Erzen Breçani s’ka qenë bodyguard i Sali Berishës: Çdo njeri që shkel ligjin, duhet të marrë atë që meriton

Kryetari i Partisë Demokratike, Sali Berisha, e nisi sot konferencën e përjavshme duke nderuar me një minutë heshtje ndarjen nga jeta të aktorit Zef Deda, për të vazhduar me publikimin e dokumentave lidhur me skandalin “Rama-Bolino”, akuzat ndaj SPAK-ut dhe në fund edhe të dyshes kriminale Basha-Balla.

I pashmangshëm ishte dhe qëndrimi për arrestimin e Ish-Drejtorit të Policisë së Tiranës, Erzen Breçani, dhe lidhjet për të cilat folën mediat në shërbim të Edi Ramës të Breçanit me Kryetarin e PD, duke e pagëzuar madje edhe si bodyguard të Sali Berishës!

“Sot është një ditë zie për artin, skenën, Shkodrën dhe artdashësit e mbarë Shqipërisë, mbasi dielli perëndoi përgjithmonë për artistin e mirënjohur, e talentuar, Zef Dedën.

Zef Deda ishte një artist që të gjithë dhuntinë e tij, ia kushtoi në çdo kohë të vërtetave të mëdha të artit dhe shoqërisë.

Ai ndahet nga jeta para kohe, pra, duke pasur mundësi për të kapur maja të tjera në skenë dhe art.
Por, mbetet i pavdekshëm me trashëgiminë e tij të shkëlqyer që lë.

Ndaj dhe unë shpreh ngushëllimet më të ndjera familjes, të afërmve, komunitetit artistik dhe qytetarëve të Shkodrës dhe të mbarë Shqipërisë për këtë humbje të madhe.”

“Sot, jam para jush për të denoncuar vjedhjet nga Edi Rama dhe Bolino i tij, me firmën e Edi Ramës.
Tre vendime të Këshillit të Ministrave, me emër të përveçëm, brenda shtatë muajsh, të firmosur nga vetë Edi Rama, për t’i rrëmbyer komunitetit, nga Rama dhe Bolino, të 4900 metër katrorë tokë e lënë, dhuruar për ndërtimin e një gjimnazi.

Siç e shihni, ky është plani rregullues i Tiranës. Familjet fisnike të qytetit, kanë dhuruar një territor prej 5 mijë metër katrorë, në mënyrë që komuniteti i kësaj zone të ketë gjimnazin e vet, për arsye se një zonë me 60 mijë banorë, nuk kishte një të tillë.

Sot, do paraqesim me fakte se si Edi Rama keqpërdor pozitën e tij zyrtare për të grabitur troje dhe ndërtesa në Tiranë dhe SKAP-i i mercenarëve të tij, qëndron mburojë e kësaj vjedhje, e këtij krimi shtetëror.
Edi Rama me larot e tij në SKAP dhe gjykatën e tij speciale, sulmon Berishën pse miratoi ligje për kthimin dhe kompensimin e pronave, të cilët shteti komunist ua kishte grabitur pronarëve të ligjshëm.

Ndërsa reformat e PD bënë të mundur që gjatë viteve 2006-2012, AKKP të kthejë apo të kompensojë 1 miliard e 577 milionë metër katrorë tokë te pronarët e ligjshëm, Edi Rama dhe larot e tij të SKAP-it me gjykatën e partisë, pretendojnë se ato reforma janë kryer për të favorizuar Jamarbër Malltezin, të cilin në përputhje të plotë me ligjin, iu kthyen gjithsej 410 metër katrorë nga prona e të parëve të tij, themelues të qytetit të Tiranës.

Në tërë këtë piramidë mashtrimi të ngritur nga Edi Rama dhe larot e tij mbi privatizimin e klubit Partizani, Sali berisha nuk ka nxjerrë asnjë vendim me emër të përveçëm, ndërsa Edi Rama ka dhjetëra të tilla, por natyrisht ka SKAP-in e partisë si mburojë, që heton me urdhër vetëm me politikë pronarë dhe ish-pronarë që kanë marrë 410 metër tokë në përputhje të plotë me ligjin, të grabitura 60 vite më parë nga regjimi komunist.

