Escobar në Beograd: Pres vazhdim dinamik të dialogut!
I dërguari i Shteteve të Bashkuara për Ballkanin Perëndimor, Gabriel Escobar, tha se pret që dialogu midis Kosovës dhe Serbisë për normalizimin e marrëdhënieve, të vazhdojë në mënyrë dinamike dhe konstruktive.
“Kjo është e rëndësishme si për qytetarët, ashtu edhe për paqen, stabilitetin dhe përparimin e përgjithshëm në rajon,” tha Escobar në Beograd, pas takimit me presidentin e Serbisë, Aleksandar Vuçiç, raporton RFE duke ju referuar Presidencës serbe.
Vuçiç, në anën tjetër, tha se ka mbajtur bisedime të rëndësishme me diplomatin e lartë amerikan.
Përmes rrjetit social Instagram, Vuçiç tha se është biseduar për të gjitha zhvillimet aktuale dhe për çështjet e hapura në dialogun midis Beogradit dhe Prishtinës.
Ai tha se ka këmbëngulur në zbatimin e plotë të marrëveshjeve të arritura deri më tani, si dhe të së drejtës ndërkombëtare.
“Serbia, si vend serioz, i besueshëm dhe i përgjegjshëm, vazhdon të luftojë për ruajtjen e popullit dhe vendit të saj, duke bërë përpjekje maksimale për ruajtjen e paqes dhe stabilitetit, si dhe për përparimin e gjithë rajonit,” tha Vuçiç.
Escobar po qëndron në kryeqytetin serb një ditë pas vizitës në Kosovë. Ai pritet të takohet edhe me kryeministren e Serbisë, Ana Brnabiç, dhe drejtorin e Zyrës për Kosovën pranë Qeverisë së Serbisë, Petar Petkoviç.
Dje, Escobar takoi në Prishtinë, presidenten e Kosovës, Vjosa Osmani, kryeministrin Albin Kurti dhe përfaqësuesit e opozitës.
Ndryshe, Kosova dhe Serbia, raporton RFE, me ndërmjetësimin e Bashkimit Evropian dhe mbështetjen e SHBA-së, janë në negociata për normalizimin e marrëdhënieve qysh në vitin 2011. Ato kanë arritur dhjetëra marrëveshje, por zbatimi i shumicës ka ngecur.
Takimi i fundit në nivel të lartë, përkatësisht mes Kurtit dhe Vuçiçit, është mbajtur në gusht.
Duke folur për një televizion lokal në Kosovë, dje Escobar tha se arritja e një marrëveshjeje për rrugën përpara mes Kosovës dhe Serbisë, është çështje javësh.
Pas takimeve të ndara me Escobarin, Osmani dhe Kurti thanë se Kosova është palë konstruktive në dialog dhe se ajo është e gatshme për arritjen e një marrëveshjeje me Serbinë, me në qendër njohjen reciproke.
