Erion, ti nuk ke kapele për Rudinën

nga Kreshnik Çollaku 

Hipokrizia këtë herë të përzien stomakun.

Përmes gjithë kallaballëkut të llafeve për mandatet e opozitës, nuk mund të mungonte Erioni, kryetari i bashkisë.

Në mes fushatës së pemëve, dhe referendumit për ditën e Verës, nuk mund të digjte rastin për tu përzier në këtë çështje.

Sot e kishte me Rudinën. 

Sigurisht këto ditë Rudina tërheq vëmendje, e bashkë me vëmendjen krijon dhe një situatë jo komode për PD.

Erionit të bashkisë, më shumë se çdo goditje ndaj PD, vëmendja i duhet.

I kishte ngritur Rudinës kapelen.

Gjest delikat,vëmendjen e tërheq.

Ai, kundërshtari që jep medaljen e konstruktivitetit të kundërshtarit, me një kapele.

Por bashkë me vëmendjen prej Rudinës, kryebashkiaku nuk ka si shmang vëmendjen për pirgun e “qelbësirave” ku rri ulur e prej të cilëve mori pushtet, karrige dhe zyre.

Në mes atij pirgu plehrash Erion, qëndrojnë dhe ata që ideuan, sponsorizuan, realizuan e pjesa e mbetur duartrokitën ekzekutimin e babait të Rudinës.

Ata janë aty poshtë karriges tënde Erion, e mbajnë fortë se u duhet karrigia, tenderat, kullat, impiantët. U duhet paraja Erion, jo ti. 

Ti ke zgjedhur tu shërbesh edhe pse të duket se po të shërbejnë. Ndaj pa larguar atë pirg plehrash ku rri ulur Erion, ti s’ke kapele për Rudinën.