Leva e Arkimedit për largimin e Edi Ramës jemi Ne, Berisha: Nesër, etapa e re e betejës ndaj narkoregjimit

Nuk ka ditë më të vështirë për kombin se sa kjo, tha sot Kryetari i Partisë Demokratike, Sali Berisha, duke vlerësuar se është koha të përballemi dhëmb për dhëmb me regjimin më të poshtër që nga koha e Enver Hoxhës.

Kryetari i Partisë Demokratike tha para Grupit Parlamentar të PD, se Edi Rama do përdorë mandatet e krimit për të asgjësuar gjyqësorin dhe shkëputur Shqipërinë nga integrimi në BE.

“Mblidhemi sot një ditë para një akti të pashembullt në historinë e parlamentarizmit shqiptar në 34 vite pluralizëm.
Mblidhemi një ditë para se kreu i organizatës kriminale, Edi Rama të përdorë mandatet e krimit të tij si bajoneta kundër çdo shqiptari.

Mblidhemi në një kohë kur për të mbrojtur lëkurën e tij, për të mbrojtur krimet që ka kryer, ai vendos t’i mbyllë dyert drejtësisë shqiptare.
Vendos de facto asgjësimin e pushtetit gjyqësor. Vendos mburojën e plotë të mazhorancës së krimit apo mandateve të krimit për vjedhjet e tij dhe të qeveritarëve. Vendos në kuadrin e një skenari më të ziun, skenarit të shkëputjes së Shqipërisë nga procesi i integrimit në BE.
Pas përpjekjesh të jashtëzakonshme të bëra në vite për një ëndërr të kahershme të shqiptarëve.
Për një ëndërr të rilindësve tanë gjeni, që një komb që zgjohet pas 5 shekujsh lindje, e projektojnë në perëndim. E projektojnë zonjë në Europë.
Tani del një Haxhi Qamil. Tani del një bandit. Del një njeri pa nder, pa flamur. Një apatrid që vetëm pak muaj më parë bërtiste për pasaportën evropiane që do u dhuronte shqiptarëve dhe tani u nxjerr pasaportën e Beogradit shqiptarëve në vend të saj.
Ky është një akt jashtëzakonisht i rëndë, i cili shtyn masivisht shqiptarët që të heqin dorë nga ndërtimi i ëndrrës së tyre evropiane në Shqipëri dhe të marrin rrugët e dheut për ta ndërtuar atë në vende të tjera.
Ky është një akt që vetëdijshëm e shkëput Shqipërinë nga aleatët natyralë, me të cilët e bashkoi në frymë Lëvizja e Dhjetorit 1990 dhe hapat e tjerë të mëtejshëm që u bënë.
Arritjet e padiskutueshme në fushën e integrimit euroatlantik, integrimi në NATO, MSA, pranimi i kërkesës së Shqipërisë për proces anëtarësimi, akordimi i statusit kandidat dhe pastaj më në fund hapja e negociatave.
Të gjitha këto, Edi Rama i shkelmon për shkak të veprimtarisë së tij kriminale të dyanshme. Vjedhjen e tij të çmendur dhe të pakufishme të pasurive dhe fondeve publike për veten dhe familjen e tij.
Belinda është lule çfarë janë dy Lindat e tij.
Por edhe Belinda dhe dy Lindat janë Rama vetë. Se Lubia ka qenë thjesht një sekretare, notere e vjedhjeve të tij për 25 vite me radhë, që ka ndarë pasuri me të dhe tani duhet që shqiptarëve t’u mbyllen dyert e integrimit në BE,” tha Sali Berisha duke vlerësuar se është një moment jashtëzakonisht kritik