Këtu keni tre vendime në një hark kohor prej shtatë muajsh, me të cilën ka ndodhur një nga vjedhjet më spektakolare, më kriminale, me firmë të Edi Ramës, të tokës truall të dhuruar për gjimnaz, në mes të Tiranës.

Me këto vendime u vodhën 4900 metër katrorë tokë. Me VKM me numër 644, datë 2.10.2019, Edi Rama i dhuron vetes dhe Bolinos së tij 4020 metër katrorë tokë dhe mbi 1600 metër katrorë ndërtesë për 1 euro, për 20 vjet.

E caktuar për shkollë, merret për pallat privat media.

Me VKM-në e dytë, numër 157, datë 19.2.2020, katër muaj më vonë, pasi oreksi i Ramës dhe Karlos së tij vijnë duke ngrënë, vendosin të grabisin edhe një sipërfaqe shtesë prej 870 metër katrorë tokë, po me 1 euro. Dhe Edi Rama me firmën e tij amendon, shton në kontratë edhe 860 metër katrorë tokë.

Por tre muaj më vonë, përsëri Edi Rama përdor firmën në mënyrën më abuzive, më korruptive, dhe me vendimin e tretë të Këshillit të Ministrave të datës 6.5.2020, Edi Rama mbledh qeverinë për të prishur tre ndërtesat që ia kishte dhënë me qira vetes dhe Bolinos së tij.

Pra, fillimisht u dhanë me 1 euro, tani duhej të prisheshin. Nuk shpenzonin asnjë qindarkë, duhej t’ua prishte shteti. Kjo bëhet që të pastrohet toka, por edhe për më shumë.

Kjo bëhet që investimet Rama-Bolino të tejkalojnë në vlerë, vlerën e tokës dhe të bëhen de facto në vitet në vazhdim, pronë e tyre. Të bëhet pronë e tyre edhe toka,” tha Sali Berisha duke folur për skandalin Rama-Bolino, se mburojë e këtij krimi bëhet SKAP-i i partisë, pasi ai aktivizohet vetëm me porosi.

“Kjo tokë, e thashë, ishte e destinuar në planin rregullator të vitit 2013, për gjimnaz.

Banorët e zonës bënë protesta, kur panë se toka e dhuruar për gjimnaz, po grabitej nga Rama dhe Bolino.
Por natyrisht mburojë e këtij krimi, qëndronte SKAP-i i partisë, pasi ai vepron, aktivizohet vetëm me porosi.

Ndaj dhe sot, unë ftoj qytetarët të shtrojnë disa pyetje për këtë aferë të shëmtuar korruptive.
Pse u zhduk shkolla e mesme nga plani rregullues i bashkisë së vitit 2013, që do ndërtohej mbi truall të falur nga familjet fisnike të Tiranës. Edi Rama nuk ka tagër të ndryshojë asgjë me vendim qeverie në planin rregullues të qytetit të Tiranës.

Pse nuk u lidh kontrata e qirasë me Bashkinë e Tiranës, pasi prona ishte e bashkisë dhe pronarët e kishin dhuruar për ndërtimin e gjimnazit? Kjo së pari se Këshilli Bashkiak, pavarësisht nga urdhri që merrte nga Edi Rama, do e kishte të pamundur të shumëzonte me zero, të hiqte një shkollë për të ndërtuar pallatin e medias të Ramës dhe Bolinos. Pra, u krye një krim, u shkel një ligj vetëm e vetëm pse Këshilli Bashkiak nuk mund të miratonte një vendim të tillë.

Pse të mos nxirrej, nëse konkludohej se kjo shkollë nuk duhej, ligji ishte se kjo tokë që me çmim reference kushton 1 milion e 250 mijë euro, pse të mos nxirrej nga bashkia në ankand? Për të ndërtuar qoftë dhe ndërtesa sociale për banorët. Por do ndërtohej pallati Rama-Bolino me tre firma të Edi Ramës.

Pse nxori Rama, VKM të veçantë, VKM-në e tretë, për të prishur objektet që sapo i kishte marrë me Bolinon e tij? Qëllimi është i qartë, që të mos shpenzohej një qindarkë për prishjen e tyre. Së dyti, në mënyrë që investimi të tejkalonte vlerën e tokës dhe këta të bëheshin pronarë ët përjetshëm të tokës së vjedhur.

