupsionin.

Çështja e reformës në drejtësi, çrrënjosja e korrupsionit nuk është vetëm kusht i SHBA, por dhe që Shqipëria të jetë aleate e fortë. SHBA ishin krenare që ndoqën udhëheqjen tuaj kur Shqipëria udhëhiqte OKB. Duhet të theksoj se nuk janë rregullat ato që kërcënojnë paqen, por thyerja e tyre që e kërcënojnë atë,” tha Ambasadorja Kim për drejtësinë e cila me ndihmën e saj nga një drejtësi e korruptuar shqiptare u shndërrua në një drejtësi të korruptuar shqiptare nën kontrollin e Edi Ramës.

Gjithsesi, Ambasadorja Kim në fjalën e saj sot deklaroi se shqiptarët kanë treguar se po zbatojnë rregullat, duke u shprehur me besim se do të vijë edhe dita që nuk do të kërkohet më vizë.

“Ndërsa shqiptarët tregojnë se po zbatojnë rregullat, kam besim se do të vijë dita që nuk do të kërkohet fare vizë,” tha Ambasadorja Kim duke u mburrur me rezultate pozitive të Reformës në Drejtës edhe pse shtoi se ka ende shumë punë për të bërë.

“Shqipëria ka ndërmarrë reforma të vështira, veçanërisht ajo në drejtësi. Ajo po jep rezultat. Edhe pse ka shumë punë për të bërë. Ne nuk do të ndalemi kurrë duke mbështetur Shqipërinë, ndërsa kemi forcuar demokracinë në vend. Bashkëpunimi ynë për mbrojtjen ka sjellë rezultate të mira,” tha Yuri Kim duke mos harruar dhe sulmet kibernetike:

“SHBA ka afruar 50 mln dollarë për mbrojtje kibernetike, Kjo është paketa më e madhe e ofruar ndonjëherë.”

Ambasadorja amerikane në ikje sot e tha qartë se SHBA mbështetë aksionin e djeshëm të policisë në kampin e muxhahedinëve ndryshe nga broçkullat e djeshme të ministrit të Brendshëm Çuçi dhe ato që raprotonte Evropa e Lirë “për një zëdhëdhënës të DASH” ndërsa për vendimin nëse duhet larguar MEK nga Shqipëria ajo ishte e prerë:

“Është një vendim që duhet ta marrë qeveria shqiptare. Një gjë është shumë e qartë që ne mbështesim të drejtën e Shqipërisë për të zbatuar ligjet e saj në vendin e saj. Ka terma të caktuar që zbatohen për çdo mysafir dhe këto duhet të zbatohen prej tyre, duhet ti respektojnë ato.”

Sot, Ambasadorja Yur Kim konfirmoi dhe gjithë skepticizmin e atyre shqiptarëve që kishin për postin e saj të ri në DASH ndërsa para syve kanë modele ambasadorësh amerikanë si Rajerson, Zimnermann, Hill, Montgomery, Rice, Reeker, që ishin dhe janë njohës të mirë të rrethanave ballkanike dhe nuk iu dha një rast i tillë. Me pak fjalë mbi Asociacionin, ajo tha shumë:

“Sa i përket Asociacionit, udhëheqësit e Kosovës dhe Serbisë kanë rënë dakord për këtë . Ata kanë rënë dakord për rrugën për të ecur përpara dhe për njohjen e Kosovës. Angazhimi ynë është për një Kosovë të pavarur dhe sovrane dhe nëse keni nevojë për prova do t’ju rekomandoja të hidhni sytë disa vite pas. Çështja qëndron cilat janë hapat në mënyrë që të dy palët të lëvizin së bashku. Udhëheqësit duhet të lënë mënjane egon dhe të marrin në konsideratë atë që u thuhet nga miqtë e tyre.

Ne pozicionin tim të ardhshëm do të kem përgjegjësi për të gjithë Europën dhe përfshin edhe Shqipërinë. Jo të gjithë janë të kënaqur për këtë, por unë jam e kënaqur. Jam ndryshuar nga përvoja ime këtu. Nëse kthehem apo jo në Shqipëri, Shqipëria do të jetë gjithmonë me mua. Dua t’u kujtoj të gjithëve për rolin kritik thelbësor që një media  e pavarur ka në një demokraci. Portalet mediatike mund të jenë biznes, por gazetarët kanë përgjegjësi.”

Në fund, sot, Yuri Kim nuk e tha por detyrë parësore e politikës shqiptare është të ulet antiamerikanizmi në shoqërinë shqiptare i cili u ngjizë me politikën e Lulzim Bashës si përgjigje ndaj politikës parimore të Ambasadorit Donald Lu, dhe u agravua me politikën favorizuese të Yuri Kim ndaj pushtetit të Edi Ramës dhe shpalljen e Ish-Presidentit Sali Berisha si person non grata për korrupsion, në ditët më të errëta të Qeverisë Rama!

Ndryshe, pavarësisht se diplomatja Yuri Kim u gradua nga DASH dhe do jetë përgjegjëse për gjithë Evropën duke përfshirë dhe Shqipërinë, nga shqiptarët që nuk janë komunist do të kujtohet si diplomatja më e dështuar amerikane në tokën shqiptare, të cilën e la pa opozitë !

Dhe, po ata shqiptarë që nuk janë komunist, presin ditë më të mira vetëm me mikun e tyre, Amerikën, për të zgjidhur çështjen e pronës dhe për të çrrënjosur korrupsionin!