“Dhe po të kemi parasysh një faktor, e vërteta është deri diku të pandalshëm, që është avancimi i forcave të ekstremit të djathtë në vendet e mëdha të BE, për të cilat nuk mund të imagjinohet kurrë që Shqipëria të jetë një vend anëtar, këto akte e përçudnojnë Shqipërinë në një shkallë të atillë, sa askush nuk mund të marrë përsipër ta mbështesë këtë vend.
Vendi po bëhet gazi i dheut.
Kur tregjet e basteve merren të parashikojnë nëse Edi Rama do bjerë këtë vit apo jo, ta imagjinojë çdo shqiptar se ku jemi katandisur ne me këtë njeri. Tani, koha është sot më shumë se kurrë e përgjegjësisë qytetare. Përgjegjësi qytetare do të thotë në këtë rast, përgjegjësi para vendit tënd.
Çfarëdo që je, dhe cilido që je, në qoftë se e ndjen veten shqiptar, është koha të ngrihesh.
Është koha të përballemi dhëmb për dhëmb me një regjim që kaq të poshtër nuk e kanë pasur shqiptarët që nga koha e Enver Hoxhës gjer sot.
Vetëm Enver Hoxha ishte i aftë të merrte çdo lloj vendimi për të ruajtur pushtetin e tij.
Vetëm ai ishte i aftë t’i çonte shqiptarët tek racioni i bukës së misrit, kilogrami i kripës dhe sheqerit që t’i mbante ata të uritur dhe të topitur në mënyrë që të mos mendonin gjë tjetër përveç kafshatës.
Vetëm ai ishte i aftë në shpirtin e tij të zi t’i zhyste shqiptarët në izolimin më të thellë që të mos ngriheshin kundër tij.
Edi Rama, pasi ka vjedhur miliarda me organizatën e tij kriminale, tani zhduk edhe Kushtetutën, zhduk shtetin ligjor, i mbyll të gjitha, shkatërron drejtësinë për të mbrojtur lëkurën e tij.
Nuk ka ditë më të vështirë për vendin se sa kjo. Nuk ka ditë më të vështirë për kombin se sa kjo,” duke vlerësuar se komuniteti ndërkombëtar ka folur shumë qartë.
“Për një seri vendesh të BE, shteti ligjor është kushti i të gjitha kushteve që Shqipëria të ecë në rrugën e integrimit. Pa shtet ligjor, nuk ka integrim. Por mjerisht, ka edhe tek tuk të tjerë, të cilët nuk bëhet fjalë që Shqipëria të jetë me shtet ligjor as pa shtet ligjor anëtar i BE. Ndaj dhe mbështesin variantin Vuçiç-Rama.
Variantin e marrëveshjes tregtare, pa marrëveshjen politike, domethënë sui generis, marrëveshje që mund t’i ofrohet Tunizisë, mund t’u ofrohet shumë vendeve, tregti, tregti. Por kjo që ndodh është në kundërshtim flagrant me aspiratat e mbarë shqiptarëve.
Të gjitha studimet tregojnë se qytetarët shqiptarë mbështesin fuqishëm procesin e integrimit. PD është zëdhënëse e këtyre aspiratave. Për kohën që ishte në pushtet, ajo ishte një lokomotivë e pandalshme e procesit të integrimit. Në historinë e vendit, procesin e integrimit e ka ndaluar vetëm Edi Rama.
Ju kujtohet mirë në vitin 2012, kur KE rekomandoi statusin e kandidatit dhe ishin tre ligje për t’u votuar, Edi Rama, pasi ra dakord me ndërmjetësimin e zyrtarëve të lartë të KE për votimin e tyre, nuk i votoi ato.
Dhe ta dinë shqiptarët, nuk i votoi, por si faqezi që është, se nuk ka pasur Shqipëria njeri më faqezi se ai, ai ndërmori në vjeshtën e vitit 2013, pasi fitoi zgjedhjet, udhëtimin më të turpshëm të një kryeministri në historinë e vendit.
Shkoi në Londër si kryeministër dhe kërkoi takim vetëm me drejtorin e Foreign Office për rajonin.
Pala britanike i tha se nuk mund të ndodhë kjo, se në ato protokollet tona, një kryeministër nuk mund të pritet nga një drejtor në Ministrinë tonë të Jashtme.
Prandaj urdhëro, ta lartësojmë takimin dhe ti sigurisht do pritej. Jo, tha, nuk dua. Dhe të gjitha këto janë me dëshmitarë, ta dinë shqiptarët.
Si përfundim, pala britanike gjen një zgjidhje praktike. Nuk e pret ai në zyrë, i shkon në hotel Edi Ramës.
Dhe cila ishte kërkesa e tij? A mund ta imagjinoni ju?
Kërkesa e tij ishte, na e bllokoni statusin e kandidatit tani dhe na e jepni pas 6 muajsh, që të mos duket se po e marrim nga qeveria që ishte. Absolute kjo që u them unë. Ai mori shënim. I habitur shumë drejtori, por drejtori menjëherë ia transmetoi ambasadorit tonë që nuk ishte i ftuar në takim. I tha, ky takim në jetën time nuk ka ndodhur kurrë.
Ky është, çfarë do epiteti t’i vësh këtij, i turpëron fjalët me këtë njeri.
Dhe ky sot tani, ky që shkoi dhe e shtyu vetëm që të mos dilte se ishte puna e PD, sepse ne i humbëm zgjedhjet dhe menjëherë i votuam tre ligjet, nuk më shkonte mendja kurrë që t’ia kthenim me të njëjtën monedhë atij.
Dhe ky tani shkon dhe lobon që të shtyhej statusi, në mënyrë që të mos i binte si meritë PD-së.
E treguar këtë shembull thjesht për t’u treguar shqiptarëve se çfarë llumi njerëzor është ky. Po këtë që bën sot, për t’ua ndërruar pasaportën evropiane me pasaportën e Serbisë, është akti i tradhtisë më të lartë kombëtare pas tradhtisë që i bëri Enver Hoxhës, Kosovës në vitet e Luftës së Dytë Botërore.
Sot, interesi suprem kombëtar i shqiptarëve është integrimi i Shqipërisë në BE.
Ky është interesi kombëtar. Dhe ky e shkelmon këtë interes vetëm për interesat e tij,” tha Kryetari i Partisë Demokratike duke konkluduar se leva e Arkimedit për largimin e Edi Ramës është PD.

