Erdogan në Tiranë, nënshkruhen 4 marrëveshje bashkëpunimi Turqi-Shqipëri
Presidenti Erdoğan dhe kryeministri Rama nënshkruan Deklaratën e Përbashkët për Thellimin e Partneritetit Strategjik të vendosur me krijimin e Këshillit të Bashkëpunimit të Nivelit të Lartë.
Midis Turqisë dhe Shqipërisë janë nënshkruar 4 marrëveshje në fushat e bashkëpunimit, komunikimit, arsimit dhe bujqësisë, raporton Agjencia turke e lajmeve, Anadolu.
Para konferencës për media në prani të presidentit turk Recep Tayyip Erdogan dhe kryeministrit shqiptar Edi Rama, janë nënshkruar marrëveshjet midis dy vendeve.
Presidenti Erdogan dhe kryeministri Rama nënshkruan Deklaratën e Përbashkët për Thellimin e Partneritetit Strategjik të vendosur me krijimin e Këshillit të Bashkëpunimit të Nivelit të Lartë ndërmjet Qeverisë së Republikës së Turqisë dhe Qeverisë së Republikës së Shqipërisë.
Memorandumi i Mirëkuptimit për Bashkëpunimin në fushën e Marrëdhënieve me Publikun dhe Komunikimit ndërmjet Turqisë dhe Shqipërisë u nënshkrua nga kreu i Komunikimeve pranë Presidencës turke, Fahrettin Altun, dhe Drejtori i Përgjithshëm i Agjencisë për Media dhe Informim i Republikës së Shqipërisë, Alteo Hysi.
Deklarata e synimit për bashkëpunim në fushën e sigurimeve bujqësore të mbështetura nga shteti ndërmjet Ministrisë së Bujqësisë dhe Pylltarisë së Republikës së Turqisë dhe Ministrisë së Bujqësisë dhe Zhvillimit Rural të Republikës së Shqipërisë u nënshkrua nga ministri turk Ibrahim Yumaklı dhe ministrja shqiptare Anila Denaj.
Ndërkaq, protokolli për Hapjen e Degëve dhe Programeve Akademike të Universitetit Teknik të Stambollit në Shqipëri, ndërmjet Ministrisë së Arsimit dhe Sportit të Republikës së Shqipërisë dhe Kryesisë së Këshillit të Arsimit të Lartë të Republikës së Turqisë, u nënshkrua nga kryetari i Këshilli të Arsimit të Lartë (YÖK), Erol Özvar, dhe ministrja shqiptare Ogerta Manastirliu.
Ndërkohë në orën 16:30 u zhvillua ceremonia e inaugurimit të Xhamisë së Namazgjasë në tokën e cila iu rrëmbye Familjes Kruja në prani të presidentit turk Recep Tayyip Erdogan dhe kryeministrit shqiptar, Edi Rama por jo dhe Kryetarit të Komunitetit Mysliman, Bujar Spahiu.
“Faleminderit dhe mirënjohje president i Turqisë! Miku im, i gjithnjë mirëseardhur në Shqipëri, në këtë shtëpinë tonë të vogël ku ka banesa të shumta, për përkushtimin tënd vëllazëror, për t’iu përgjigjur lutjeve të Komunitetit Mysliman Shqiptar, i dha bashkësisë myslimane të shqiptarëve mjetet e nevojshme për ndërtimin e kësaj xhamie të madhe, e cila ndër breza do ta dëshmojë gjestin tuaj dhe do t’u flasë të gjithëve për lidhjen e pazgjidhshme mes dy popujve dhe vendeve tona,” tha Edi Rama dhe ashtu siç rrëmbeu tokën e Familjes Kruja, nuk i lejoi kreut të KMSH, Bujar Spahiu të marrë pjesë në këtë ceremoni ashtu dhe caktoi kryekujdestarin e këtij tempulli, kryemyftiun e Tiranës Bilal Teqja, për të cilin pati një urim.
“Qoftë e mbarë dhe këmba e kryemyftiut të Tiranës Bilal Teqja (Gazment Teqja) i cili prej dje do të jetë kryekujdestari i këtij tempulli dhe u priftë e mbara të gjithë besimtarëve myslimanë. Zoti e bekoftë Shqipërinë dhe na ndihmoftë në rrugën tonë pa kthim e as ndalim drejt majës ku duam të ngremë Flamurin e Skënderbeut e Ismail Qemalit në një Shqipëri të denjë e të mirë për të gjithë shqiptarët pa dallim feje, krahine e ideje,” tha Edi Rama ndërsa Presidenti turk Erdogan, xhaminë e Namazgjasë e quajti simbol të miqësisë vëllazërisë dhe solidaritetit mes Shqipërisë e Turqisë.
“Xhamia e Namazgjasë do të jetë simbol i miqësisë vëllazërisë dhe solidaritetit mes nesh. Xhamia e Namazgjasë është ndërtuar jo vetëm si një objekt kulti, adhurimi, por është menduar multifunksionale që do i shërbejë besimtarëve në çdo aspekt, duke e menduar si një kompleks social ku brenda saj ka sallën e konferencës, bibliotekën dhe dhoma studimi dhe ashensorë për të gjithë ata që janë me aftësi të kufizuara.
Ne synojmë të pasqyrojmë trashëgiminë e pasur kulturore të Shqipërisë nën moton e muzeut të bashkëjetesës së kulturave ballkanike që ndodhet brenda kompleksit të xhamisë’,- tha Erdogan duke theksuar se është i vendosur për të thelluar bashkëpunimin.” tha Erdogan.
Pas kësaj ceremonie, nuk ishte e qartë pse Presidenti turk Erdogan, me gjithë këtë miqësi e vëllazëri vendosi që natën e sotme ta kaloi në Serbi, me presidentin serb Aleksandar Vuçiç.
