Erdogan shpreson në marrëveshje të shpejtë mes Kosovës dhe Serbisë për targat

Presidenti turk, Recep Tayyip Erdogan, tha se shpresën që Kosova dhe Serbia së shpejti do të arrijnë marrëveshje për targat e makinave.

“Theksojmë se jemi të gatshëm të ofrojmë gjithë mbështetjen tonë, sido që të mundemi. Ballkani nuk mund të tolerojë më këtë lloj problemi,” tha sot Erdogan gjatë një takimi me presidentin e Serbisë, Aleksandar Vuçiç në Beograd.

Nga 1 shtatori, Qeveria e Kosovës ka nisur zbatimin e vendimit të saj për riregjistrimin e makinave me targat që i lëshon Serbia në RKS – Republika e Kosovës. Procesi pritet të zgjasë dy muaj.

Serbia kërkon negociata për këtë çështje, duke propozuar targa neutrale ndaj statusit të Kosovës, por Qeveria e Kosovës nuk pranon një gjë të tillë.

Kërkesa për “Bajraktar”

Vuçiç tha se në takim me Erdoganin kanë diskutuar për bashkëpunim më të madh ushtarak ndërsa ka përsëritur se Serbia dëshiron të blejë dronë turq “Bajraktar”.

“Ne jemi të një linje dhe unë shpresoj se do të mund të arrijmë diçka të tillë vitin tjetër. Ne jemi të gatshëm të paguajmë më shumë para sesa ishim pajtuar në të kaluarën dhe të ofrojnë qindra miliona euro,” tha Vuçiç duke i kërkuar presidentit turk që t’i ndihmojë në sigurimin e energjisë elektrike nga Azerbajxhani në Serbi.

“I kam kërkuar të na ndihmojë në këtë çështje dhe të na sigurojë hapësirë për dërgimin e 100 megavatëve të energjisë nga Azerbajxhani në territorin tonë, sepse diçka e tillë do të na lehtësonte situatën në muajt e dimrit,” tha presidenti serb.

Politikat e Perëndimit ndaj Rusisë, “provokative”

Pas propozimit të Bashkimit Evropian për një çmim tavan për gazin rus, presidenti turk, Erdogan, tha se nuk i konsideron të drejta politikat “provokative” të Perëndimit ndaj Rusisë..

Ndërkohë Presidenti rus, Vladimir Putin, ka kërcënuar me ndaljen e të gjitha furnizimeve nëse BE-ja merr një hap të tillë./RFE/