“Sytë e miqve tanë, e miqve të Shqipërisë, janë të drejtuar tek opozita shqiptare, sepse natyrisht ata kanë qëndruar dhe qëndrojnë për shtetin ligjor në Shqipëri. Ne jemi shumë mirënjohës.
Ata janë gjetur para të dhënave, fakteve, dokumenteve që asnjë prej tyre nuk i imagjinonte në rastin e dosjes së Ergys Agasit. Asnjë nuk i imagjinote dhe kanë përcaktuar qëndrimet e tyre.
Qeveria e SHBA në mënyrë të përsëritur ka folur për kartelet e drogës dhe lidhjet në nivelet më të larta të pushtetit. Por problemi është se, leva e Arkimedit për largimin e Edi Ramës jemi vetëm ne, janë qytetarët shqiptarë është opozita shqiptare.
Kështu që nesër shënon një etapë të re vendimtare, në betejën tonë për përmbysjen e këtij regjimi, armiqësor në të gjithë qenien e tij ndaj Shqipërisë, shqiptarëve, kombit, të sotmes dhe të ardhmes së tyre.
Me besim të madh tek qytetarët shqiptarë se do ti dalin zot ëndërrës së tyre më të bukur, interesit të tyre kombëtar, interesit të tyre personal, familjar, të fëmijëve të tyre, opozita do të udhëheqë kryengritjen paqësore gjer në rrëzimin përfundimtar të këtij regjimi antishqiptar, armiqësor të shqiptarëve,” tha Kryetari i Partisë Demokratike, Sali Berisha, para Grupit Parlamentar të PD duke përfunduar me zotimin:
“Duke denoncuar me forcën më të madhe këtë zhvillim tmerrësisht negativ dhe me pasoja për vendin, le ti zotohemi Edi Ramës se, ai nuk do të gëzojë kurrë këtë që mendon, dhe se në rast se mendon ti shpëtojë një prokurori, nuk do ti shpëtojë kurrë lëkurën e tij nga populli shqiptar, nga qytetarët shqiptarë.”