Së fundmi, në rast se i ndryshoi destinacioni, pse nuk e bleu me çmimin e referencës, por e dha me 1 euro, për të ngritur median e tyre në funksion të pushtetit të tyre, duke i privuar arkës së shtetit, vetëm me çmimin e referencës 1 milion e 250 mijë euro me tre vendimet e tij antiligjore, me të cilën ka përvetësuar këtë pronë.

Ky është një akt unik, por Edi Rama ka me dhjetëra e dhjetëra vendime me të cilat ka vjedhur, ka rrëmbyer me sojin e tij prona, objekte, të cilat ne në mënyrë të vazhdueshme do i paraqesim para jush,” tha Berisha duke përsëritur se SKAP-i hesht si fija e barit për Irena Gjokën, por kërkon përjashtimin e gjykatëses që nuk e ka takuar kurrë Malltezin,” tha lideri i opozitës duke akuzuar SPAK-un se po hesht si fija e barit për Irena Gjokën, dhe kërkon përjashtimin e gjykatëses që nuk e ka takuar kurrë Malltezin.

“Opozita është për të mbrojtur interesin publik nga cilido që e shkelmon atë, qoftë kryeministër, qoftë ministër, qoftë president, qoftë gjykatës, qoftë prokuror, qoftë cilido.

Një opozitë që hesht para shkelmimit të interesit publik, nuk e meriton të jetë opozitë.

Sali Berisha ka mbështetur dhe do mbështesë me forcën më të madhe, të gjithë ata punonjës në të gjitha nivelet e administratës dhe në institucione të tjera, që zbatojnë ligjin dhe vetëm ligjin.

Sikundër do të denoncoj këtu, çdo shkelës të ligjit, i cili me aktin e tij, kryen një krim.

Nuk jam unë që sulmoj SKAP-in e partisë, është SKAP-i që shkelmon dhe vetëposhtëron veten e tij në një pozicion mercenari, si një organizatë kriminale në veprimet e tyre.

Sigurisht që unë jam kryetari i një partie kryesore opozitare, unë do mbaj qëndrime.
Unë para jush kam denoncuar rastin Beqaj, të cilin SKAP-i për herë të dytë e amnistoi me urdhër të Edi Ramës.

Atëherë mund të tolerohet kjo pa u denoncuar. Unë u thashë ju, se akuza që i vunë, ishte për ta nxjerrë të pafajshëm. Dhe e detyroi gjykatësin të reagojë për së dyti ndaj amnistisë së Beqës.

Po të jap një shembull të dytë. Dje brenda orëve, falangat apo larot e SKAP-it të Edi Ramës, kërkuan largimin e gjykatëses, e cila firmosi ndryshimin e Kushtetutës për Sali Berishën. Ka kryer një krim të rëndë kushtetues. E firmosi me urdhër të partisë.

Por meqenëse mori një masë po arresti, por shtëpie për Malltezin, e quajtën konflikt interesi, një njeri që nuk e ka takuar kurrë Jamarbër Malltezin, por që ka marrë një apartament nga administratori i kompanisë, që nuk ishte pjesë e këtij procesi dhe kërkuan përjashtimin e saj nga procesi.

Ndërkohë denoncimet e përsëritura të miat, për vendimin në konflikt të plotë interesi të gjykatëses, që fshihet prapa krimit të saj, që thotë se nuk jam Maneku, por jam Gjoka, që është shkarkuar me firmën time për korrupsion nga detyra, dhe që ka probleme të tjera- ta ketë të qartë, për atë SKAP-i i partisë nuk thotë asnjë fjalë, hesht si fija e barit. Aty nuk ka konflikt interesi.

Por nëse vetëposhtëron kush veten, janë këta që e vetëposhtërojnë veten, jo ne që i nxjerrim këto.

A apo të them unë për oficerin e policisë sekrete. Si mund të qëndrojë ai në detyrë, kur Kushtetuta dhe ligji i prokurorisë e nxjerrin jashtë detyrës? A duhet të zbatojë prokuroria ligjin e ri të vetin, të miratuar nga kjo mazhorancë?

Po pse për qytetarin e thjeshtë respektohet, kurse për skafistin Kraja, ish-prokurorin politik të diktaturës hoxhiste, nuk mund të respektohet?

