Erion Veliaj në GJKKO, pritet rivlerësimi i masës së sigurisë

Kryetari i Bashkisë Tiranë, Erion Veliaj, i cili u arrestua me kërkesën e SPAK dhe vendim të GJKKO mesditën e 10 Shkurtit, ka mbërritur sot në Gjykatën e Posaçme të Shkallës së Parë për Korrupsionin dhe Krimin e Organizuar për rivlerësimin e masës së sigurisë.

Në GJKKO është paraqitur edhe bashkëshortja e kryebashkiakut, Ajola Xoxa, e cila është lënë në masë sigurimi “arrest shtëpie”.

Ndërkohë në GJKKO janë shfaqur edhe 5 biznesmenët shqiptarë, Elman Albule, i cili u arrestua, dhe Gentjan Sula, Meriman Palushi, Fatmir Bektashi e Shkelqim Fusha, ndaj të cilëve është caktuar masa “detyrim paraqitje”.

Ndryshe, Kryetari i Bashkisë Tiranë, Erion Veliaj, është në qeli prej dy ditësh për, siç ka sqaruar SPAK, kryerjen e veprës penale të “Korrupsioni pasiv i funksionarëve të lartë shtetërorë ose i të zgjedhurve vendorë”, kryer në bashkëpunim (9 herë) dhe “Pastrimi i produkteve të veprës penale ose veprimtarisë kriminale”, parashikuar nga neni 260 e 25 dhe 287/2 i Kodit Penal.

SPAK përmes njoftimit ka sqaruar se Kryetari i Bashkisë Tiranë, Erion Veliaj, përmes veprimeve konkrete të cilat kanë kulmuar me nënshkrimin e tij ka miratuar në çdo rast shpërndarjen e fondeve publike si edhe lejet e ndërtimit tek disa subjekte tregtare, të lidhur ngushtë me të.