Kujt ia shesin këto standarde këta? Dhe këta mendojnë të përdorin këtë si mburojë, se janë prokurorë, se janë speciale.

Merr Millonain, do e sjell këtu, do e dëgjoni me veshët tuaj deklaratën e saj famoze se korrupsioni konsumohet edhe duke zbatuar ligjet. U them një gjë, po edhe në dosjet e Sigurimit të Shtetit nuk gjen një gjë të tillë.”

Sot në konferencën e përjavshme, Kryetari i Partisë Demokratike i dha përgjigje edhe të gjithë atyre që flasin për Ish/Zv.Drejtorin e Policisë, Erzen Breçani, ndërsa shprehu qëndrimin edhe për arrestimin e tij:

“Së pari, Erzen Breçani të garantoj se nuk ka qenë kurrë në jetën e tij, badigard i Sali Berishës dhe kjo është një gënjeshtër e bazuar në mashtrime.

Nuk ka qenë jo se Sali Berisha ka pasur vërejtje për të, ai ka qenë një polic gjerësisht i vlerësuar në kryerjen e deyrës në të gjitha postet që ka pasur.

Kështu që t’i themi ato siç janë.

Së dyti, për Erzen Breçanin dhe për çdo njeri tjetër, Sali Berisha ka vetëm një qëndrim, ligjin, ligjin dhe vetëm ligjin.

Kushdo që ka shkelur ligjin, duhet të bëhet përgjegjës para ligjit.

Së treti, se kam dëgjuar unë, dhe dua t’i them atij anëtarit të bandës së Bajrit, që deklaron se ajo kulla e Matës qenka e një të afërmi tim, unë kërkoj që nesër, nëse është e një të afërmi tim, ajo të konfiskohet. Unë nuk kam asnjë dijeni.

Po i them anëtarit të bandës Bajri, mirë është të shkojë dhe të japë llogari dhe të mos mendojë se do kalojë krimet që ka kryer në emër të bandës, duke shpifur, duke trilluar, duke folur poshtë e përpjetë. Se ato nuk e shpëtojnë.

Se ai është anëtar i paguar i bandës së Bajrit, me dokumente. Me dokumente!

Siç e kam akuzuar atë unë njëherë për hjekës në vrasje, se është vrarë djali 24-vjeçar në Zemblak, vetëm e vetëm pse denoncoi te ai, i keqpërdorur nga policia dhe të gjitha anët, denoncoi parcelat e drogës të oficerëve të policisë në Korçë dhe mori plumb pas koke në Zemblak 24-vjeçari.

Tani i them atij, avash avash, duhet të marrësh atë që do marrin Bajrët me shokë.

Duhet t’ia them këtu, sepse kur Bajrët ulën në studiot televizive, bashkë me ju, dhe u kapardisën si njerëz me njohuri të thella, për faktin e vetëm se janë anëtarë të bandave më të rrezikshme, ata e meritojnë të shkojnë atje ku e kanë vendin dhe jo në studiot televizive.

E them këtë në emër të interesit publik, për të tjerat do njiheni më vonë.

Në fund, çdo njeri që shkel ligjin, duhet të marrë atë që meriton. Nuk kam asnjë lloj komenti tjetër, pavarësisht se kush është.

Nuk gjen kush kurrë një njeri që të kem mbrojtur një shkelës ligji. Asnjëherë!”

Në fund, Kryetari i Partisë Demokratike, Sali Berisha, vlerësoi se opozita ka kontribute të mëdha kundër interesave ruse në vend:

“Ju e dini që nuk ka dallim Basha-Balla, Balla-Basha.

Njërit i them Brava, tjetrit i them Bego.

Ata në substancë janë një.

Nuk mund të ndodhë kurrë që kjo parti të shkrihet me Ballat dhe me Bravat.

Jo, aq më tepër që pavarësisht nga rrethanat, por akuzat e fundit të hetimit të 4 gazetarëve të BBC, dhe angazhimi i tyre për të vazhduar hetimin për paratë ruse të marra, unë do i thoja çdo opozitari, të mbajë shënim dhe të ketë kujdes sepse opozita shqiptare është një opozitë, për definicion, me kontribute të mëdha kundër interesave strategjike ruse në Shqipëri dhe rajon.”